ງານວາງສະແດງຜົນງານ ແລະ ຜະລິດຕະພັນຂອງບັນດາອົງການຈັດຕັ້ງສັງຄົມ ປະຈໍາປີ 2023 ໄດ້ເປີດຂຶ້ນໃນວັນທີ 25 ພະຈິກນີ້ ທີ່ຫໍວັດທະນະທໍາແຫ່ງຊາດນະຄອນຫຼວງວຽງຈັນ ຊຶ່ງມີຫຼາຍກວ່າ 50 ອົງການ ທີ່ເຂົ້າຮ່ວມໂດຍນໍາເອົາຜົນງານທີ່ພົ້ນເດັ່ນຈອງຕົນມາວາງສະແດງ ພາຍໃຕ້ຫົວຂໍ້ໃຫຍ່ ທີ່ວ່າ: “ການແກ້ໄຂບັນຫາການປ່ຽນແຫງດິນຟ້າອາກາດ ແລະ ການສົ່ງເສີມ ການພັດທະນາແບບຍືນຍົງໃນລາວ”.
ເຂົ້າຮ່ວມຕັດແຖບຜ້າເປີດງານໂດຍມີ ທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ, ທ່ານ ນາງ ສະລືວື ເລັງ ຈຸດຣ໌ (Slv-Leng CHUCR) ເອກອັກຄະລັດຖະທູດຝຣັ່ງ ປະຈໍາ ສປປ ລາວ ແລະ ທ່ານ ນາງ ຈັນສີ ພິມມະຈັນ ປະທານສະມາຄົມສົ່ງເສີມສຸຂະພາບຄອບຄົວ ທັງເປັນປະທານຄະນະກຳມະການປະສານງານອົງການຈັດຕັ້ງສັງຄົມ; ພ້ອມນີ້, ກໍມີບັນດາທ່ານທູດ, ຜູ້ຕາງໜ້າຈາກສະຖານທູດປະເທດເພື່ອນມິດ ແລະ ອົງການຈັດຕັ້ງສາກົນຕ່າງໆ ປະຈໍາລາວ ເຂົ້າຮ່ວມ.
ຈຸດປະສົງຂອງງານຄັ້ງນີ້, ກໍເພື່ອເປັນການສະແດງຜົນງານ, ສິນຄ້າ ລວມເຖິງຜະລິດຕະພັນຕ່າງໆຂອງບັນດາອົງການຈັດຕັ້ງສັງຄົມໃນລາວ ລວມເຖິງສິນຄ້າ ແລະ ຜະລິດຕະພັນຂອງຊາວບ້ານ; ນອກນີ້, ກໍເພື່ອສ້າງເວທີແລກປ່ຽນຄວາມຮູ້ໃນຫົວຂໍ້ຕ່າງໆ ຢ່າງສ້າງສັນ ແລະ ມີບັນຍາກາດ ຊຶ່ງຫົວຂໍ້ໃຫຍ່ນັ້ນ ໄດ້ມີຫຼາຍຫົວຂໍ້ຍ່ອຍ ຊຶ່ງແມ່ນຫົວຂໍ້ທີ່ເຊື່ອມສານຂອງງານ ທີ່ຖືກກັບໄລຍະສັບປະດາຂອງການຢຸດຕິການໃຊ້ຄວ່ມຮຸນແຮງຕໍ່ແມ່ຍິງ ແລະ ເດັກຍິງ ສົນທະນາແລກປ່ຽນຄວາມຮູ້ ໂດຍຈະມີຫົວຂໍ້ “ການປູກຈິດສຳນຶກ ຫົວຂໍ້ 16 ມື້ ຮ່ວມກັນ! ລົງທຶນເພື່ອປ້ອງກັນ ແລະ ແກ້ໄຂການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ (EVAW Campaign)”; ມີການໃຫ້ຄວາມຮູ້ດ້ານການພັດທະນາແບບຍືນຍົງ, ການໃຫ້ຄວາມຮູ້ດ້ານຄວາມຍຸຕິທໍາທາງດ້ານດິນຟ້າອາກາດ ແລະ ການດຳລົງຊີວິດ. ນອກນີ້, ກໍຍັງມີກິດຈະກຳຖາມ-ຕອບ, ມີການສະແດງດົນຕີ, ຂັບລໍາ, ຟ້ອນ, ຮ້ອງເພງ ລວມເຖິງການສົນທະນາ ແລະ ການສະແດງລະຄອນເວລທີ ທີ່ມີເນື້ອໃນກ່ຽວກັບບັນຫາສັງຄົມ ທີ່ເຄີຍພົບເຫັນມາ ເຊັ່ນ: ຄວາມຮຸນແຮງຕໍ່ແມ່ຍິງ ແລະ ບົດບາດຍິງ-ຊາຍ. ງານດັ່ງກ່າວ,ດຳເນີນເປັນເວລາ 2 ວັນ (25-26 ພະຈິກ 2023) ຊຶ່ງຄະນະຜູ້ຈັດງານ ກໍຄາດວ່າຈະມີຜູ້ເຂົ້າມາງານເຖິງ 1.000 ຄົນ.
ທ່ານ ນາງ ຈັນສີ ພິມມະຈັນ ໄດ້ກ່າວວ່າ: ງານຄັ້ງນີ້ ເປັນເວທີໃຫ້ກັບບັນດາຄູ່ຮ່ວມພັດທະນາ ທີ່ເຮັດວຽກຢູ່ ສປປ ລາວ ຊຶ່ງໄດ້ເປັນການຢັ້ງຢືນໃຫ້ເຫັນເຖິງການມີສ່ວນຮ່ວມຂອງການປະກອບສ່ວນຢ່າງຫຼວງຫຼາຍຂອງອົງການຈັດຕັ້ງສັງຄົມລາວ ໃນທົ່ວຂະແໜງການຕ່າງໆ. ງານນີ້, ຍັງເປັນການເປີດໂອກາດໃຫ້ສັງຄົມ ຮັບຮູ້ເຖິງບົດບາດຂອງອົງການຈັດຕັ້ງສັງຄົມລາວ ແລະ ສົ່ງເສີມສະພາບແວດລ້ອມ ທີ່ເຂົາເຈົ້າສາມາດປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມແຫ່ງຊາດ, ການຫຼຸດພົ້ນຄວາມທຸກຍາກ ແລະ ການຫັນປະເທດໄປສູ່ສະຖານະພາບພົ້ນຈາກຄວາມດ້ອຍພັດທະນາ.
ຄະນະກຳມະການປະສານງານອົງການຈັດຕັ້ງສັງຄົມລາວ (LCCC) ໄດ້ຈັດງານສະແດງຜົນງານຄັ້ງນີ້ ເປັນຄັ້ງທີ 5 ແລ້ວ ຊຶ່ງຄັ້ງທີ 1 ແມ່ນຈັດໃນປີ 2018 ໂດຍແຕ່ລະຄັ້ງກໍມີການເຂົ້າຮ່ວມເພີ່ມຂຶ້ນ ແລະ ນີ້ກໍເປັນການຢັ້ງຢືນເຖິງການຂະຫຍາຍຕົວຂອງອົງການຈັດຕັ້ງສັງຄົມລາວ ໃນຂະແໜງການຕ່າງໆ ທົ່ວປະເທດ. LCCC ເປັນເຈົ້າພາບຈັດງານວາງສະແດງຜົນງານ ປີ 2023 ດ້ວຍການຮ່ວມທຶນສະໜັບສະໜູນ ໂດຍ ປະເທດຝຣັ່ງ, ເຢຍລະມັນ, ສະວິດເຊີແລນ, ສະຫະພາບເອີຣົບ ໃນນາມໂຄງການ CEGGA ແລະ Oxfam.
(ຂ່າວ-ພາບ: ສຸກສະຫວັນ)
ຄໍາເຫັນ