ເອົາໃຈໃສ່ນໍາພາແນວຄິດ ຕິດພັນກັບການເສີມຂະຫຍາຍສິດປະຊາທິປະໄຕ ປະຊາຊົນລາວບັນດາເຜົ່າ

ໃນເອກະສານທີ 2 ເພີ່ມທະວີນໍາພາແນວຄິດ, ເສີມຂະຍາຍສິດປະຊາທິປະໄຕຂອງປະຊາຊົນລາວບັນດາເຜົ່າ ເພື່ອການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ໃຫ້ຮູ້ວ່າ: ໃນຕະຫຼອດບັ້ນເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຄະນະພັກ ແລະ ຄະນະກຳມະການເລືອກຕັ້ງແຕ່ລະຂັ້ນ ຕ້ອງເອົາໃຈໃສ່ນໍາພາແນວຄິດ ຕິດພັນກັບການເສີມຂະຫຍາຍສິດປະຊາທິປະໄຕຂອງປະຊາຊົນລາວບັນດາເຜົ່າ ໂດຍສຸມໃສ່ສຶກສາອົບຮົມ ແລະ ໂຄສະນາເຜີຍແຜ່ໃຫ້ສະມາຊິກພັກ, ພະນັກງານ-ລັດຖະກອນ, ທະຫານ, ຕຳຫຼວດ ນັກຮຽນຮູ້ປັນຍາຊົນ, ຜູ້ປະກອບການ ແລະ ປະຊາຊົນລາວບັນດາເຜົ່າ ເຂົ້າໃຈຢ່າງເລິກເຊິ່ງ ແລະ ເຫັນແຈ້ງບາງບັນຫາສໍາຄັນຄື: ເຫັນແຈ້ງບົດບາດການນໍາພາອັນຖືກຕ້ອງຂອງພັກ, ການຄຸ້ມຄອງຂອງລັດ ເປັນຕົ້ນທາງອອກເພື່ອແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ບັນຫາອື່ນໆ ໃນຂອບເຂດທົ່ວປະເທດ ກໍຄືໃນແຕ່ລະທ້ອງຖິ່ນ, ຊີ້ໃຫ້ເຫັນຜົນງານ, ຜົນສໍາເລັດ ໃນການແກ້ໄຂຄວາມຫຍຸ້ງຍາດດັ່ງກ່າວ; ເຫັນແຈ້ງຂໍ້ສະດວກ ແລະ ຂໍ້ຫຍຸ້ງຍາກລວມທົ່ວປະເທດທີ່ກ່າວມາຂ້າງເທິງນີ້ ກໍຄືຂໍ້ສະດວກ ແລະ ຂໍ້ຫຍຸ້ງຍາກຢູ່ແຕ່ລະທ້ອງຖິ່ນ ເພື່ອພ້ອມກັນຕັດສິນໃຈເສີມຂະຫຍາຍຂໍ້ສະດວກ ແລະ ສູ້ຊົນຜ່ານຜ່າຂໍ້ຫຍຸ້ງຍາກ ເພື່ອສ້າງຜົນງານໃໝ່ໃຫຍ່ຫຼວງກວ່າເກົ່າ; ເຫັນແຈ້ງຜົນງານອັນໃຫຍ່ຫຼວງໃນພາລະກິດການປົກປັກຮັກສາ ແລະ ສ້າງສາປະເທດຊາດ ກໍຄືຂອງແຕ່ລະທ້ອງຖິ່ນໃນຕະຫຼອດໄລຍະ 50 ປີທີ່ຜ່ານມາ ແລະ ທິດທາງວຽກງານສືບຕໍ່ປົກປັກຮັກສາ ແລະ ສ້າງສາປະເທດຊາດ ແລະ ແຕ່ລະທ້ອງຖິ່ນໃນຕໍ່ໜ້າ; ເຫັນແຈ້ງຄວາມສໍາຄັນ ແລະ ຄວາມຈໍາເປັນໃນການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ແມ່ນການເສີມຂະຫຍາຍສິດປະຊາທິປະໄຕ ຂອງປະຊາຊົນລາວບັນດາເຜົ່າ ທີ່ເປັນສິດສໍາຄັນພື້ນຖານ ເພື່ອເລືອກຕັ້ງເອົາຕົວແທນຂອງຕົນເຂົ້າໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ເປັນການປະກອບ ສ່ວນສໍາຄັນ ເຂົ້າໃນການປັບປຸງ, ບູລະນະລະບົບອຳນາດລັດ ປະຊາທິປະໄຕປະຊາຊົນ ແຕ່ສູນກາງລົງຮອດທ້ອງຖິ່ນ, ຮາກຖານ ໃຫ້ໜັກແໜ້ນ, ເຂັ້ມແຂງ; ເຫັນແຈ້ງກົນອຸບາຍຫັນປ່ຽນໂດຍສັນຕິ ຂອງພວກຄົນບໍ່ດີ ແລະ ອິດທິກຳລັງປໍລະປັກທີ່ນໍາໃຊ້ສື່ສັງຄົມອອນລາຍ ໂຄສະນາແບ່ງແຍກ, ປັ່ນປ່ວນ, ໃສ່ຮ້າຍປ້າຍສີຕ່າງໆ ຫວັງມ້າງເພທໍາລາຍ ແລະ ໂຄ່ນລົ້ມລະບອບໃໝ່ ຂອງພວກເຮົາ. ພ້ອມກັນນັ້ນ, ເອົາໃຈໃສ່ແກ້ໄຂຈຸດອ່ອນ, ຊ່ອງວ່າງ ພາຍໃນຢູ່ແຕ່ລະບ່ອນ ໃຫ້ທັນເວລາ; ເຫັນແຈ້ງມູນເຊື້ອຮັກຊາດຂອງແຕ່ລະຊົນເຜົ່າ ແລະ ມູນເຊື້ອແຫ່ງຄວາມສາມັກຄີປອງດອງລະຫວ່າງຊົນເຜົ່າ ເພື່ອເພີ່ມທະວີຄວາມເປັນປຶກແຜ່ນ ແລະ ກຳລັງແຮງຂອງຊາດ; ເຫັນແຈ້ງສິດ ແລະ ພັນທະຂອງພົນລະເມືອງ ເປັນຕົ້ນຕໍ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ເພື່ອໃຫ້ມີຄວາມຕື່ນຕົວສະໝັກໃຈໄປໃຊ້ສິດໃນວັນເລືອກຕັ້ງໃຫ້ໄດ້ຢ່າງຄົບຖ້ວນ ແລະ ຖືກຕ້ອງຕາມລະບຽບການເລືອກຕັ້ງ; ເຫັນແຈ້ງຜົນສໍາເລັດໃນການດໍາເນີນກອງປະຊຸມໃຫຍ່ຂອງອົງຄະນະພັກແຕ່ລະຂັ້ນ ແລະ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນປະຕິວັດລາວ ຊຶ່ງເປັນຜົນສໍາເລັດທີ່ສໍາຄັນໃນການຜັນຂະຫຍາຍແນວທາງປ່ຽນແປງໃໝ່ເຂົ້າສູ່ລວງເລິກ ວາງທິດທາງສືບຕໍ່ເພີ່ມທະວີບົດບາດນໍາພາຂອງພັກໃນໄລຍະແຕ່ນີ້ຮອດປີ 2030 ກໍຄືຊຸມປີ ຫຼັງປີ 2030.