 |
ທ່ານ ສັກບັນດິດ ຈັນທະລັງສີ ຮອງຫົວໜ້າພະແນກກະສິກຳ ແລະ ສິ່ງແວດລ້ອມແຂວງອັດຕະປື ໄດ້ໃຫ້ສໍາພາດໃນວັນທີ 8 ກໍລະກົດ 2026 ນີ້ວ່າ: ໃນໄລຍະຊຸມປີຜ່ານມາ ການຈັດຕັ້ງທຸກຂັ້ນໄດ້ເປັນເຈົ້າການຈັດກິດຈະກໍາປ່ອຍປາ ແລະ ສັດນໍ້າ ຄືນສູ່ແຫຼ່ງນໍ້າທໍາມະຊາດ, ຕາມອ່າງເກັບນໍ້າ, ຕາມໜອງ ແລະ ແຫຼ່ງນໍ້າອື່ນໆ, ເພື່ອຄືນຄວາມອຸດົມສົມບູນໃຫ້ແກ່ທໍາມະຊາດ, ທັງເປັນການຊຸກຍູ້ສົ່ງເສີມ ແລະ ປູກຈິດສໍານຶກໃນການອະນຸລັກ, ປົກປັກຮັກສາ ແລະ ພັດທະນາປາ ແລະ ສັດນໍ້າ ເພື່ອຮັບປະກັນຄວາມໝັ້ນຄົງທາງດ້ານສະບຽງອາຫານ.
ເນື່ອງໃນໂອກາດວັນປ່ອຍປາ ແລະ ສັດນໍ້າ ແຫ່ງຊາດ ວັນທີ 13 ກໍລະກົດ 2026, ພະແນກ ກະສິກຳ ແລະ ສິ່ງແວດ ລ້ອມແຂວງ ໄດ້ເປັນເຈົ້າການປະສານສົມທົບກັບຂະແໜງການທີ່ກ່ຽວຂ້ອງຂອງແຂວງ ແລະບັນດາເມືອງ ໃນການຈັດພິທີປ່ອຍປາ ແລະ ສັດນໍ້າ ໃຫ້ເປັນຂະບວນຟົດຟື້ນ, ໃນນັ້ນ ເມືອງໄຊເສດຖາ ມີແຜນການປ່ອຍປາໃຫ້ໄດ້ 2,300,000 ໂຕ, ເມືອງສະໜາມໄຊ ມີແຜນການປ່ອຍປາໃຫ້ໄດ້ 1,650,000 ໂຕ, ເມືອງຊານໄຊ ມີແຜນການປ່ອຍປາໃຫ້ໄດ້ 1,000,000 ໂຕ, ເມືອງພູວົງ ມີແຜນ ການປ່ອຍປາໃຫ້ໄດ້ 550,000 ໂຕ.
ນອກນັ້ນຍັງມີພາກສ່ວນລັດວິສາຫະກິດເຂື່ອນໄຟຟ້ານໍ້າກົງ 1,2,3 ປ່ອຍຢູ່ໜ້າເຂື່ອນລວມ ຈໍານວນ 300,000 ໂຕ, ຜູ້ປະກອບການຫາປາ ແລະ ສັດນໍ້າ ຢູ່ເຂື່ອນໄຟຟ້າເຊກະໝານ 1 ຈໍານວນ 20,000 ໂຕ, ຜູ້ປະກອບການຫາປາ ແລະ ສັດນໍ້າ ຢູ່ເຂື່ອນໄຟຟ້ານໍ້າກົງ 3 ຈໍານວນ 20,000 ໂຕ, ຜູ້ປະກອບການຫາປາ ແລະ ສັດນໍ້າ ຢູ່ເຂື່ອນໄຟຟ້ານໍ້າກົງ 1 ຈໍານວນ 20,000 ໂຕ.
ທ່ານ ສັກບັນດິດ ຈັນທະລັງສີ ຍັງຮຽກຮ້ອງມາຍັງບັນດາພະນັກງານ, ທະຫານ, ຕຳຫຼວດ, ນັກທຸລະກິດ ຜູ້ປະກອບການ ລວມທັງປະຊາຊົນບັນດາເຜົ່າ ຈົ່ງພ້ອມກັນໃຫ້ຄວາມສໍາຄັນ ກັບການປ່ອຍປາ ແລະ ສັດນໍ້າ ບໍ່ແມ່ນພຽງແຕ່ການເອົາປາລົງນໍ້າແລ້ວຈົບໄປ, ແຕ່ມັນແມ່ນການຟື້ນຟູຄວາມສົມດຸນຂອງລະບົບນິເວດ ແລະ ເພີ່ມແຫຼ່ງອາຫານທີ່ໝັ້ນຄົງ ໃຫ້ກັບປະຊາຊົນ, ການປ່ອຍປາເປັນເລື່ອງທີ່ດີ, ແຕ່ສິ່ງທີ່ສໍາຄັນກວ່າແມ່ນການຢຸດຕິການຫາປາແບບດັບສູນ ເຊັ່ນ: ການຊ໋ອດໄຟ, ການເບືອປາ ຫຼື ການຫາປາໃນລະດູວາງໄຂ່, ເພາະວ່າ ປາ ແລະ ສັດນໍ້າ ແມ່ນຊັບສິນຂອງພວກເຮົາທຸກຄົນ ທີ່ຕ້ອງຊ່ວຍກັນເບິ່ງແຍງ, ຄຽງຄູ່ກັນນັ້ນ ກໍຕ້ອງຊຸກຍູ້ການລ້ຽງປາ ແລະ ສັດນໍ້າໃນໜອງ, ໃນກະຊັງຕາມແມ່ນໍ້າລຳເຊ, ອ່າງເກັບນໍ້າເຂື່ອນໄຟຟ້າ ແລະ ອ່າງເກັບນໍ້າຊົນລະປະທານ, ທີ່ມີການຄຸ້ມຄອງ ແລະ ນໍາໃຊ້ເຕັກນິກເຂົ້າຊ່ວຍ ເພື່ອເພີ່ມສະມັດຕະພາບການຜະລິດ ທີ່ສາມາດຕອບສະໜອງຄວາມຕ້ອງການບໍລິໂພກຊີ້ນປາ ແລະ ສັດນໍ້າ ໃຫ້ພຽງພໍກັບຄວາມຕ້ອງການ ແລະ ກາຍເປັນສິນຄ້າສົ່ງອອກ.
ຂ່າວ: ວັດທະນາ
ຄໍາເຫັນ