ຝຶກອົບຮົມການສົ່ງຕໍ່ກໍລະນີໃຫ້ມີຄວາມປອດໄພແກ່ຜູ້ຈ້າງງານ

ການຈັດຝຶກອົບຮົມ ຄັ້ງນີ້, ພາຍໃຕ້ໂຄງການປົກປ້ອງເດັກ ເພື່ອປ້ອງກັນການໃຊ້ແຮງງານເດັກ ປະຈໍາແຂວງຫຼວງພະບາງ ຮ່ວມກັບ ພາກສ່ວນທີ່ກ້ຽວຂ້ອງ ໂດຍການສະໜັບສະໜູນຈາກສະຫະພາບ ເອີຣົບ ປະຈຳລາວ (EU), ເພື່ອປ້ອງກັນການໃຊ້ແຮງງານເດັກ, ຫຼຸດຜ່ອນການໃຊ້ແຮງງານເດັກ ໃນຊຸມຊົນທີ່ດ້ອຍໂອກາດ ແລະ ບ້ານຊົນເຜົ່າ ເປັນຕົ້ນ ເດັກນ້ອຍ ແລະ ໄວໜຸ່ມຢູ່ບ້ານທີ່ທຸກຍາກ ໃນເຂດເປົ້າໝາຍຂອງໂຄງການ ລວມມີ 30 ບ້ານ ໃນເມືອງໂພນໄຊ, ເມືອງປາກແຊງ, ເມືອງໂພນທອງ, ເມືອງວຽງຄໍາ, ເມືອງງອຍ ແລະ ເມືອງນ້ຳບາກ, ຊຶ່ງເລັ່ງໃສ່ການປ້ອງກັນບໍ່ໃຫ້ເດັກ ຕົກຢູ່ໃນສະພາບການຖືກຂູດຮີດແຮງງານ ແລະສະກັດກັ້ນຄວາມສ່ຽງ ທີ່ອາດເຮັດໃຫ້ເດັກຕ້ອງເຂົ້າສູ່ການໃຊ້ແຮງງານ, ສົ່ງເສີມສິດທິເດັກ ໂດຍສະເພາະສິດໃນການມີຊີວິດທີ່ປອດໄພ ມີການສຶກສາ ແລະ ການພັດທະນາທີ່ເໝາະສົມຕາມໄວ, ສ້າງຄວາມຮັບຮູ້ໃຫ້ຊຸມຊົນ, ຄອບຄົວ ແລະ ຜູ້ຈ້າງງານ ກ່ຽວກັບຜົນກະທົບທາງລົບຂອງການໃຊ້ແຮງງານເດັກ ທັງດ້ານຮ່າງກາຍ, ຈິດໃຈ ແລະ ສັງຄົມ. ສະໜັບສະໜູນການເຂົ້າເຖິງການສຶກສາທີ່ມີຄຸນນະພາບ ເພື່ອໃຫ້ເດັກມີໂອກາດພັດທະນາທັກສະ ແລະ ອະນາຄົດທີ່ດີກວ່າ ໂດຍບໍ່ຕ້ອງຫັນໄປເຮັດວຽກ ຕັ້ງແຕ່ອາຍຸຍັງນ້ອຍ, ສ້າງກົນໄກປົກປ້ອງທາງກົດໝາຍ ແລະ ລະບົບການບັງຄັບໃຊ້ກົດໝາຍທີ່ມີປະສິດທິພາບ ເພື່ອປ້ອງກັນ ແລະ ດຳເນີນຄະດີ ກັບຜູ້ກະທິຜິດທີ່ໃຊ້ແຮງງານເດັກ, ຊ່ວຍເຫຼືອ-ຟື້ນຟູ ແລະ ເອົາເດັກ ທີ່ຖືກໃຊ້ແຮງງານກັບຄືນສູ່ສັງຄົມ ໂດຍການໃຫ້ການປິ່ນປົວທາງຈິດ, ການຝຶກອາຊີບ ແລະ ການສຶກສາທີ່ເໝາະສົມ.

ໃນໄລຍະການຝຶກອົບຮົມ, ຜູ້ເຂົ້າຮ່ວມໄດ້ຮັບຟັງການເຜີຍແຜ່ ຂໍ້ກຳນົດການໃຊ້ແຮງງານເດັກ-ໄວໜຸ່ມ ປະເພດວຽກເບົາ ແລະ ວຽກງານອັນຕະລາຍຕໍ່ເດັກ, ພາລະບົດບາດຂອງສະມາຄົມການຄ້າ, ພາລະບົດບາດຂອງກຳມະບານລາວ ຕໍ່ກັບວຽກງານການປົກປ້ອງແຮງງານ ແລະ ຮ່ວມກິດຈະກຳຂອງໂຄງການຈັດຂຶ້ນ ຄື: ຜົນສຳຫຼວດຂອງການໃຊ້ແຮງງານເດັກ ແລະ ຜົນກະທົບຂອງການໃຊ້ແຮງງານເດັກ, ບັນຫາຂໍ້ກັງວົນໃນການປົກປ້ອງເດັກ, ບົດບາດພາລະໜ້າທີ່ຮັບຜິດຊອບ, ການສັງເກດເບິ່ງເຫດການ, ວິທີການຊ່ວຍເຫຼືອ.

(ພາບ-ຂ່າວ: ທະນູສິນ ອິດທິພົນ)