ໄດ້ມອບໂທລະສັບມືຖື ຈໍານວນ 135 ໜ່ວຍ ໃຫ້ອາສາສະໝັກຂັ້ນບ້ານ 451 ບ້ານ ໃນທົ່ວປະເທດ ເພື່ອຊ່ວຍໃນການເກັບກໍາຂໍ້ມູນ, ການສ້າງຂະບວນການ ສົ່ງເສີມການລ້ຽງດູເດັກໃນທາງບວກ ໃຫ້ບັນດາຄອບຄົວໃຫ້ດີຂຶ້ນ.
ທ່ານ ນາງ ທໍາມາ ເພັດວິໄຊ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ສະແດງຄວາມຂອບໃຈມາຍັງປະເທດອົສຕຣາລີ, USAID ແລະ ອົງການອຸຍນີເຊັບ ທີ່ໄດ້ຊ່ວຍສົ່ງເສີມການຈັດຕັ້ງປະຕິບັດແຜນງານ “ຮັກລູກໃຫ້ໃສ່ໃຈ” ດ້ວຍການມອບອຸປະກອນດັ່ງກ່າວໃນຄັ້ງນີ້ວ່າ: ໂທລະສັບມືຖື ແມ່ນອຸປະກອນທີ່ມີຄວາມສໍາຄັນຫຼາຍ ຕໍ່ກັບການຕິດຕາມ ແລະ ການປະເມີນຜົນ ໃນການຈັດຕັ້ງປະຕິບັດແຜນງານ “ຮັກລູກໃຫ້ໃສ່ໃຈ”, ທັງເປັນການຮັບປະກັນວ່າ ພໍ່ແມ່ ແລະ ຜູ້ດູແລເດັກ ມີຊັບພະຍາກອນທີ່ຈໍາເປັນ ໃນການເລີ່ມຕົ້ນຊີວິດທີ່ດີທີ່ສຸດໃຫ້ກັບເດັກນ້ອຍ.
ທ່ານ ນາງ ເບັນນິຕາ ຊໍາເມີວິວ ຮອງເອກອັກຄະລັດຖະທູດ ອົສຕຣາລີ ປະຈໍາ ສປປ ລາວ ໄດ້ກ່າວວ່າ: ເພື່ອການສະໜັບສະໜູນການຈັດຕັ້ງປະຕິບັດແຜນງານໃນຄັ້ງນີ້, ປະເທດ ອົສຕຣາລີ ມີຄວາມຕັ້ງໜ້າສືບຕໍ່ລົງທຶນເຂົ້າໃນການພັດທະນາອະນາຄົດຂອງຊາດ ກໍຄື ເດັກນ້ອຍ ແລະ ສົ່ງເສີມ ຄອບຄົວຕ່າງໆ ໃຫ້ມີສຸຂະພາບທີ່ດີ ແລະ ມີຄວາມສະເໝີພາບ ໃນຊຸມຊົນໃຫ້ຫຼາຍຂຶ້ນ ຊຶ່ງໂທລະສັບມືຖືຈະເປັນອຸປະກອນສົ່ງເສີມເຂົ້າໃນການຕິດຕາມ ແລະ ການປະເມີນຜົນ ໃນການຈັດຕັ້ງປະຕິບັດແຜນງານ “ຮັກລູກໃຫ້ໃສ່ໃຈ” ໄດ້ຢ່າງມີປະສິດທິພາບ ແລະ ປະສິດທິຜົນໃຫ້ກັບທຸກຄອບຄົວ.
ທ່ານ ໄມໂຄ ແມັກຄອດ ຜູ້ຕາງໜ້າ USAID ປະຈໍາ ສປປ ລາວ ໄດ້ເນັ້ນໃຫ້ເຫັນເຖິງຄວາມມຸ່ງໝັ້ນຂອງ USAID ຕໍ່ການສົ່ງເສີມການສຶກສາ, ການພັດທະນາແບບຍືນຍົງ ແລະ ການເປັນຄູ່ຮ່ວມມືທີ່ສໍາຄັນວ່າ: ການຮ່ວມມືໃນຄັ້ງນີ້, ສະແດງເຖິງບາດກ້າວທີ່ສໍາຄັນ ໃນການເສີມສ້າງຄວາມເຂັ້ມແຂງໃຫ້ຊຸມຊົນ ແລະ ສົ່ງເສີມຄວາມໝັ້ນຄົງໃຫ້ບັດດາຄອບຄົວ ໃນ ສປປ ລາວ. ການລິເລີ່ມນີ້ເປັນການຢັ້ງຢືນ ໃຫ້ແກ່ການຮ່ວມມືທີ່ເຂັ້ມແຂງ, ຍາວນານ ແລະ ນັບມື້ນັບຂະຫຍາຍຕົວ ລະຫວ່າງສອງ ປະເທດພວກເຮົາ.
ທ່ານ ບີລາລ ດູຣານີ ຜູ້ຕາງໜ້າຂອງ ອົງການອຸຍນີເຊັບ ປະຈໍາລາວ ໄດ້ກ່າວວ່າ: ການຮ່ວມມືໃນຄັ້ງນີ້, ໄດ້ສະທ້ອນໃຫ້ເຫັນເຖິງຄວາມມຸ່ງໝັ້ນຂອງພວກເຮົາ ໃນການນໍາໃຊ້ຂໍ້ມູນ ແລະ ເຕັກໂນໂລຊີ ເຂົ້າໃນການແກ້ໄຂບັນຫາ ບົນພື້ນຖານຂໍ້ມູນຫຼັກຖານຕົວຈິງ ທີ່ຈະເປັນສິ່ງທີ່ຊ່ວຍສົ່ງເສີມການປ່ຽນແປງພຶດຕິກໍາຂອງພໍ່ແມ່ ແລະ ການພັດທະນາເດັກກ່ອນໄວຮຽນໄປໃນທາງທີ່ດີຫຼາຍຂຶ້ນ.
ແຜນງານ “ຮັກລູກໃຫ້ໃສ່ໃຈ: ຄອບຄົວຜາສຸກພ້ອມກັນພັດທະນາ ແມ່ນແຜນງານທີ່ລິເລີ່ມຈັດຕັ້ງປະຕິບັດພາຍໃຕ້ການນໍາພາຂອງ ສູນກາງສະຫະພັນແມ່ຍິງລາວ ເພື່ອສົ່ງເສີມໃຫ້ພໍ່ແມ່ ແລະ ຜູ້ດູແລເດັກ ໄດ້ຮັບຄວາມຮູ້ ແລະ ອຸປະກອນທີ່ຈໍາເປັນທີ່ຈະຊ່ວຍໃຫ້ເດັກນ້ອຍ ມີການເຕີບໃຫຍ່ໄດ້ຢ່າງມີປະສິດທິພາບ ແລະ ມີສະພາບແວດລ້ອມທີ່ອຸດົມສົມບູນ. ການມອບໂທລະສັບມືຖືໃນຄັ້ງນີ້, ຈະຊ່ວຍໃຫ້ອາສາສະໝັກຂັ້ນບ້ານຂອງແຜນງານ “ຮັກລູກໃຫ້ໃສ່ໃຈ” ສາມາດຕິດຕາມການຈັດຕັ້ງປະຕິບັດ ແລະ ເກັບກໍາຂໍ້ມູນຕົວຈິງ, ລວມມີ: ອັດຕາການເຂົ້າຮ່ວມການຝຶກອົບຮົມ ແລະ ການໃຫ້ຄໍາແນະນໍາໄດ້ຢ່າງທັນເວລາ.
ຄໍາເຫັນ