ສະຫາຍ ຄໍາຮູ້ ອ່ອນມະນີ ກໍາມະການພັກແຂວງ ຫົວໜ້າພະແນກການເງິນແຂວງ ໄດ້ຍົກໃຫ້ເຫັນຜົນສໍາເລັດການຈັດເກັບລາຍຮັບດ້ວຍລະບົບທັນສະໄໝໃນໂອກາດປະກອບຄໍາເຫັນ ຕໍ່ກອງປະຊຸມໃຫຍ່ຜູ້ແທນອົງຄະນະພັກແຂວງເຊກອງ ຄັ້ງທີ XI ໃນວັນທີ 28 ສິງຫາວ່າ: ຜ່ານມາ, ພະແນກການເງິນແຂວງໄດ້ເອົາໃຈໃສ່ປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຕິດພັນກັບການສ້າງເສດຖະ ກິດເອກະລາດ ເປັນເຈົ້າຕົນເອງ ໂດຍສຸມໃສ່ສ້າງຄວາມເຂັ້ມແຂງດ້ານການເກັບລາຍຮັບ ແລະ ຄຸ້ມຄອງລາຍຈ່າຍປະຕິບັດມາດຕະການປະຢັດ, ຕ້ານການຟູມເຟືອຍ, ແກ້ໄຂບັນຫາໜີ້ສິນພາຍໃນ ແລະ ສ້າງສະຖຽນລະພາບທາງດ້ານການເງິນ; ປັບປຸງການເກັບລາຍຮັບຕາມທິດຫັນເປັນທັນສະໄໝ ເປັນຕົ້ນວຽກງານພາສີ, ສ່ວຍສາອາກອນ ແລະ ຊັບສິນ; ປັບປຸງໂຄງສ້າງລາຍຮັບ-ລາຍຈ່າຍ, ການປ້ອນຖານຂໍ້ມູນ ແລະ ນຳໃຊ້ເຄື່ອງມືທີ່ທັນສະໄໝເຂົ້າໃນການຄຸ້ມຄອງແບບລວມສູນ, ທົ່ວແຂວງມີຫົວໜ່ວຍທຸລະກິດຢູ່ໃນການຄຸ້ມຄອງທັງໝົດ 1,559 ຫົວໜ່ວຍເຂົ້າໃນລະບົບ Taxris ໄດ້ 87,24% ແລະ ໄດ້ອອກເລກປະຈຳຕົວຜູ້ເສຍອາກອນ (TIN) ໄດ້ 1,360 ຫົວໜ່ວຍ; ຂະຫຍາຍຖານລາຍຮັບບັນດາຫົວໜ່ວຍຈຸນລະວິສາຫະກິດທີ່ມີລາຍຮັບ 400 ລ້ານກີບຂຶ້ນໄປເຂົ້າຢູ່ໃນລະບົບອາກອນມູນຄ່າເພີ່ມ ແລະ ການຊຳລະອາກອນຜ່ານລະບົບ (TAXRIS) ສໍາເລັດໃນທົ່ວແຂວງ ແລະ 4 ຕົວເມືອງ.
ສະຫາຍ ຄໍາຮູ້ ອ່ອນມະນີ ໃຫ້ຮູ້ຕື່ມວ່າ: ໃນ 5 ປີຕໍ່ໝ້າ (2026-2030) ຂະແໜງການເງິນແຂວງຈະສືບຕໍ່ສ້າງຄວາມເຂັ້ມແຂງດ້ານການຈັດເກັບລາຍຮັບ-ຄຸ້ມຄອງລາຍຈ່າຍ; ສ້າງເງື່ອນໄຂອໍານວຍຄວາມສະດວກ ແລະ ສົ່ງເສີມໃຫ້ວິສາຫະກິດທຸກປະເພດຫັນມາຖືບັນຊີທີ່ຖືກຕ້ອງ; ສ້າງກົນໄກ, ລະບົບດໍາເນີນ ແລະ ປະຕິບັດມາດຕະການຢ່າງເດັດຂາດຕໍ່ພະນັກງານລັດ ແລະ ຜູ້ປະກອບການທີ່ເຮັດຜິດລະບຽບວິໄນດ້ານແຜນການ-ການເງິນ; ສູ້ຊົນຈັດເກັບລາຍຮັບເຂົ້າງົບປະມານໃຫ້ໄດ້ 3,542.92 ຕື້ກີບ ແລະ ຄຸ້ມຄອງລາຍຈ່າຍໃຫ້ຢູ່ໃນລະດັບ 2,115.38 ຕື້ກີບ (ບໍ່ລວມເງິນລົງທຶນ); ສ້າງໃຫ້ແຂວງເຊກອງ, ເມືອງດາກຈຶງ ແລະ ເມືອງກະລຶມກ້າວເປັນແຂວງສົມດຸ່ນ, ເກີນດຸ່ນ ແລະ ເປັນເມືອງກຸ້ມຕົນເອງທາງດ້ານງົບປະມານ. ຂ່າວ: ພູວັນ
ຄໍາເຫັນ