ໃນງານວາງສະແດງສິນຄ້ານຳເຂົ້າສາກົນຈີນຄັ້ງທຳອິດປີ 2018, ບໍລິສັດໂດເຕີຣາ ທີ່ເປັນວິສາຫະກິດນ້ຳມັນນວດຂອງອາເມຣິກາ ໄດ້ລອງມາເຂົ້າຮ່ວມງານ, ແຕ່ສຸດທ້າຍປະສົບຜົນສຳເລັດອັນໃຫຍ່ຫຼວງ ໂດຍໄດ້ເຊັນຂໍ້ຜູກພັນໃນການສັ່ງຊື້ທີ່ມີມູນຄ່າ 380 ລ້ານຢວນ. ຫຼັງຈາກນັ້ນ, ບໍລິສັດໂດເຕີຣາໄດ້ເລືອກມາແນະນຳຜະລິດຕະພັນໃໝ່ ທີ່ຜະລິດໂດຍວັດຖຸດິບຈີນໃນງານວາງສະແດງສິນຄ້ານຳເຂົ້າສາກົນຈີນທຸກຄັ້ງ, ມູນຄ່າທີ່ມີຈຸດປະສົງໃນການສັ່ງຊື້ກໍໄດ້ເພີ່ມຈາກ 380 ລ້ານຢວນ ຂຶ້ນເປັນ 1 ຕື້ຢວນ.
ປີ 2020, ຊາຍໜຸ່ມອັຟການິສຖານ ຄົນໜຶ່ງ ໄດ້ນຳເອົາຜ້າພົມຂົນແກະທີ່ຜະລິດແບບສີມືດັ່ງເດີມມາເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນເປັນຄັ້ງທຳອິດ ແລະ ໄດ້ໃບສັ່ງຊື້ຜ້າພົມ 2.000 ຜືນ ຊຶ່ງໝາຍຄວາມວ່າ ຄອບຄົວເຂດພູດອຍອັຟການິສຖານ 2.000 ຄອບຄົວ ມີລາຍຮັບຕະຫຼອດທັງປີເລີຍ. ງານວາງສະແດງສິນຄ້ານຳເຂົ້າສາກົນຈີນ ທີ່ຈັດຂຶ້ນໃນໄລຍະເກີດການແຜ່ລະບາດຂອງພະຍາດໂຄວິດ-19 ໄດ້ປ່ຽນແປງຊີວິດຂອງຊາຍໜຸ່ມຄົນນັ້ນ ແລະ ກໍໄດ້ປັບປຸງຊີວິດການເປັນຢູ່ຂອງຄອບຄົວຊາວອັຟການິສຖານຕັ້ງຫຼາຍພັນຫຼາຍໝື່ນຄອບຄົວ.
ໂດຍໄດ້ຮັບຜົນປະໂຫຍດຈາກງານວາງສະແດງສິນຄ້ານຳເຂົ້າສາກົນຈີນ ແລະ ຈີນ ໄດ້ປະຕິບັດມາດຕະການກວດກາອະນຸມັດ ແລະ ເລັ່ງການອະນຸມັດຢາຊະນິດໃໝ່ຕ່າງໆ, ນັບແຕ່ປີ 2020 ເປັນຕົ້ນມາ, ບໍລິສັດຜະລິດຢາຕາເກດາຂອງຍີ່ປຸ່ນ ມີຢາໃໝ່ຫຼາຍກວ່າ 10 ຊະນິດ ທີ່ໄດ້ວາງສະແດງໃນງານວາງສະແດງສິນຄ້ານຳເຂົ້າສາກົນຈີນ ໄດ້ຮັບການອະນຸມັດໃຫ້ຈຳໜ່າຍໃນຕະຫຼາດຈີນ ແລະ ມີຜະລິດຕະພັນໃໝ່ 7 ຊະນິດ ຖືກຈັດເຂົ້າໃນບັນຊີລາຍຊື່ປະກັນສຸຂະພາບທົ່ວສັງຄົມຂອງຈີນ. ໃນຂະນະດຽວກັນ, ໂດຍນຳໃຊ້ນະໂຍບາຍເຮັດກ່ອນ ແລະ ທົດລອງກ່ອນ, ຢາໃໝ່ຊະນິດໜຶ່ງຂອງບໍລິສັດດັ່ງກ່າວກໍໄດ້ປ້ອນເຂົ້າສູ່ຕະຫຼາດຈີນພາຍໃນເວລາພຽງ 6 ເດືອນ ຫຼັງຈາກໄດ້ວາງສະແດງໃນງານວາງສະແດງສິນຄ້ານຳເຂົ້າສາກົນຈີນ.
ໃນພິທີເປີດງານວາງສະແດງສິນຄ້ານຳເຂົ້າສາກົນຈີນຄັ້ງທີ 6, ທ່ານ ຫຼີສຽງ ນາຍົກລັດຖະມົນຕີຈີນ ໄດ້ແບ່ງປັນຫຼາຍເລື່ອງທີ່ເປັນຮູບປະທຳກ່ຽວກັບງານວາງສະແດງທຸກຄັ້ງຜ່ານມາ. ເວົ້າສຳລັບວິສາຫະກິດ, ຜະລິດຕະພັນ, ເຕັກນິກ ແລະ ປັດໄຈປະດິດສ້າງໃໝ່ຂອງປະເທດ ແລະ ເຂດແຄ້ວນຕ່າງໆແລ້ວ, ການເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນແມ່ນຊ່ອງທາງໄປສູ່ຕະຫຼາດ, ໄປສູ່ເວທີ ແລະ ໄປສູ່ໂອກາດ.
ມີຜູ້ແທນວົງການຕ່າງໆຈາກ 154 ປະເທດ, ເຂດແຄ້ວນ ແລະ ອົງການຈັດຕັ້ງສາກົນໄດ້ເຂົ້າຮ່ວມງານວາງສະແດງປີນີ້. ເນື້ອທີ່ວາງສະແດງຂອງວິສາຫະກິດ, ຈຳນວນວິສາຫະກິດໃນ 500 ອັນດັບສຸດຍອດວິສາຫະກິດລະດັບໂລກ, ວິສາຫະກິດນຳໜ້າຂະແໜງການ ແລະ ວິສາຫະກິດຂະໜາດກາງ ແລະ ນ້ອຍແບບປະດິດສ້າງໃໝ່ທີ່ເຂົ້າຮ່ວມງານວາງສະແດງຄັ້ງນີ້ ລ້ວນແຕ່ໄດ້ສ້າງສະຖິຕິໃໝ່ໃນປະຫວັດສາດ ຊຶ່ງສະແດງໃຫ້ເຫັນວ່າ ທົ່ວໂລກມີຄວາມຄອງຄອຍ ແລະ ມີຄວາມ ໝັ້ນໃຈຕໍ່ຕະຫຼາດຈີນຫຼາຍຂຶ້ນກວ່າເກົ່າ.
ງານສະແດງສິນຄ້ານຳເຂົ້າສາກົນຈີນແມ່ນເປີດປະຕູສູ່ທົ່ວໂລກ ແລະ ສ້າງຜົນປະໂຫຍດໃຫ້ທົ່ວເຖິງ, ຈະບໍ່ສ້າງກຸ່ມກ້ອນໃນວົງແຄບຕາມການພົວພັນທີ່ສະໜິດ ຫຼື ຫ່າງເຫີນ ຫຼື ຮູບຖານຈິດສຳນຶກ, ໃນຂະນະດຽວກັນ, ກໍໄດ້ສ້າງໂອກາດໃຫ້ແກ່ປະເທດດ້ອຍພັດທະນາໃນໂລກ. ຝ່າຍເຈົ້າພາບໄດ້ເຊື້ອເຊີນປະເທດດ້ອຍພັດທະນາໃນໂລກເຂົ້າຮ່ວມງານນັບຕັ້ງແຕ່ຄັ້ງທຳອິດ ແລະ ສະໜອງຮ້ານວາງສະແດງມາດຕະຖານສອງແຫ່ງໃຫ້ແກ່ທຸກປະເທດທີ່ດ້ອຍພັດທະນາ ໂດຍບໍ່ເກັບຄ່າ. ໃນງານວາງສະແດງແຫ່ງຊາດປີນີ້, ໃນຈຳນວນ 69 ປະເທດນັ້ນ, ມີ 16 ປະເທດແມ່ນປະເທດດ້ອຍພັດທະນາ, ການວາງສະແດງວິສາຫະກິດມີ 29 ປະເທດດ້ອຍພັດທະນາເຂົ້າຮ່ວມ.
ໃນງານວາງສະແດງຄັ້ງທີ 6 ໃນປີນີ້, ພວກເຮົາຍັງໄດ້ຮັບຮູ້ເຖິງຫຼາຍເລື່ອງທີ່ຄ້າຍຄືກັນ. ໂດຍຜ່ານຈາກເລື່ອງເຫຼົ່ານີ້, ພວກເຮົາໄດ້ຮັບຮູ້ເຖິງຄວາມສາມາດບົ່ມຊ້ອນ ແລະ ຄວາມຫວັງໃນຕະຫຼາດຈີນ, ທັງໝົດເຫຼົ່ານີ້ເປັນການຢືນຢັນຕໍ່ຄຳໝັ້ນສັນຍາຂອງຈີນຈາກອີກແງ່ມູມໜຶ່ງວ່າ: “ຈີນຈະບໍ່ປິດປະຕູຕັນໂຕເອງ, ແຕ່ຈະເປີດປະຕູນັບມື້ນັບກວ້າງອອກເທົ່ານັ້ນ” ແລະ “ໃຫ້ຕະຫຼາດຈີນກາຍເປັນໂອກາດໃຫຍ່ຂອງໂລກ”.
ໂດຍ: ຊີອາໄອ
ຄໍາເຫັນ