ທ່ານນາງ ນາລີ ສີສຸລິດ ກ່າວວ່າ: ການຈັດງານຄັ້ງນີ້, ເພື່ອສະເຫຼີມສະຫຼອງວັນເດັກນ້ອຍສາກົນ, ວັນປູກຕົ້ນໄມ້ແຫ່ງຊາດພ້ອມທັງລະດົມທຶນຊ່ວຍເຫຼືອເດັກນ້ອຍ SOS ລາວ ກໍຄືເດັກດ້ອຍໃນຂອບເຂດທົ່ວປະເທດຊຶ່ງເດັກນ້ອຍໃນມື້ນີ້ຈະກາຍເປັນຜູ້ໃຫຍ່ໃນມື້ໜ້າຖ້າຫາກເດັກໄດ້ຮັບການເບິ່ງແຍງດູແລ ແລະ ສຶກສາອົບຮົມບົ່ມສອນທີ່ດີຈະເປັນກໍາລັງແຮງປະກອບສ່ວນເຂົ້າໃນການພັດທະນາປະເທດຊາດໃຫ້ຈະເລີນກ້າວໜ້າໃນອະນາຄົດ. ຍ້ອນເຫັນໄດ້ຄວາມສໍາຄັນດັ່ງກ່າວບັນດາປະຊາຊາດໃນທົ່ວໂລກຈຶ່ງພ້ອມກັນຈັດງານສະເຫຼີມສະຫຼອງວັນເດັກນ້ອຍຂຶ້ນໃນແຕ່ລະປີ ພັກ-ລັດຖະບານແຫ່ງສປປ ລາວ ເວລາໃດກໍໄດ້ເອົາໃຈໃສ່ ແລະ ໃຫ້ຄວາມສໍາຄັນຕໍ່ວຽກງານການພັດທະນາສຸຂະພາບ ແລະ ການສຶກສາສໍາລັບເດັກ ການປົກປ້ອງສິດ ແລະ ຜົນປະໂຫຍດອັນຊອບທໍາຂອງເດັກ ຮັບປະກັນສິດທິພື້ນຖານຂອງເດັກດ້ວຍການສ້າງທຸກເງື່ອນໄຂໃຫ້ເດັກໄດ້ຮັບການພັດທະນາຢ່າງຮອບດ້ານ ແນໃສ່ເຮັດໃຫ້ເດັກມີຄວາມສົມບູນທາງດ້ານຮ່າງກາຍ ຈິດໃຈ ແລະ ມັນສະໝອງ ມີຄຸນສົມບັດ ຄວາມຮູ້ ແລະ ຄວາມສາມາດ ເປັນອະນຸຊົນ ເຍົາວະຊົນ ຊາວໜຸ່ມ ແລະ ກາຍເປັນຜູ້ສືບທອດທີ່ດີຂອງຊາດ, ໂຄງການບ້ານຊ່ວຍເຫຼືອເດັກນ້ອຍ SOS ລາວເປັນໜຶ່ງໃນໂຄງການອັນລໍ້າຄ່າທີ່ທາງອົງການ SOS ສາກົນໄດ້ມອບໃຫ້ລັດຖະບານເປັນຜູ້ດູແລເດັກນ້ອຍທີ່ຂາດການເບິ່ງແຍງ ລ້ຽງດູຈາກພໍ່ແມ່ ແລະ ເດັກທີ່ມີຄວາມສ່ຽງທີ່ຈະສູນເສຍການເບິ່ງແຍງຈາກຜູ້ປົກຄອງໃຫ້ໄດ້ຮັບການຊ່ວຍເຫຼືອ ມີທີ່ຢູ່ອາໄສ ມີສຸຂະພາບທີ່ດີເຕີບໃຫຍ່ໃນສະພາບແວດລ້ອມທີ່ປອດໄພ. ຕະຫຼອດໄລຍະຜ່ານມາ, ເດັກນ້ອຍເຫຼົ່ານີ້ໄດ້ຮັບຄວາມຮັກຄວາມອົບອຸ່ນຈາກພໍ່ແມ່ ອ້າຍເອື້ອຍນ້ອງໃນບ້ານຊ່ວຍເຫຼືອເດັກນ້ອຍSOS ປຽບເໝືອນຄົນພາຍໃນຄອບຄົວດຽວກັນ ມີຄວາມຮັກແພງ ມີການແບ່ງປັນ ເຄົາລົບສິດເຊິ່ງກັນ ແລະ ກັນ ແລະ ສ້າງສາຍສໍາພັນຄອບຄົວຮ່ວມກັນດ້ວຍຄວາມອົບອຸ່ນ.
ພາຍໃນງານໄດ້ມີກິດຈະກຳສະແດງສິລະປະເພື່ອສ້າງຄວາມເບີກບານມ່ວນຊື່ນໃຫ້ຜູ້ເຂົ້າຮ່ວມ ພ້ອມທັງມອບຂອງຂວັນເຂົ້າໜົມ, ນົມເພື່ອເປັນຂວັນກຳລັງໃຈໃຫ້ຫຼານນ້ອຍ ຊຶ່ງຈະເປັນອະນາຄົດຂອງຊາດໃນຕໍ່ໜ້າ.
ຂ່າວ: ນາງ ອົ້ນ
ຄໍາເຫັນ