ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ ລາຍງານຕໍ່ກອງປະຊຸມໃຫຍ່ຜູ້ແທນອົງຄະນະພັກແຂວງເຊກອງ ຄັ້ງທີ XI ເມື່ອບໍ່ດົນນີ້ວ່າ: ທິດທາງລວມ ແລະ ຄາດໝາຍສູ້ຊົນໃນແຜນພັດທະນາເສດຖະກິດ-ສັງຄົມ 5 ປີ (2026-2030) ຂອງແຂວງ ແມ່ນແຜນທີ່ມີບົດບາດສໍາຄັນໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກ ແລະ ມະຕິ XI ຂອງອົງຄະນະພັກແຂວງ ໂດຍຈະສຸມໃສ່ຍົກສູງລະດັບຄຸນນະພາບຊີວິດ ຂອງປະຊາຊົນໃຫ້ສູງຂຶ້ນ, ຮັບປະກັນສະຖຽນລະພາບການເມືອງຢ່າງໜັກແໜ້ນ, ສັງຄົມມີຄວາມສະຫງົບສຸກ, ມີຄວາມສາມັກຄີເປັນປຶກແຜ່ນ ແລະ ພັດທະນາແຂວງໃຫ້ຫຼຸດພົ້ນອອກຈາກຄວາມທຸກຍາກ; ເປັນເຈົ້າຕົນເອງ ໃນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ; ດໍາເນີນການຄຸ້ມຄອງ-ບໍລິຫານເສດຖະກິດ ຕາມກົນໄກຕະຫຼາດທີ່ມີການດັດສົມ ແລະ ຄຸ້ມຄອງຂອງລັດ ເພື່ອພັດທະນາເສດຖະກິດໃຫ້ຂະຫຍາຍຕົວ ແລະ ເຂັ້ມແຂງ, ເອົາໃຈໃສ່ພັດທະນາເສດຖະກິດ- ສັງຄົມ ແລະ ການປົກປັກຮັກສາສິ່ງແວດລ້ອມຢ່າງສົມສ່ວນ ຕາມທິດສີຂຽວ ແລະ ຍືືນຍົງ; ເລັ່ງຈັດຕັັ້ງປະຕິບັດຄໍາສັ່ງນາຍົກລັດຖະມົນຕີ ເລກທີ 02/ນຍ ແລະ 03/ນຍ; ສ້າງສະພາບແວດລ້ອມ ສິ່ງອໍານວຍຄວາມສະດວກ ໃຫ້ແກ່ການດໍາເນີນທຸລະກິດ ໂດຍສະເພາະການເຜີຍແຜ່ກ່ຽວກັບການປ່ຽນແປງດ້ານນິຕິກໍາ, ລະບຽບການ ທີ່ຕິດພັນກັັບວຽກງານວິສະຫະກິດ ແລະ ວຽກງານຂໍອະນຸຍາດດໍາເນີນທຸລະກິດ, ປະສານງານກັບຂັ້ນສູນກາງໃນການສ້າງ ແລະ ພັດທະນາລະບົບການຂຶ້ນທະບຽນວິສະຫະກິດ ທາງເອເລັກໂຕຣນິກ ໃຫ້ສໍາເລັດ ແລະ ສາມາດປະຕິບັດໄດ້ ເພື່ອເປັນການຫຼຸດຜ່ອນຄ່າໃຊ້ຈ່າຍທີ່ບໍ່ຈໍາເປັນ, ຫຼຸດຜ່ອນເວລາ ແນໃສ່ດຶງດູດການລົງທຶນເຂົ້າໃນຂະແໜງບູລິມະສິດ ໄປຄຽງຄູ່ກັບການສ້າງຄວາມເຊື່ອໝັັ້ນໃຫ້ຜູ້ລົງທຶນ; ສົ່ງເສີມການລົງທຶນຮ່ວມມືພາກລັດ-ເອກະຊົນ ທີ່ມີປະສິດຕິພາບ, ພ້ອມນັັ້ນ ກໍຄົ້ນຄວ້າ ປັບປຸງນະໂຍບາຍເອື້ອອໍານວຍ ແລະ ສ້າງແຮງຈູງໃຈ ດ້ວຍການພັດທະນາຂະແໜງການບູລິມະສິດ, ການເຊື່ອມໂຍງຕ່ອງໂສ້ການຜະລິດພາກພື້ນ ແລະ ສາກົນ ແລະ ຮັບປະກັນການດໍາເນີນທຸລະກິດ ຢ່າງມີຄວາມຮັບຜິດຊອບ; ສ້າງຄວາມກົມກຽວອັດຕາອາກອນ ເພື່ອຊຸກຍູ້ການເກັບລາຍຮັບ ລວມທັງຄວາມສາມາດໃນການຄາດຄະເນລາຍຮັບ ແລະ ອື່ນໆ.
ທ່ານ ຂັນຕີ ສີລະວົງສາ ໃຫ້ຮູ້ຕື່ມວ່າ: ໃນ 5 ປີຜ່ານມາ (2021-2025) ແຂວງເຊກອງ ສາມາດລະດົມແຫຼ່ງທຶນເຂົ້າໃນການພັດທະນາໄດ້ທັງໝົດ 4,547.40 ຕື້ກີບ ປະຕິບັດໄດ້ລື່ນແຜນ 45.75% (ແຜນ 5 ປີ 3,120 ຕື້ກີບ). ໃນນັ້ນ, ການລົງທຶນຂອງລັດ 384.37 ຕື້ກີບ, ປະຕິບັດໄດ້ລື່ນແຜນ 54.36% (ແຜນ 5 ປີ 249 ຕື້ກີບ), ທຶນຊ່ວຍເຫຼືອທາງການ ເພື່ອການພັດທະນາ (ODA) 444.47 ຕື້ກີບ, ປະຕິບັດໄດ້ລື່ນແຜນ 42.45% (ແຜນ 5 ປີ 312 ຕື້ກີບ) ແລະ ການລົງທຶນເອກະຊົນພາຍໃນ ແລະ ຕ່າງປະເທດ (FDI) 3,718.56 ຕື້ກີບ, ປະຕິບັດໄດ້ລື່ນແຜນ 45.14% (ແຜນ 5 ປີ 2,562 ຕື້ກີບ). ທຸກໆແຫຼ່ງທຶນທີ່ແຂວງລະດົມໄດ້ນັ້ນ ແມ່ນສຸມໃສ່ການພັດທະນາພື້ນຖານໂຄງລ່າງ ແລະ ສ້າງສິ່ງອໍານວຍຄວາມສະດວກໃຫ້ແກ່ວຽກງານການຄ້າ, ການລົງທຶນ ແລະ ການບໍລິການດ້ານຕ່າງໆ ເຮັດໃຫ້ເສດຖະກິດ-ສັງຄົມຂະຫຍາຍຕົວ ແລະ ປະຊາຊົນມີຊີວິດການເປັນຢູ່ນັບມື້ດີຂຶ້ນເປັນກ້າວໆ.
(ຂ່າວ-ພາບ: ສັນຍາ)
ຄໍາເຫັນ