 |
ທ່ານ ສົມລິດ ພັນທຸວົງ ຄະນະຮັບຜິດຊອບວຽກງານກອງທຶນຊ່ວຍເຫຼືອເຊີ່ງກັນ ແລະ ກັນ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານ ໄລຍະ 9 ເດືອນຜ່ານມາ, ຕີລາຄາດ້ານຕັ້ງໜ້າ, ບັນດາຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້ ເພື່ອນໍາໄປສືບຕໍ່ຜັນຂະຫຍາຍຈັດຕັ້ງປະຕິບັດໃນຕໍ່ໜ້າ. ທົ່ວແຂວງສາລະວັນ ມີສະມາຊິກກຳມະບານທັງໝົດ 3,121 ຄົນຍິງ 1,426 ຄົນ.ໃນນັ້ນ, ຂະຫຍາຍໃໝ່ໃນ 9 ເດືອນ ປີ 2025 ມີ156 ຄົນຍິງ 74, ເງິນກອງທືນ ຍົກມາຈາກປີ 2024 ຈໍານວນ 203 ລ້ານກວ່າກີບ, ຮັບໃນໄລຍະ 9 ເດືອນ ປີ 2025ຈາກສະຫະພັນກຳມະບານເມືອງ, ສະຫະພັນກຳມະບານພະແນກການ ແລະ ກຳມະບານຮາກຖານອ້ອມຂ້າງແຂວງ ທັງໝົດ238 ລ້ານກວ່າກີບ ລວມທັງໝົດ 441 ລ້ານກວ່າກີບ. ໄດ້ປະຕິບັດນະໂຍບາຍຕໍ່ສະມາຊິກ ຈໍານວນ 214 ລ້ານກວ່າກີບ ເປັນຕົ້ນ: ນະໂຍບາຍໃນກໍລະນີຕ່າງໆ ເຊັ່ນ: ສະມາຊິກເກີດລູກ, ນອນໂຮງໝໍ, ຜ່າຕັດກາງ-ໃຫຍ່ ແລະ ນະໂຍບາຍສະມາຊິກເສຍຊີວິດ ຈຳນວນ 171 ລ້ານກວ່າກີບ, ເງິນກອງທຶນຍັງເຫຼືອຕົວຈິງ 226 ລ້ານກວ່າກີບ.
ສໍາລັບທິດທາງແຜນການ 3 ເດືອນ ທ້າຍປີ 2025 ແມ່ນສືບຕໍ່ເອົາໃຈໃສ່ຄົ້ນຄວ້າເຊື່ອມຊຶມເຜີຍແຜ່ຂໍ້ກໍານົດ-ກົດລະບຽບຂອງກອງທຶນ ແລະ ວຽກງານທີ່ກ່ຽວຂ້ອງໃນເຊີ່ງເລີກ, ປຸກລະດົມຂົນຂວາຍສະມາຊິກກຳມະບານ ເຂົ້າເປັນສະມາຊິກກອງທຶນ ໃຫ້ໄດ້ 800 ກວ່າຄົນ, ເອົາໃຈໃສ່ສະຫຼຸບລາຍຮັບ-ລາຍຈ່າຍ, ໜີ້ສິນຄ້າງມອບ ໃຫ້ລະອຽດ ພ້ອມທັງເອົາໃຈໃສ່ຕິດຕາມ, ກວດກາ ແລະ ຄຸ້ມຄອງເງິນກອງທຶນຂອງສະມາຊິກກຳມະບານແຕ່ລະຂັ້ນ ໃຫ້ມີຄວາມຊັດເຈນ, ຖືກຕ້ອງ ແລະ ພາວະວິໃສ.
ຈາກນັ້ນ, ຜູ້ເຂົ້າຮ່ວມ ກໍໄດ້ປະກອບຄໍາຄິດເຫັນ, ແລກປ່ຽນ ກ່ຽວກັບການຈັດຕັ້ງປະຕິບັດວຽກງານ ໂດຍສະເພາະຂອດການປະສານງານ ລະຫວ່າງຄະນະຮັບຜິດຊອບ ກັບ ບັນດາສະຫະພັນ, ຮາກຖານກໍາມະການອ້ອມຂ້າງ, ການອໍານວຍຄວາມສະດວກໃນການນໍາໃຊ້ທຶນ ໃນກໍລະນີ ແລະ ເງື່ອນໄຂຕ່າງໆ ໃຫ້ທ່ວງທັນເວລາ ແລະ ດ້ານອື່ນໆຕື່ມອີກ ເພື່ອປັບປຸງ, ແກ້ໄຂຂໍ້ຄົງຄ້າງ ແນໃສ່ເຮັດໃຫ້ການຈັດຕັ້ງປະຕິບັດວຽກງານກອງທຶນຊ່ວຍເຫຼືອເຊີ່ງກັນ ແລະ ກັນ ໃຫ້ມີປະສິດທິຜົນ.
(ຂ່າວ-ພາບ: ວິໄລວອນ ສິດທິໄຊ)
ຄໍາເຫັນ