ອັດຕະປື ຕ້ອງສືບຕໍ່ແກ້ໄຂບັນຫາຫາງສຽງສັງຄົມ

 ແຕ່ເຖິງຢ່າງໃດກໍດີ ໂດຍພາຍໃຕ້ການນຳພາ-ຊີ້ນຳ ຂອງຄະນະບໍລິຫານງານພັກແຂວງ, ປະຕິບັດຕາມມະຕິເລກທີ 206/ກມສພ ວ່າດ້ວຍການຍົກສູງວຽກງານການເມືອງ-ແນວຄິດ ໃນໄລຍະໃໝ່, ຄຳສັ່ງເລກທີ 04 ຂອງຄະນະເລຂາທິການສູນກາງພັກ, ຄໍາສັ່ງ ເລກທີ 17 ຂອງຄະນະປະຈໍາພັກແຂວງ ວ່າດ້ວຍການເພີ່ມຕິດຕາມ, ເກັບກໍາສະພາບແນວຄິດ-ຫາງສຽງສັງຄົມ. ຄະນະພັກແຕ່ລະຂັ້ນ ໄດ້ເອົາໃຈໃສ່ທະວີເອົາໃຈໃສ່ເປັນເຈົ້າການ ຕິດຕາມສະພາບແນວຄິດ-ຫາງສຽງສັງຄົມ ທີ່ພົ້ນເດັ່ນຕໍ່ການນຳພາຂອງພັກ-ການຄຸ້ມຄອງລັດ ຢ່າງເປັນເຈົ້າການ.

ທ່ານ ຄອນສະຫງ່າ ພິມມະສອນ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ໄດ້ມີຄໍາເຫັນ ຕໍ່ກອງປະຊຸມຄົບຄະນະບໍລິຫານງານພັກແຂວງເປີດກວ້າງ ຄັ້ງທີ 14 ສະໄໝທີ XI ທີ່ໄດ້ໄຂຂຶ້ນ ໃນລະຫວ່າງ ວັນທີ 4-6 ສິງຫາ 2025 ວ່າ: ໄລຍະ 6 ເດືອນທີ່ຜ່ານມາ, ການນຳພາ-ຊີ້ນຳ ວຽກງານຮອບດ້ານ ຂອງຄະນະບໍລິຫານງານພັກແຂວງ ກໍຄືທົ່ວອົງຄະນະພັກແຂວງ ໄດ້ມີຫຼາຍຜົນສຳເລັດທີ່ເປັນຜົນງານພົ້ນເດັ່ນຫຼາຍດ້ານ. ໃນນັ້ນ, ວຽກງານສຶກສາອົບຮົມການເມືອງ-ແນວຄິດ ໄດ້ຮັບການເອົາໃຈໃສ່ຢ່າງຕັ້ງໜ້າ, ສະມາຊິກພັກ, ພະນັກງານ ຫຼັກແຫຼ່ງ, ພະນັກງານນຳພາຄຸ້ມຄອງທຸກຂົງເຂດ ໄດ້ຮັບການອົບຮົມດ້ານທິດສະດີການເມືອງ-ການປົກຄອງ, ອົບຮົມກົດໝາຍ ແລະ ຍົກລະດັບວຽກງານຕ່າງໆ ຢ່າງເປັນລະບົບ ແລະ ຕໍ່ເນື່ອງ, ເຮັດໃຫ້ພະນັກງານ, ສະມາຊິກພັກ ມີຄວາມຮັບຮູ້-ເຂົ້າໃຈ ຕໍ່ແນວທາງຂອງພັກ-ກົດໝາຍຂອງລັດ ຢ່າງເລິກເຊິ່ງ. ສະແດງອອກໃນການຈັດຕັ້ງປະຕິບັດບັນດາມະຕິ, ຄຳສັ່ງ, ກົດ ໝາຍ ແລະ ລະບຽບການຕ່າງໆ ມີຄວາມເຂັ້ມງວດສົມຄວນ, ມີຄວາມຮັບຜິດຊອບໜ້າທີ່ການເມືອງສູງ. ຜ່ານມາສາມາດຕີລາຄາສະພາບແນວຄິດ ບັນດາຊັ້ນຄົນ ໃນທົ່ວແຂວງ ສ່ວນໃຫຍ່ມີຄວາມໜັກແໜ້ນຕໍ່ອຸດົມການຂອງພັກ ແລະ ການນຳພາ-ຊີ້ນຳຂອງພັກ ກໍຄືການນຳພາ-ຊີ້ນຳ ຂອງອົງຄະນະພັກແຂວງ, ມີແນວຄິດຮັກຊາດ ຮັກບ້ານເກີດເມືອງນອນ, ມີຄວາມສາມັກຄີປອງດອງ ໃນທົ່ວສັງຄົມ.

ວຽກງານຫາງສຽງສັງຄົມ: ແມ່ນວຽກໜຶ່ງທີ່ສຳຄັນຂອງພັກ, ໄດ້ເປັນສ່ວນໜຶ່ງປະກອບສ່ວນເຂົ້າໃນການປະເມີນຜົນການກໍ່ສ້າງພັກ ປອດໃສ, ເຂັ້ມແຂງ, ໜັກແໜ້ນ. ການນຳພາ-ຊີ້ນຳຂອງພັກ ແຕ່ລະໄລຍະ ມີທັງດ້ານດີ, ຜົນສຳເລັດ ແລະ ບັນດາຂໍ້ຂາດຕົກບົກຜ່ອງ ທີ່ປາສະຈາກບໍ່ໄດ້ ບາງອັນກໍພາໃຫ້ເກີດມີການສະທ້ອນຄືນຈາກສັງຄົມ ສະແດງອອກໃນຫາງສຽງຕ່າງໆ ສາມາດສັງລວມໄດ້ ທັງດ້ານຕັ້ງໜ້າ ແລະ ດ້ານຫຍໍ້ທໍ້. ດ້ານຕັ້ງໜ້າ: ສະມາຊິກພັກ, ພະນັກງານ ແລະ ປະຊາຊົນບັນດາເຜົ່າ ເຫັນດີເຫັນຊອບຕໍ່ຫຼາຍຜົນງານ, ຜົນສໍາເລັດທີ່ຄະນະບໍລິຫານງານພັກແຂວງ, ຄະນະພັກແຕ່ລະຂັ້ນຍາດມາໄດ້ ເປັນຕົ້ນ ຂະບວນການດຳເນີນກອງປະຊຸມໃຫຍ່ 3 ຂັ້ນຂອງພັກ ຢູ່ຂັ້ນເມືອງ ແລະ ຫຼາຍຮາກຖານຂັ້ນແຂວງ ແມ່ນໄດ້ສຳເລັດຕາມລະດັບຄາດໝາຍ. ການແກ້ໄຂປະກົດການສໍ້ລາດບັງຫຼວງ ໃນກົງຈັກພະນັກງານຂອງລັດ ທີ່ເປັນບັນຫາໃຫຍ່ຂອງແຂວງ, ການປະຕິບັດ 4 ວາລະໃຫຍ່ເຫັນວ່າດີຂຶ້ນ. ການປັບປຸງກໍ່ສ້າງລະບົບພື້ນຖານໂຄງລ່າງໃນເທສະບານແຂວງ ແລະ ເມືອງ, ການນຳພາດ້ານເສດຖະກິດ ມີທ່າອ່ຽງຂະຫຍາຍຕົວດີຂຶ້ນ. ການເກັບລາຍຮັບເຂົ້າງົບປະມານໄດ້ລື່ນແຜນການ, ວຽກງານແຂ່ງຂັນກິລານັກຮຽນທົ່ວປະເທດສາມາດຍາດໄດ້ຫຼາຍຫຼຽນຫຼາຍປະເພດ ທີ່ພົ້ນເດັ່ນແມ່ນບານເຕະ ຍາດໄດ້ຫຼຽນຄຳ ແລະ ຜົນງານອື່ນໆ...ເຫັນວ່າ: ສັງຄົມມີການຊົມເຊີຍຍ້ອງຍໍໃນລະດັບທີ່ກວ້າງຂວາງ.

ດ້ານຫຍໍ້ທໍ້:

1. ຂົງເຂດການເມືອງ-ການປົກຄອງ: ການດຳເນີນກອງປະຊຸມໃຫຍ່ 3 ຂັ້ນຂອງພັກ ໂດຍສະເພາະ ຢູ່ຂັ້ນເມືອງສຳເລັດ ແຕ່ຍັງມີຫາງສຽງຕໍ່ກັບການປັບປຸງກົງຈັກການຈັດຕັ້ງພັກ-ລັດ, ການມອບ ໝາຍໜ້າທີ່ແບ່ງຄວາມຮັບຜິດຊອບໃຫ້ບຸກຄົນພາຍໃນຄະນະພັກຊຸດໃໝ່ ຍັງມີຄວາມຫຍຸ້ງຍາກສັບສົນ;ປະຊາຊົນບ້ານປີນດົງ ເມືອງສະໜາມໄຊ ຈຳນວນໜຶ່ງບຸກລຸກປ່າສະຫງວນເຂດຫ້ວຍກາລ໋ອງເຮັດສວນມັນຕົ້ນຖືກເຈົ້າໜ້າທີ່, ອຳນາດການປົກຄອງບ້ານ ໄດ້ຮຽກເກັບເງິນຄ່າປັບໄໝ ແຕ່ບໍ່ມີເອກະສານບົງບິນຈົດຮັບ-ຈົດຈ່າຍ ແລະ ບົດບັນທຶກຕ່າງໆເພື່ອເປັນຫຼັກຖານ.

2. ຂົງເຂດເສດຖະກິດ: ພໍ່ແມ່ປະຊາຊົນ ໄດ້ພົບເຫັນການລະເມີດຄໍາສັ່ງ ເລກທີ 06/ນຍ ແລະ 06 ຂອງເຈົ້າແຂວງ ກ່ຽວກັບການຢຸດຕິການຂຸດຄົ້ນຄໍາຕົກຂ້ອນ ຢູ່ເຂດນໍ້າກົງ 3, ເມືອງພູວົງ ໂດຍນຳໃຊ້ເຄື່ອງກົນຈັກຈຳນວນໜຶ່ງ;ຂໍ້ຂັດແຍ່ງບັນຫາທີ່ດິນລະຫວ່າງປະຊາຊົນ ກັບ ບໍລິສັດທາໂກ ຢູ່ບ້ານສະແຄະ, ເມືອງໄຊເສດຖາ ຍັງແກ້ໄຂຍາກ ປະຊາຊົນມີຫາງສຽງຕໍ່ການຈັດຕັ້ງພັກ-ລັດ; ບັນຫາຜົນກະທົບຄ່າຄອງຊີບສູງ, ຄ່າເງິນກີບຕ່ຳ, ລາຄາສິນຄ້າສູງ, ນໍ້າມັນເໜັງຕີງທຸກອາທິດ, ຄ່າໄຟຟ້າແພງ ຍັງເຮັດໃຫ້ທົ່ວສັງຄົມ ມີຄວາມຂັດຂ້ອງໃຈ ຕໍ່ການແກ້ໄຂບັນຫາດັ່ງກ່າວ. ອີກບັນຫາໜຶ່ງ ປະຊາຊົນຜູ້ປູກມັນຕົ້ນຖືກກະທົບຍ້ອນລາຄາຕົກຕ່ຳຫຼາຍ;

3. ຂົງເຂດວັດທະນະທໍາ-ສັງຄົມ: ນະໂຍບາຍຊົດເຊີຍຜົນກະທົບຈາກເຂື່ອນແຕກ ຢູ່ເມືອງສະ ໜາມໄຊ (ລາຍການທີ 6) ຍັງຊັກຊ້າແກ່ຍາວ ຫຼາຍຄອບຄົວທີ່ຖືກຜົນກະທົບເຂົາເຈົ້າບໍ່ພໍໃຈ, ພະຍາຍາມສະເໜີຕໍ່ຫຼາຍພາກສ່ວນ ເພື່ອແກ້ໄຂໃຫ້ສຳເລັດ. ລະບົບສາທາລະນະສຸກ ປະຊາຊົນຍັງສະເໜີວ່າ: ບໍ່ທັນເຂົ້າເຖິງທຸກເປົ້າໝາຍ, ການບໍລິການບໍ່ທົ່ວເຖິງ ແລະ ຄຸນນະພາບຂອງການປິ່ນປົວ ບໍ່ໄດ້ດີປານໃດ. ສັງຄົມສ່ອງແສງເຖິງພຶດຕິກໍາຂອງຊາວໜຸ່ມ-ໄວໜຸ່ມຈໍານວນໜຶ່ງ ມົ້ວສຸມກັບສິ່ງເສບຕິດບາງປະເພດເປັນຕົ້ນ ຢາເສບຕິດ, ນໍ້າກະທ້ອມ, ຢາສູບໄຟຟ້າ, ຄໍລະເຈນ ສະຖານທີ່ສ່ວນໃຫຍ່ ແມ່ນບ່ອນພັກເຊົາ ແລະ ສະຖານທີ່ບັນເທີງ, ເສັ້ນທາງຫຼວງ-ຄອງລະບາຍນໍ້າບາງຈຸດ, ຂອບເຂດສວນສາທາລະນະ, ບໍລິເວນເຂດຕະຫຼາດ ແລະ ດິນເປົ່າຫວ່າງຈຳນວນໜຶ່ງ ໃນເທສະບານແຂວງ ແລະ ເມືອງ ຍັງພົບເຫັນສິ່ງເສດເຫຼືອຂີ້ເຫຍື່ອຮົກເຮື້ອ, ສົ່ງກິ່ນເໝັນ, ການເກັບມ້ຽນຂີ້ເຫຍື່ອຂອງຜູ້ປະກອບການ ຍັງເຮັດບໍ່ທັນໄດ້ດີ ແລະ ປ່ອຍສັດລ້ຽງຊະຊາຍຕາມຕົວເມືອງ ເຮັດໃຫ້ສ້າງຄວາມຫຍຸ້ງຍາກໃນການສັນຈອນ ແລະ ເສັ້ນທາງເປີ໋ເປື້ອນ. ພະນັກງານ, ປະຊາຊົນຢູ່ເທສະບານແຂວງ ມີຄວາມຫຍຸ້ງຍາກໃນການນຳໃຊ້ນໍ້າປະປາ ຍ້ອນບາງມື້ມາ-ບາງມື້ບໍ່ມາ, ຄຸນນະພາບນໍ້າກໍ່ບໍ່ໄດ້ມາດຕະຖານ ຂໍໃຫ້ພາກສ່ວນກ່ຽວຂ້ອງ ຮີບຮ້ອນແກ້ໄຂໃຫ້ນຳໃຊ້ປົກກະຕິ. ກຸ່ມມິດສາຊີບ ທີ່ສວຍໃຊ້ສື່ອອນລາຍ ຕົວະຍົວະຫຼອກລວງໃນທຸກຮູບແບບ ຍັງເປັນບັນຫາທົ່ວສັງຄົມຄອງຄອຍການແກ້ໄຂ, ການເກັບເງິນ 3,000 ກີບຕໍ່ເດືອນ ເພື່ອຮັກສາຄວາມປອດໄພຂອງໝາຍເລກໂທລະສັບ ສັງຄົມຍັງມີຄວາມຂ້ອງໃຈ.

4. ຂົງເຂດປ້ອງກັນຊາດ-ປ້ອງກັນຄວາມສະຫງົບ: ການປະຕິບັດວາລະແຫ່ງຊາດ ວ່າດ້ວຍຢາເສບຕິດ ບໍ່ທັນໄດ້ດີ ແລະ ເຂັ້ມງວດ ສັງຄົມຍັງພົບເຫັນປະກົດການຫຍໍ້ທໍ້ຕ່າງໆຫຼາຍຮູບແບບ ສ້າງຄວາມບໍ່ສະຫງົບໃນສັງຄົມ.

5. ຂົງເຂດຕຸລາການ: ສະຕິຕໍ່ກົດໝາຍຂອງພະນັກງານ ແລະ ປະຊາຊົນຈໍານວນໜຶ່ງບໍ່ສູງ, ການລ່ວງໄຟອໍານາດ ຕາມຈຸດຕ່າງໆ ເສັ້ນທາງພາຍໃນແຂວງ ຍັງພົບເຫັນຫຼາຍ.

ຄຽງຄູ່ກັບປະກົດການຫຍໍ້ທໍ້ທີ່ກ່າວມາຂ້າງເທິງນັ້ນ, ຄະນະພັກອໍານາດການປົກຄອງແຂວງ ກໍໄດ້ມີຄວາມຕັກສິນໃຈຜ່ານຜ່າ ແລະ ຊອກທຸກວິທາງແກ້ໄຂຄືດັ່ງນີ້:

ໜຶ່ງ: ຕ້ອງຍົກສູງບົດບາດ, ໜ້າທີ່ ແລະ ສິດຂອງຄະນະພັກ, ຄະນະພະແນກການ-ອົງການຂັ້ນຕ່າງໆ ໃນການເຮັດວຽກງານການເມືອງ-ແນວຄິດ ໃຫ້ພະນັກງານ, ສະມາຊິກພັກ ໃນຄວາມຮັບຜິດຊອບຂອງຕົນ ຮັບປະກັນບໍ່ໃຫ້ເກີດມີປະກົດການທາງລົບ ອັນຈະພາໃຫ້ເກີດມີຫາງສຽງຂອງສັງຄົມ;

ສອງ: ໃນເມື່ອເກີດມີການສະທ້ອນຄືນວຽກງານຂອງຕົນ ຜ່ານຫາງສຽງສັງຄົມ ຕ້ອງກ້າສັງລວມລາຍງານຕໍ່ຄະນະໂຄສະນາອົບຮົມແຂວງຮັບຊາບ ເພື່ອຈະໄດ້ລາຍງານຕໍ່ຄະນະພັກຂັ້ນເທິງ ຢ່າງທັນການ ຮັບປະກັນເຮັດໃຫ້ຫາງສຽງສັງຄົມ ໄດ້ຮັບການແກ້ໄຂທັນເວລາ;

ສາມ: ພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ ຕ້ອງພ້ອມກັນຍົກສູງສະຕິລະວັງຕົວ ຕໍ່ກົນອຸບາຍການຫັນປ່ຽນໂດຍສັນຕິຂອງສັດຕູ ເພື່ອບໍ່ໃຫ້ຕົກເປັນເຄື່ອງມືຮັບໃຊ້ຢ່າງບໍ່ຮູ້ຕົວ ຮັບປະກັນຄວາມສາມັກຄີພາຍໃນໃຫ້ໜັກແໜ້ນ;

ສີ່: ຕ້ອງໄດ້ຍົກລະດັບຄວາມຮັບຮູ້ຂອງພະນັກງານ ຜູ້ທີ່ຮັບຜິດຊອບວຽກງານນີ້ ຢ່າງເປັນປົກກະຕິຕໍ່ເນື່ອງ ແລະ ຫັນໄປສູ່ວິທະຍາສາດຫຼາຍຂຶ້ນ.

ຂຽນ: ຊິບປະໄຊ