ເຂດເສດຖະກິດພິເສດ
 |
ແຂວງສະຫວັນນະເຂດ ແມ່ນນອນໃນ 7 ເແຂວງ (21 ເຂດ) ໃນທົ່ວປະເທດ. ສະເພາະເສດຖະກິດພິເສດ ແຂວງສະຫວັນນະເຂດ ແມ່ນເຂດແຫ່ງທໍາອິດຂອງປະເທດ ສ້າງຕັ້ງໃນປີ 2003 ຕາມເສັ້ນທາງຍຸດທະສາດເລກທີ 9 ໃນເມື່ອກ່ອນ ເບື້ອງຕາເວັນອອກ ແມ່ນເຂດການຄ້າຊາຍແດນ ບ້ານແດນສະຫວັນ ແລະ ເບື້ອງຕາເວັນຕົກ ແມ່ນເຂດເສດຖະກິດພິເສດ (ສະຫວັນ-ເຊໂນ), ປີ 2018 ລັດຖະບານໄດ້ໂຮມ 2 ເຂດເຂົ້າກັນ ຊື່ວ່າ: ເຂດເສດຖະກິດພິເສດ ແຂວງສະຫວັນນະເຂດ ປະກອບມີ 5 ເຂດພັດທະນາ (ເຂດ A, B, C, D ແລະ ເຂດ E) ມີເນື້ອທີ່ທັງໝົດ 4,992 ເຮັກຕາ. ໃນນັ້ນ: ເຂດ A: ມີເນື້ອທີ່ 298 ເຮັກຕາ (ເປັນເຂດການຄ້າ, Free zone ແລະ ການບໍລິການ); ເຂດ B: ມີເນື້ອທີ່ທັງໝົດ 372 ເຮັກຕາ, (ສ້າງເປັນເຂດອຸດສາຫະກຳປຸງແຕ່ງ, ເຂດບໍລິການສາງສິນຄ້າ, ອຸດສາຫະກໍາປະກອບຊິ້ນສ່ວນພາຫະນະ, ສູນບໍລິຫານສ້ອມແປງພາຫະນະ ແລະ ສູນນຳໃຊ້ຊັບພະຍາກອນໝູນວຽນ ແລະ ບຳບັດສິ່ງເສດເຫຼືອຈາກອຸດສາຫະກຳ); ເຂດ C: ມີເນື້ອທີ່ 234 ເຮັກຕາ, (ສ້າງເປັນເຂດອຸດສາຫະກໍາທັນສະໄໝ ແລະ ນໍາໃຊ້ນະວັດຕະກໍາໃໝ່); ເຂດ D: ມີເນື້ອທີ່ 88 ເຮັກຕາ, (ສ້າງເປັນເຂດບ້ານຈັດສັນ, ທຸລະກິດອະສັງຫາລິມະຊັບ, ອະພາດເມັ້ນບໍລິການ, ການເຊົ່າສໍານັກງານຫ້ອງການ ແລະ ທີ່ພັກຂອງຊ່ຽວຊານ ແລະ ພະນັກງານ) ແລະ ເຂດ E: ມີເນື້ອທີ່ 4,000 ເຮັກຕາ, (ສ້າງເປັນເຂດອຸດສາຫະກໍາຫຼອມໂລຫະ, ເຂດບໍລິການໂລຈິດສຕິກ). ກໍາມະບານຮາກຖານເຂດເສດຖະກິດພິເສດ ແຂວງສະຫວັນນະເຂດ ໄດ້ຮັບການສ້າງຕັ້ງຂຶ້ນໃນວັນທີ 7 ເດືອນ 10 ປີ2005 ຊຶ່ງມີຄະນະປະທານກໍາມະບານຮາກຖານທັງໝົດ 7ສະຫາຍ, ຊຶ່ງເປັນຮາກຖານໜຶ່ງຂຶ້ນກັບສະຫະພັນກໍາມະບານແຂວງສະຫວັນນະເຂດ.
 |
ຕະຫຼອດໄລຍະ 5 ປີຜ່ານມາ (2021-2025) ສາມາດດຶງດູດເອົາການລົງທຶນ ທັງພາຍໃນ ແລະ ຕ່າງປະເທດ ໄດ້ຈໍານວນ 48 ວິສາຫະກິດ ມູນຄ່າການລົງທຶນ 101.81 ລ້ານໂດລາ, ທຶນຈົດທະບຽນ 70.96 ລ້ານໂດລາ. ມາຮອດປັດຈຸບັນ ມີບັນດາບໍລິສັດທີ່ຍັງເຄື່ອນໄຫວປົກກະຕິ ຈໍານວນ 100 ວິສາຫະກິດ ມູນຄ່າການລົງທຶນ 223 ລ້ານໂດລາ; ສາມາດສ້າງວຽກເຮັດງານທໍາ ໃນປີ 2025 ມີຈໍານວນແຮງງານທັງໝົດ ຈໍານວນ 6,605 ຄົນ: ໃນນັ້ນ: ແຮງງານຄົນລາວ ຈໍານວນ 6,113 ຄົນ ກວມ 92.55% (ແຮງງານຕ່າງແຂວງ ຈໍານວນ 1,003 ສະຫາຍ ກວມ 15.18%) ແລະ ຕ່າງປະເທດ ຈໍານວນ 492 ສະຫາຍ ກວມ 7.45% (ແມ່ນຊ່າງເຕັກນິກ ເຂົ້າມາບາງຄັ້ງຄາວ); ໃນ 5 ປີຜ່ານມາ ສາມາດສ້າງແຮງງານທົ່ວໄປ ຂຶ້ນເປັນຫົວໜ້າໜ່ວຍງານ ໄດ້ 248 ຕໍາແໜ່ງງານ; ມີການກວດສຸຂະພາບແຮງງານ ປະຈໍາປີ, ມີບັນດາບໍລິສັດຈໍານວນໜຶ່ງ ໄດ້ມີນະໂຍບາຍໃຫ້ພະນັກງານ ພັກການ 2 ອາທິດ ໃນໄລຍະ (ດໍານາ ແລະ ກ່ຽວເຂົ້າ) ໂດຍບໍ່ຕັດເງິນເດືອນ; ກໍາມະບານຮາກຖານເຂດເສດຖະກິດພິເສດແຂວງສະຫວັນນະເຂດ ໄດ້ຮັບການຝຶກອົບຮົມຈາກທີມງານສູນກາງສະຫະພັນກໍາມະບານລາວ ແລະ ສະຫະພັນກໍາມະບານແຂວງສະຫວັນນະເຂດກ່ຽວກັບພາລະບົດບາດ, ສິດ ແລະ ໜ້າທີ່ຂອງສະຫະພັນກໍາມະບານລາວ ໂດຍສະເພາະແມ່ນກໍາມະບານຮາກຖານ, ການປະຕິບັດພາລະບົດບາດໃນການເປັນຕົວແທນປົກປ້ອງສິດ ແລະ ຜົນປະໂຫຍດອັນຊອບທໍາ ຂອງສະມາຊິກກໍາມະບານ ແລະ ຜູ້ອອກແຮງງານ; ສາມາດຂະຫຍາຍການສ້າງຕັ້ງໜ່ວຍກໍາມະບານ ໄດ້ 1 ບໍລິສັດ, ມີສະມາຊິກກໍາມະບານ ຈໍານວນ 7 ສະຫາຍ; ປັດຈຸບັນ ກໍາມະບານຮາກຖານເຂດເສດຖະກິດພິເສດ ແຂວງສະຫວັນນະເຂດ ປະກອບມີ 2 ໜ່ວຍຂຶ້ນກັບ, ມີຈໍານວນສະມາຊິກກຳມະບານທັງໝົດ 52 ສະຫາຍ ຍິງ 22 ຫາຍ ແລະ ສາມາດ ສ້າງຕັ້ງຜູ້ຕາງໜ້າອອກແຮງງານ ໄດ້ 8 ບໍລິສັດ, ມີຜູ້ຕາງໜ້າຜູ້ອອກແຮງງານທັງໝົດ ຈໍາວນ 33 ຫາຍ.
 |
ຄໍາເຫັນ