 |
ເນື່ອງໃນໂອກາດວັນສ້າງຕັ້ງສື່ມວນຊົນ ແລະ ການພິມຈໍາໜ່າຍ ຄົບຮອບ 75 ປີ (13/8/1950 - 13/8/2025) ແລະ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 65 ປີ (13/8/1960 - 13/8/2025) ທ່ານ ບົວໄລ ພານຸວົງ ຜູ້ອໍານວຍການໃຫຍ່ວິທະຍຸກະຈາຍສຽງແຫ່ງຊາດລາວໄດ້ໃຫ້ສໍາພາດຜ່ານສື່ມວນຊົນໃນວັນທີ 5 ສິງຫາຜ່ານມາທີ່ ວສລ ວ່າ: ວສລ ເປັນພາຫະນະສື່ມວນຊົນໜຶ່ງທີ່ສໍາຄັນໃນການເຮັດໜ້າທີ່ໂຄສະນາເຜີຍແຜ່ແນວທາງນະໂຍບາຍຂອງພັກ-ລັດ. ທ່ານຍັງຍົກໃຫ້ເຫັນຄວາມໝາຍ-ຄວາມສໍາຄັນມູນເຊື້ອແຫ່ງການກໍາເນີດເຕີບໃຫຍ່ຂະຫຍາຍຕົວໃນແຕ່ລະໄລຍະຂອງວັນດັ່ງກ່າວຕະຫຼອດໄລຍະຜ່ານມາ. ມາຮອດວັນທີ 23 ມີນາ 2003 ວິທະຍຸກະຈາຍສຽງແຫ່ງຊາດລາວໄດ້ຂຶ້ນເວັບໄຊຂອງຕົນເອງ www.lnr.org.la, ວັນທີ 18 ກໍລະກົດ 2008 ໄດ້ສຳເລັດການຕິດຕັ້ງລະບົບວິທະຍຸອອນລາຍ FM Online ຜ່ານເວັບໄຊດັ່ງກ່າວ ແລະ ສືບຕໍ່ພັດທະນາເວັບໄຊຮອງຮັບການກະຈາຍສຽງທັງ 3 ຄື້ນຄວາມຖີ່ຄື: AM 567 Khz, FM 103,7 Mhz ແລະ FM 94,3 Mhz. ເພື່ອເຮັດໃຫ້ຂໍ້ມູນຂ່າວສານສົ່ງເຖິງປະຊາຊົນຢູ່ພາຍໃນ ແລະ ຕ່າງປະເທດໄດ້ດີກ່ວາເກົ່າ ວສລ ໄດ້ສ້າງສະຖານີເຄືອຂ່າຍສົ່ງສັນຍານຕໍ່ຢູ່ 4 ເຂດຢູ່ແຂວງຫຼວງພະບາງ, ຈໍາປາສັກ, ອຸດົມໄຊ ແລະ ແຂວງສະຫວັນນະເຂດ ດ້ວຍການຊ່ວຍເຫຼືອຂອງລັດຖະບານ ສສ ຫວຽດນາມ. ດ້ານເຕັກນິກການກະຈາຍສຽງໄດ້ປັບປຸງສະຖານີເຄື່ອງສົ່ງທີ່ມີຄືນໃໝ່ຄື: ຄື້ນສັ້ນ SW ຍົກຄວາມແຮງຈາກ 10 ກິໂລວັດ ເປັນ 50 ກິໂລວັດ, ຄື້ນກາງ AM ຈາກ 150 ກິໂລວັດເປັນ 200 ກິໂລວັດ ແລະ ໄລຍະນີ້ຍັງໄດ້ສ້າງສະຖານີວິທະຍຸ FM ຂຶ້ນຕື່ມອີກ 1 ແຫ່ງ ຄວາມຖີ່ 94,3 Mhz ແຮງສົ່ງ 2 ກິໂລວັດ ສາມາດກະຈາຍສຽງກວມພື້ນທີ່ 80-90% ຂອງປະເທດ ແລະ ກວມເອົາ 90% ຂອງພົນລະເມືອງ, ກະຈາຍສຽງພ້ອມກັນ 4 ສະຖານີ ມີ 141 ລາຍການ ອອກອາກາດ 48 ຊົ່ວໂມງຕໍ່ມື້.
 |
ທ່ານ ບົວໄລ ພານຸວົງ ກ່າວຕື່ມວ່າ: ໃນໄລຍະ 1 ປີຜ່ານມາ, ວສລ ມີຫຼາຍວຽກງານທີ່ໄດ້ຮັບການປັບປຸງ ເປັນຕົ້ນໄດ້ປັບປຸງພື້ນຖານໂຄງລ່າງຈໍານວນໜຶ່ງເຊັ່ນ: ຫ້ອງເຮັດວຽກ, ຫ້ອງຕັດຕໍ່, ຫ້ອງອັດສຽງ, ຫ້ອງສະຕູດີໂອ, ຫ້ອງອອກອາກາດ. ໄດ້ຊື້ຈັກໄຟຟ້າສໍາຮອງໃຫ້ມີຄວາມຮັບປະກັນໃນການອອກອາກາດ, ມີການປັບປຸງກົນໄກການປະສານງານລະບົບເອກະສານໂດຍເລັ່ງໃສ່ຝຶກອົບຮົບ, ໄດ້ມີການຝຶກອົບຮົມກ່ຽວກັບການປະດິດແຕ່ງບົດກອນ, ກະວີເພື່ອສຸມໃສ່ໃນການພັດທະນາວຽກງານວິທະຍຸ, ສຸມໃສ່ພັດທະນາເຕັກໂນໂລຊີຫັນປ່ຽນບັນດາລາຍການວິທະຍຸໃຫ້ມີພາບເຄື່ອນໄຫວໄປພ້ອມ. ປັດຈຸບັນ ໄດ້ອັດລາຍການຕ່າງໆ ອອກອາກາດທັງໝົດ 1,421 ຊົ່ວໂມງ, ສົ່ງລາຍການອອກອາກາດໃນລະບົບ AM ແລະ FM ໄດ້ 12,700 ຊົ່ວໂມງ, ກະຈາຍສຽງອອກອາກາດຄື້ນ FM 93 MHz ວິທະຍຸກະຈາຍສຽງແຫ່ງປະເທດຈີນ (CMG ) ຈໍານວນ 6,935 ຊົ່ວໂມງ, ມີເພສເຟສບຸກ, ຢູທູບ, ເວັບໄຊ ເພື່ອໃຫ້ຜູ້ອ່ານ-ຜູ້ຊົມ, ຜູ້ຟັງໄດ້ຊົມ, ເບິ່ງຜ່ານທາງມືຖືໄດ້ຢ່າງວ່ອງໄວ. ສໍາລັບດ້ານກົງຈັກການຈັດຕັ້ງກໍໄດ້ຄົ້ນຄວ້າປັບປຸງໄປຕາມທິດຊີ້ນໍາໂດຍສະເພາະໄດ້ໂອນວຽກງານສື່ມວນຊົນ, ຖະແຫຼງຂ່າວໄປຂຶ້ນກັບຄະນະໂຄສະນາອົບຮົມສູນກາງພັກ ເພື່ອໃຫ້ສອດຄ່ອງກັບຄວາມຮຽກຮ້ອງຕ້ອງການໃນໜ້າທີ່ວຽກງານໄລຍະໃໝ່, ໄດ້ມີການຄົ້ນຄວ້າຜັງລາຍການຄືນໃໝ່ໂດຍສະເພາະລາຍການພາຍໃນ, ລາຍການຄູ່ຮ່ວມມືອັນໃດທີ່ຍັງບໍ່ເໝາະສົມກໍໄດ້ຕັດອອກ. ພ້ອມນັ້ນ, ຍັງໄດ້ຜະລິດລາຍການໃໝ່ຈໍານວນໜຶ່ງມາທົດແທນ ແລະ ຍັງຈະໄດ້ມີການຈັດສັນລະບົບໃນການອອກອາກາດລະຫວ່າງ 103,7 Mhz ໄດ້ປັບປຸງໃຫ້ດີຂຶ້ນ ແລະ ຈະໄດ້ມີການຖ່າຍທອດອອກທາງຄື້ນ 94, ຄື້ນ 95 ຕື່ມອີກ. ພ້ອມນີ້, ກໍໄດ້ປັບປຸງກົນໄກການຕະຫຼາດເພື່ອເຮັດແນວໃດດຶງດູດລູກຄ້າສາມາດສ້າງລາຍຮັບວິຊາການພາຍໃນວິທະຍຸໃຫ້ຫຼາຍຂຶ້ນ. ພ້ອມດຽວກັນນີ້, ເລັ່ງໃສ່ປັບປຸງ ເພສຂອງວິທະຍຸຂຶ້ນຕື່ມ. ຜ່ານມາມີຜູ້ເຂົ້າຊົມ 174,000 ກວ່າຄົນ ແຕ່ຍັງຕ້ອງບຸກບືນ ແລະ ພັດທະນາຕື່ມອີກໃນຕໍ່ໜ້າ.
 |
ໃນໂອກາດວັນສ້າງຕັ້ງສື່ມວນຊົນ ແລະ ການພິມຈໍາໜ່າຍ ຄົບຮອບ 75 ປີ ແລະ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 65 ປີ ຜູ້ອໍານວຍການໃຫຍ່ວິທະຍຸກະຈາຍສຽງແຫ່ງຊາດລາວໄດ້ຕາງໜ້າໃຫ້ຄະນະພັກ, ຄະນະອຳນວຍການ ແລະ ພະນັກງານ ວສລ ທັງໝົດ, ຂໍສະແດງຄວາມກະຕັນຍູຮູ້ບຸນຄຸນຢ່າງເລິກເຊິ່ງຕໍ່ພັກ-ລັດທີ່ໄດ້ເອົາໃຈໃສ່ນຳພາ-ຊີ້ນຳຮອບດ້ານ ເຮັດໃຫ້ ວສລ ມີການເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ ສາມາດຮັບໃຊ້ໜ້າທີ່ການເມືອງຂອງພັກ-ລັດໃນສະໜາມຮົບແນວຄິດການເມືອງ ແລະ ວັດທະນະທຳ-ສັງຄົມໄດ້ເປັນຢ່າງດີ ແລະ ຂໍສະແດງຄວາມຂອບໃຈຕໍ່ເພື່ອນຮ່ວມງານທຸກພາກສ່ວນທັງພາຍໃນ ແລະ ຕ່າງປະເທດທີ່ໄດ້ສະໜັບສະໜູນຊ່ວຍເຫຼືອການປະຕິບັດໜ້າທີ່ຂອງພວກເຮົາມີຜົນສຳເລັດຕະຫຼອດມາ; ວສລ ຍັງຈະສືບຕໍ່ສຸມໃສ່ພັດທະນາຕົນເອງຮອບດ້ານ ເພື່ອໃຫ້ກາຍເປັນສື່ທີ່ທັນສະໄໝສະໜອງຂໍ້ມູນຂ່າວສານໃຫ້ວ່ອງໄວ ແລະກວ້າງຂວາງຍິ່ງຂຶ້ນ.
ຄໍາເຫັນ