ອາກາດຮ້ອນສົ່ງຜົນກະທົບຕໍ່ສຸຂະພາບຂອງຄົນເຮົາຫຼາຍຢ່າງ

ໂດຍ: ວັນເພັງ
ອາກາດຮ້ອນສົ່ງຜົນກະທົບຕໍ່ສຸຂະພາບຂອງຄົນເຮົາຫຼາຍຢ່າງ, ທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ໄດ້ໃຫ້ສຳພາດຕໍ່ສື່ມວນຊົນໃນວັນທີ 3 ພຶດສະພາຜ່ານມາວ່າ: ປັດຈຸບັນສປປ ລາວອາກາດຮ້ອນເອົ້າມີຄວາມບອບບາງຕໍ່ການປ່ຽນແປງຂອງດິນຟ້າອາກາດ, ມີສະພາບອາກາດຮ້ອນ ແລະ ແຫ້ງແລ້ງຂຶ້ນ. ສະນັ້ນ, ອາກາດຮ້ອນເປັນສິ່ງທ້າທາຍດ້ານສຸຂະພາບລວມທັງຄວາມສ່ຽງເພີ່ມຂຶ້ນຂອງພະຍາດໄຂ້ຍຸງ, ພະຍາດຖອກທ້ອງ, ຄວາມກົດດັນຈາກຄວາມຮ້ອນ ແລະ ຂາດເຂີນທາງດ້ານພື້ນຖານໂຄງລ່າງດ້ານນໍ້າ ແລະ ສຸຂາພິບານ ແລະ ອື່ນໆ.ໃນນັ້ນ, ອາກາດຮ້ອນຍັງສົ່ງຜົນກະທົບຕໍ່ສຸຂະພາບຂອງຄົນເຮົາທຸກເພດທຸກໄວ ໂດຍສະເພາະກຸ່ມຄົນທີ່ມີຄວາມສ່ຽງເປັນຕົ້ນຜູ້ອາຍຸສູງ, ເດັກນ້ອຍ, ແມ່ຍິງຖືພາ, ຄົນທີ່ເຮັດວຽກກາງແຈ້ງ ແລະ ຄົນທີ່ມີພະຍາດປະຈຳຕົວ ຊຶ່ງມີໂອກາດສູງທີ່ຈະໄດ້ຮັບຜົນກະທົບຈາກອາກາດທີ່ຮ້ອນເອົ້າອາດຮຸນແຮງເຖິງຂັ້ນເສຍຊີວິດໄດ້.
ສຳລັບອາກາດຮ້ອນໄດ້ສົ່ງຜົນກະທົບຕໍ່ສຸຂະພາບຂອງຄົນເຮົາເຊັ່ນ: ຄວາມດັນເລືອດສູງ, ຫົວໃຈ, ເບົາຫວານ, ຄວາມດັນ,ໄຂມັນໃນເລືອດສູງ ເປັນຕົ້ນຜູ້ມີນໍ້າໜັກຕົວຫຼາຍ, ຜັກຜ່ອນບໍ່ພຽງພໍ, ຜູ້ເຮັດວຽກກາງແຈ້ງ. ພ້ອມນັ້ນ, ຜູ້ດື່ມແອວກໍຮໍຈະເຮັດໃຫ້ເສັ້ນເລືອດຢູ່ບໍລິເວນກ້ອງຜິວໜັງຂະຫຍາຍຕົວຫຼາຍຂຶ້ນ ເຮັດໃຫ້ຮ່າງກາຍສູນເສຍນໍ້າ ແລະ ແຮ່ທາດສູງກ່ວາຄົນບໍ່ໄດ້ດື່ມ.ພ້ອມນັ້ນ, ຖ້າອາກາດຮ້ອນຫຼາຍແອວກໍຮໍ ຈະຖືກດູດຊຶມເຂົ້າກະແສເລືອດຢ່າງໄວ ແລະ ອອກລິດກະຕຸ້ນຫົວໃຈໃຫ້ບີບເລືອດຫຼາຍຂຶ້ນ ມີຜົນເຮັດໃຫ້ຄວາມດັນເລືອດສູງ, ຫົວໃຈເຮັດວຽກໜັກເພາະຕ້ອງເຮັດໃຫ້ເລືອດໄປລ້ຽງທົ່ວຮ່າງກາຍ ອາດມີອາການຊັອກແລະ ອັນຕະລາຍເຖິງຊີວິດໄດ້. ໃນນັ້ນ,ອາກາດຮ້ອນສູງຍັງເຮັດໃຫ້ມີຜື່ນແດງຕາມຜິວໜັງຫຼາຍພາກສ່ວນຂອງຮ່າງກາຍ, ບາງກໍລະນີເປັນຕຸ່ມແດງ ຫຼືອັກເສບຮູຂົນ, ມີບວມຕາມຕີນ ເກີດຈາກເສັ້ນເລືອດບໍລິເວນຜິວໜັງຂະຫຍາຍຕົວເຮັດໃຫ້ບວມເປັນຕະຄິວ, ເກີດຈາກກ້າມຊີ້ນຫົດຕົວກະທັນຫັນເປັນຕົ້ນແຂນ, ຂາ ແລະ ທ້ອງ ຊຶ່ງພົບຜູ້ເຮັດກິດຈະກຳ ຫຼືອອກກຳລັງກາຍໜັກຢູ່ກາງແຈ້ງ ເຮັດໃຫ້ຮ່າງກາຍຂາດນໍ້າ ແລະ ເກືອແຮ່ເປັນລົມ. ຖ້າອຸນຫະພູມຮ່າງກາຍຮ້ອນເກີນໄປຈະເກີດມີອາການລົມແດດ/ເມົາແດດ/ເປັນລົມ (Heatstroke) ເປັນພາວະທີ່ຮ່າງກາຍເຂົ້າຂັ້ນວິກິດບໍ່ສາມາດປັບຕົວ ຫຼືຄວບຄຸມລະດັບຄວາມຮ້ອນໃນຮ່າງກາຍໄດ້ເຮັດໃຫ້ອຸນຫະພູມຮ່າງກາຍສູງຂຶ້ນເລື້ອຍໆເກີດມີອາການເຈັບຫົວ, ວິນຫົວ, ລາຍຕາ,ຊັກ, ບໍ່ຮູ້ສຶກຕົວ, ຫົວໃຈເຕັ້ນຜິດປົກກະຕິ, ຊັອກ, ຖ້າປະໄວ້ ຫຼືບໍ່ມີວິທີລະບາຍຄວາມຮ້ອນອອກເກີນ 2 ຊົ່ວໂມງຈະສົ່ງຜົນກະທົບຮ້າຍແຮງຕໍ່ຫົວໃຈ, ສະໝອງ, ໄຂ່ຫຼັງ ແລະ ກ້າມຊີ້ນ ຖ້າປິ່ນປົວຊ້າອາດເສຍຊີວິດໄດ້. ສຳລັບສັນຍານເຕືອນຕົວຮ້ອນ, ອຸນຫະພູມຮ່າງກາຍສູງກວ່າ 40 ອົງສາຜິວໜັງແຫ້ງ ແລະ ຕົວຮ້ອນຂຶ້ນເລື້ອຍໆ ແຕ່ບໍ່ມີເຫື່ອອອກ, ຄວາມດັນເລືອດຫຼຸດລົງ, ຫົວໃຈ ແລະ ກຳມະຈອນເຕັ້ນໄວ, ຫິວນໍ້າ,ເຈັບຫົວ, ວິນຫົວ, ມືນງົງ, ໜ້າມືດປວດຮາກ, ຮາກອາດເຖິງຂັ້ນຊັກ ແລະ ເສຍສະຕິ. ສະນັ້ນ, ການປະຕິບັດຖ້າພົບຄົນອ້ອມຂ້າງຮູ້ສຶກບໍ່ສະບາຍເຊັ່ນ: ມີອາການລົມແດດ ຄວນເບິ່ງແຍງໃຫ້ດີກ່ອນນໍາສົ່ງໂຮງໝໍຮີບຮ້ອນເອົາຄົນເຈັບເຂົ້າພັກຜ່ອນໃນສະພາບແວດລ້ອມທີ່ມີຮົ່ມ, ມີອາກາດປອດໂປ່ງບໍ່ໃຫ້ຖືກແສງແດດ ເພື່ອໃຫ້ອຸນຫະພູມຮ່າງກາຍຫຼຸດລົງນອນພຽງຍົກຕີນສູງຂຶ້ນທັງ 2 ເບື້ອງເພື່ອໃຫ້ເລືອດໄປລ້ຽງສະໝອງໄດ້ດີແກ້ເສື້ອໃຫ້ຫຼົມໆ ເພື່ອລະບາຍຄວາມຮ້ອນໃຫ້ໄວ, ຄວນໃຊ້ຜ້າຈຸບນໍ້າເຢັນເຊັດຕາມໜ້າຜາກ, ຊອກຄໍ, ຕົວ, ຮັກແຮ້, ກົກຂາ, ໃຊ້ພັດລົມຫຼືວີຊ່ວຍເພື່ອລະບາຍຄວາມຮ້ອນ ເພື່ອໃຫ້ອຸນຫະພູມຮ່າງກາຍຫຼຸດລົງໄວ, ຖ້າຍັງມີສະຕິສາມາດດື່ມນໍ້າໄດ້ ແລ້ວນຳສົ່ງໂຮງໝໍໃຫ້ໄວທີ່ສຸດ. 
ທ່ານ ໄພວັນ ແກ້ວປະເສີດ ກ່າວຕື່ມວ່າ: ເພື່ອປ້ອງກັນຕົນເອງຈາກຜົນກະທົບຂອງອາກາດຮ້ອນ ຄວນຫຼີກລ່ຽງການອອກໄປນອກເຮືອນໃນໄລຍະ 10:00 ໂມງ-16:00 ໂມງ ເນື່ອງຈາກໄລຍະນີ້ລັງສີ UV ຫຼາຍທີ່ສຸດ ອາດເປັນອັນຕະລາຍຕໍ່ຜິວໜັງ ແລະ ສຸຂະພາບ. ຖ້າເປັນໄປໄດ້ຄວນງົດການເຮັດກິດຈະກຳໜັກໆກາງແຈ້ງອາກາດຮ້ອນໆ, ດື່ມນໍ້າສະອາດໃຫ້ຫຼາຍຂຶ້ນເພື່ອປ້ອງກັນຮ່າງກາຍຂາດນໍ້າ, ຮ່າງກາຍອ່ອນເພຍ, ຄວນຫຼີກລ່ຽງການດື່ມນໍ້າເຢັນໆຫຼືເຢັນໂພດ, ຫຼີກລ່ຽງເຄື່ອງດື່ມທີ່ມີນໍ້າຕານສູງ, ທາດເຫຼົ້າ ຫຼື ສານຄາເຟອິນສູງ, ກິນອາຫານຢ່າງລະມັດລະວັງ ເນັ້ນອາຫານທີ່ປຸງແຕ່ງໃໝ່ເພື່ອຫຼີກລ່ຽງອາຫານເປັນພິດ, ອາການຖອກທ້ອງຈາກການເຕີບໂຕຂອງພະຍາດ,ໝາກໄມ້ຫຼາຍປະເພດຊ່ວຍຫຼຸດຄວາມຮ້ອນ, ອອກກໍາລັງກາຍພໍດີບໍ່ຄວນອອກກໍາລັງກາຍໜັກຈົນເກີນໄປ ເພາະອາກາດຮ້ອນຈະເຮັດໃຫ້ຮ່າງກາຍລະບາຍຄວາມຮ້ອນບໍ່ທັນ ແລະ ອອກຊີເຈນບໍ່ພຽງພໍ, ຄວນເລືອກກິດຈະກຳເບົາໆເຊັ່ນ: ຍ່າງ ຫຼື ໂຢຄະຕອນແລງ, ພັກຜ່ອນໃຫ້ພຽງພໍ. ໃນນັ້ນ, ສໍາລັບຜູ້ເຮັດວຽກເພື່ອຮັກສາລະບົບຕ່າງໆຂອງຮ່າງກາຍໃຫ້ເຮັດວຽກປົກກະຕິ ຮັກສາອຸນຫະພູມຂອງຮ່າງກາຍອາກາດຮ້ອນອາດເຮັດໃຫ້ຮ່າງກາຍອ່ອນເພຍ ແລະ ມີເຫື່ອອອກຫຼາຍຂຶ້ນ ຄວນອາບນໍ້າເຢັນ ຫຼືໃຊ້ຜ້າຈຸ່ມນໍ້າເຢັນທຳມະດາເຊັດຕາມໜ້າ ແລະ ຮ່າງກາຍ, ສວມໃສ່ເຄື່ອງນຸ່ງໃຫ້ເໝາະສົມ, ເສື້ອຜ້າສາມາດດູດຊັບເຫື່ອ ແລະ ລະບາຍຄວາມຮ້ອນໄດ້ດີໃສ່ສະບາຍບໍ່ຮັດຈົນເກີນໄປເຊັ່ນ: ຜ້າຝ້າຍ, ຜ້າຊາຕິນມີນໍ້າໜັກເບົາ.ສິ່ງສຳຄັນເວລາອອກຖືກແສງແດດຄວນຕິດຕາມເບິ່ງອາການຄົນອ້ອມຂ້າງ ແລະ ສະມາຊິກໃນຄອບຄົວເປັນປະຈຳ.
ຢ່າງໃດກໍຕາມ ການຮັບມືກັບອາກາດຮ້ອນຖືເປັນສິ່ງຈໍາເປັນ ແລະ ສໍາຄັນເພື່ອປ້ອງກັນອັນຕະລາຍທີ່ອາດຈະເກີດຂຶ້ນ.ດັ່ງນັ້ນ, ຄວນລະມັດລະວັງ ແລະ ຮັກສາສຸຂະພາບໃຫ້ດີໃນເວລາທີ່ມີອາກາດຮ້ອນຫຼາຍ ຈຶ່ງຈະເຮັດໃຫ້ບໍ່ເກີດຜົນກະທົບຕ່າງໆຕໍ່ສຸຂະພາບຂອງທ່ານ ແລະ ຄົນໃນຄອບຄົວ.