9 ເດືອນຜ່ານມາ ຄະນະບໍລິຫານງານພັກເມືອງນໍ້າບາກ ສຸມໃສ່ຈັດຕັ້ງປະຕິບັດວຽກງານຫຼາຍດ້ານ

ໃນພິທີ ໄດ້ມີການຜ່ານບົດຕີລາຄາ ການນຳພາ-ຊີ້ນຳວຽກງານຮອບດ້ານ ໄລຍະ 9 ເດືອນຕົ້ນປີ ແລະ ທິດທາງແຜນການ 3 ເດືອນທ້າຍປີ 2025, ພາຍໃຕ້ການນຳພາ-ຊີ້ນຳຂອງຄະນະບໍລິຫານງານພັກເມືອງ, ຄະນະພັກແຕ່ລະຂັ້ນ, ທີ່ມີຄວາມສາມັກຄີ ທີ່ເປັນເອກະພາບ, ຄວາມຕັ້ງໜ້າບຸກບືນ, ຄວາມຮັບຜິດຊອບສູງຕໍ່ໜ້າທີ່ວຽກງານ ແລະ ການຊວ່ຍເຫຼືອຈາກຫຼາຍພາກສ່ວນ ເຮັດໃຫ້ການນຳພາ-ຊີ້ນຳວຽກງານ ສາມາດຍາດໄດ້ຜົນສຳເລັດຫຼາຍດ້ານ ເປັນຕົ້ນ ຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ, ຂົງເຂດເສດຖະກິດ, ວັດທະນະທຳ-ສັງຄົມ, ວຽກງານພົວພັນຕ່າງປະເທດ, ຂົງເຂດລະບົບການເມືອງ ແລະ ອົງການຈັດຕັ້ງມະຫາຊົນ; ສ້າງທ່ວງທ່າໃໝ່ ໃຫ້ແກ່ການພັດທະນາເມືອງໄປຕາມທິດທາງທີ່ອົງຄະນະພັກເມືອງໄດ້ວາງໄວ້. ຈາກນັ້ນ, ໄດ້ຮັບຟັງການລາຍງານ ການກະກຽມປັບປຸງກົງຈັກການຈັດຕັ້ງຂັ້ນເມືອງ ຕາມມະຕິ 03 ຂອງຄະນະບໍລິຫານງານສູນກາງພັກ, ການລາຍງານກ່ຽວກັບການຕິດຕາມ, ການຮ່ວມຊີວິດພັກ, ການສ້າງໜ່ວຍພັກປອດໃສ, ເຂັ້ມແຂງໜັກແໜ້ນ ໃຫ້ຮັບປະກັນທາງດ້ານຄຸນນະພາບ; ການລາຍງານວິທີການ ແລະ ມາດຕະການ ການຈັດຕັ້ງປະຕິບັດບັນດາຄາດມາຍ ຂອງວຽກງານການສຶກສາ ໃຫ້ມີຄຸນນະພາບ ຕິດພັນກັບ ການຄຸ້ມຄອງໂຮງຮຽນເອກະຊົນ, ການສ້າງໂຮງຮຽນຕົວແບບ; ລາຍງານການຄຸ້ມຄອງດິນ, ການອອກໃບຕາດິນ. ການແກ້ໄຂຂໍ້ຂັດແຍ່ງທີ່ດິນ ແຕ່ລະປະເພດ, ການຄຸ້ມຄອງຊື້-ຂາຍລາຄາສິນຄ້າ, ການນຳເຂົ້າ, ການຈຳໜ່າຍໃນທ້ອງຕະຫຼາດ, ມາດຕະການຕໍ່ຜູ້ລະເມີດ ເພື່ອຄວາມເປັນທຳຂອງຜູ້ບໍລິໂພກ ແລະ ຮັບຟັງການລາຍງານ ການກະກຽມປະກາດ 3 ບ້ານຂອງເມືອງນ້ຳບາກ ເປັນບ້ານສີສັນຕົວເມືອງນ້ອຍໃນຊົນນະບົດ.

(ຂ່າວ: ພອນສັກ ສິງດາລັກ)