ບໍລິສັດ COMAC ນໍາສະເໜີເຮືອບິນ C919 ແລະ ARJ21 ຢູ່ ນວ

ໃນວັນທີ 4 ມີນາ ນີ້ ໄດ້ມີພິທີນຳສະເໜີ ເຮືອບິນ 2 ລໍາ ຄື: ເຮືອບິນ C919 ແລະ ARJ21 ຂອງບໍລິສັດ COMAC (ສປ ຈີນ) ຢູ່ສະໜາມບິນສາກົນວັດໄຕ ນະຄອນຫຼວງວຽງຈັນ (ນວ) ສປປ ລາວ. ອີງຕາມແຜນການບິນ, ເຮືອບິນ ARJ21 ແລະ C919 ຂອງ COMAC ຈະດໍາເນີນການ ຖ້ຽວບິນສາທິດຢູ່ 5 ປະເທດ ຄື: ສສ ຫວຽດນາມ, ສປປ ລາວ, ກຳປູເຈຍ, ມາເລເຊຍ ແລະ ອິນໂດເນເຊຍ. ທັງນີ້, ແນໃສ່ຢັ້ງຢືນຄວາມສາມາດໃນການປັບຕົວຂອງເຮືອບິນ, ສະໜາມບິນ ແລະ ເສັ້ນທາງບິນ ໃນ 5 ປະເທດດັ່ງກ່າວ. ທັງເປັນການປະເມີນການປັບຕົວຂອງພື້ນທີ່ສະໜາມບິນ, ອຸປະກອນການບໍລິການ, ການປະເມີນຜົນການປັບຕົວຂອງຂັ້ນຕອນການບິນພິເສດ ແລະ ສະແດງໃຫ້ເຫັນ ຄວາມເປັນໄປໄດ້ທາງເສດຖະກິດຂອງເສັ້ນທາງເຫຼົ່ານີ້. 
ເຮືອບິນໂດຍສານ C919 ແລະ ARJ21 ເປັນເຮືອບິນ ທີ່ ສປ ຈີນ ຜະລິດເອງ ດ້ວຍເຕັກນິກທີ່ທັນສະໄໝ ຊຶ່ງເຮືອບິນ C919 ເປັນເຮືອບິນໂດຍສານຂະໜາດໃຫຍ່, ສາມາດບັນຈຸຜູ້ໂດຍສານໄດ້ 158 ຫາ 192 ຄົນ, ບິນໃນລະດັບສູງເຖິງ 4.075 ຫາ 5.555 ກິໂລແມັດ ແລະ ເຮືອບິນ ARJ21 ບັນຈຸຜູ້ໂດຍສານໄດ້ 78-97 ຄົນ, ບິນໃນລະດັບສູງເຖິງ 2.225-3.700 ກິໂລແມັດ, ເຮືອບິນທັງສອງລໍາ ຮັບຮອງເອົາການອອກແບບລະບົບການຂັບເຄື່ອນ ແລະ ວັດສະດຸທາງອາກາດທີ່ກ້າວໜ້າ ແລະ ຮັກສາສິ່ງແວດລ້ອມ. ການອອກແບບຫ້ອງຜູ້ໂດຍສານມີສະພາບແວດລ້ອມໃນການຂັບຂີ່ທີ່ສະດວກສະບາຍ.
ພາຍໃນ C919 ແລະ ARJ21 ປະກອບມີບ່ອນນັ່ງຜູ້ໂດຍສານຊັ້ນທຸລະກິດ ແລະ ຊັ້ນທໍາມະດາ, ບ່ອນມ້ຽນກະເປົາ, ເຄື່ອງປັບອາກາດ, ບ່ອນນັ່ງຜູ້ໂດຍສານດ້ວຍລະບົບສໍາພັດມື, ຫ້ອງນໍ້າ,  ປະຕູສຸກເສີນ ແລະ ສິ່ງອໍານວຍຄວາມສະດວກຕ່າງໆ ໃຫ້ຜູ້ໂດຍສານເດີນທາງດ້ວຍຄວາມສະດວກ ແລະ ປອດໄພ, ໃນໂອກາດດຽວກັນ, ເຮືອບິນ ARJ21 ຍັງໄດ້ບິນທົດລອງ ໄປ-ກັບນະຄອນຫຼວງວຽງຈັນ ຫາ ນະຄອນ-ຫຼວງພະບາງ ຕື່ມອີກ.
ຂ່າວ: ຂປລ.