ກະຊວງ ວັດທະນະທໍາ ແລະ ການທ່ອງທ່ຽວ ໄດ້ນຳພາຄະນະເຂົ້າຮ່ວມກອງປະຊຸມຄະນະກຳມະການມໍລະດົກຄັ້ງທີ 47 ທີ່ນະຄອນຫຼວງປາຣີ ປະເທດຝຣັ່ງ ເພື່ອໄປຮັບເອົາການຮັບຮອງມໍລະດົກໂລກແຫ່ງທີ 4 ແລະ ເປັນມໍລະດົກໂລກທາງທໍາມະຊາດແຫ່ງທໍາອິດຂອງ ສປປ ລາວ ກໍຄືອຸທິຍານແຫ່ງຊາດຫີນໜາມໜໍ່ ເມືອງບົວລະພາ ແຂວງຄຳມ່ວນ ເປັນມໍລະດົກໂລກ ຮ່ວມຊາຍແດນທາງທຳມະຊາດ ຮ່ວມກັບອຸທິຍານແຫ່ງຊາດຟອງຫຍາ-ແກບາງ ມໍລະດົກໂລກທາງທໍາມະຊາດ ເມືອງໂບແຈັກ ແຂວງກວາງຈີ ຂອງ ສສ ຫວຽດນາມ ຈາກອົງການ UNESCO ຢ່າງເປັນທາງການໃນຄັ້ງວັນທີ 13 ກໍລະກົດ 2025, ໄດ້ສຳເລັດການດຳເນີນກອງປະຊຸມໃຫຍ່ອົງຄະນະພັກກະຊວງວັດທະນະທໍາ ແລະ ການທ່ອງທ່ຽວ ຄັ້ງທີ VI ໃນຄັ້ງວັນທີ 25 ກັນຍາ 2025, ໄດ້ນໍາພາຄະນະສິລະປະ-ນັກສະແດງລາວ ເຂົ້າຮ່ວມສະແດງທີ່ງານບຸນມະໂຫລານສິລະປະສາກົນ ຕາມເສັ້ນທາງສາຍໄໝ ຄັ້ງທີ 11 ທີ່ນະຄອນຊີອານ ແຂວງສ້ານຊີ ສປ ຈີນ ໃນຄັ້ງວັນທີ 15-18 ຕຸລາ 2025 ເພື່ອເຜີຍແຜ່ສິລະປະ-ວັດທະນະທໍາອັນດີງາມ ແລະ ອັນເປັນເອກະລັກຂອງຊາດລາວເຮົາ ໃຫ້ສາກົນໄດ້ຮັບຮູ້ຢ່າງກວ້າງຂວາງ, ໄດ້ນຳພາຄະນະເຂົ້າຮ່ວມກອງປະຊຸມສະມັດຊາໃຫຍ່ອົງການອົງການສະຫະປະຊາຊາດ ເພື່ອການທ່ອງທ່ຽວຄັ້ງທີ 26 ທີ່ນະຄອນຫຼວງຣີຢາດ ປະເທດ ຊາອຸດິດ ອາຣັບບີ, ໄດ້ຊີ້ນຳ-ນຳພາ ຄະນະຮັບຜິດຊອບ ໂດຍສະເພາະຄະນະນັກສະແດງສິລະປະ ເພື່ອຮັບໃຊ້ວຽກງານ 3 ວັນປະຫວັດສາດ ທີ່ສຳຄັນຂອງຊາດລາວເຮົາ ຈົນໄດ້ຮັບໝາກຜົນສຳເລັດຕາມລະດັບຄາດໝາຍທີ່ກຳນົດໄວ້ ແລະ ໄລຍະ 6 ເດືອນຕົ້ນປີ 2026, ກະຊວງວັດທະນະທໍາ ແລະ ການທ່ອງທ່ຽວ ໄດ້ເປັນເຈົ້າການສົມທົບກັບພາກສ່ວນກ່ຽວຂ້ອງ ຈັດການສະແດງສິລະປະອັນຍິ່ງໃຫຍ່ ຮ່ວມກັບ ຄະນະສິລະປະຂອງ ສສ ຫວຽດນາມ ພາຍໃຕ້ຫົວຂໍ້ ລາວ-ຫວຽດນາມ ບົດເພງ ແຫ່ງມິດຕະພາບ ເພື່ອຂໍ່ານັບຊົມເຊີຍຜົນສໍາເລັດກອງປະຊຸມໃຫຍ່ ຄັ້ງທີ XII ຂອງພັກປະຊາຊົນ ປະຕິວັດລາວ,
ທ່ານ ນາງ ສວນສະຫວັນ ວິຍະເກດ ໃຫ້ຮູ້ຕື່ມວ່າ: ໃນ 5 ປີຕໍ່ໜ້າ ຊຶ່ງເປັນໄລຍະເວລາແຫ່ງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກປະຊາຊົນປະຕິວັດລາວ, ແຜນພັດທະນາເສດຖະກິດ-ສັງຄົມແຫ່ງຊາດເທື່ອທີ 10, ຈະສຸມໃສ່ການພັດທະນາເສດຖະກິດດ້ານວັດທະນະທໍາ ໂດຍນໍາໃຊ້ມໍລະດົກເປັນແຫຼ່ງກໍາລັງແຮງ ໃຫ້ແກ່ການພັດທະນາ, ສ້າງຄຸນຄ່າດ້ານເສດຖະກິດ ຕິດພັນກັບການບູລະນະ, ຮັກສາມໍລະດົກໃຫ້ມີຄວາມຍືນຍົງ, ປະສານສົມທົບລະຫວ່າງການຄຸ້ມຄອງ ແລະ ເສີມຂະຫຍາຍຄຸນຄ່າຂອງມໍລະດົກໂລກ ແລະ ມໍລະດົກແຫ່ງຊາດ ທີ່ໄດ້ຮັບການຢັ້ງຢືນ ຢ່າງມີປະສິດທິຜົນ-ນໍາເອົາຜົນປະໂຫຍດສູງສຸດມາໃຫ້ແກ່ສັງຄົມ. ໃນນັ້ນ, ວຽກງານທ່ອງທ່ຽວ ຈະສຸມໃສ່ຈັດຕັ້ງຜັນຂະຫຍາຍຢ່າງແຂງແຮງໃນການສົ່ງເສີມ, ພັດທະນາການທ່ອງທ່ຽວທີ່ຍືນຍົງຕາມທິດອຸດສາຫະກໍາສີຂຽວ ຕິດພັນກັບທໍາມະຊາດ, ວັດທະນະທໍາຮີດຄອງເພນີອັນດີງາມຂອງຊາດ, ຂອງເຜົ່າ, ປະຫວັດສາດ ແລະ ບັນດາທ່າແຮງບົ່ມຊ້ອນຕ່າງໆທີ່ປະເທດມີ; ແກ້ໄຂສາຍພົວພັນໃນວຽກງານທ່ອງທ່ຽວໃຫ້ເປັນລະບົບ, ປະສານສົມທົບ ແລະ ຮັບປະກັນຢ່າງກົມກຽວ ລະຫວ່າງສາຍພົວພັນຂອງລັດ ໃນການບໍລິຫານ, ຄຸ້ມຄອງການທ່ອງທ່ຽວ ແລະ ປະສິດທິຜົນຂອງຕະຫຼາດທ່ອງທ່ຽວ, ການສະໜອງ ແລະ ຄວາມຕ້ອງການຂອງການທ່ອງທ່ຽວ, ການອະນຸລັກຮັກສາ ແລະ ພັດທະນາ, ການເຊື່ອມໂຍງ, ເຊື່ອມສານ ລະຫວ່າງການທ່ອງທ່ຽວພາຍໃນ ແລະ ພາກພື້ນ; ສຸມໃສ່ໂຄສະນາ-ແນະນໍາ ແລະ ດຶງດູດການທ່ອງທ່ຽວ ດ້ວຍຫຼາຍຮູບຫຼາຍສີຜ່ານສື່ຕ່າງໆ ຮັບປະກັນສິ່ງອໍານວຍຄວາມສະດວກ, ພື້ນຖານໂຄງລ່າງ, ຜະລິດຕະພັນການທ່ອງທ່ຽວ ທີ່ມີຄວາມຫຼາກຫຼາຍ ສົມທົບການມີສ່ວນຮ່ວມຂອງປະຊາຊົນ, ຊຸມຊົນ ແລະ ຄວາມປອດໄພ ໃນການທ່ອງທ່ຽວ.
(ຂ່າວ-ພາບ: ສຳນານ)
ຄໍາເຫັນ