ຂ່າວລະບຸວ່າ: ທ່ານ ອຳຣານ ໂມຮາເໝັດ ຊິນ ເລຂາທິການໃຫຍ່ ກະຊວງການຕ່າງປະເທດ ມາເລເຊຍ ກ່າວຄຳເຫັນໃນກອງປະຊຸມຖະແຫຼງຂ່າວວ່າ: ມີທັງໝົດ 29 ລາຍການໄດ້ຮັບການສ້າງຂຶ້ນສະເພາະໃຫ້ບັນດາພາກສ່ວນທີ່ແຕກຕ່າງກັນຂອງສັງຄົມ, ລວມທັງປະຊາຄົມຊົນນະບົດ, ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSME), ຊາວໜຸ່ມ, ແມ່ຍິງ, ຄົນພິການ, ຜູ້ອາຍຸສູງ ແລະ ເດັກນ້ອຍ. ທ່ານກ່າວຕື່ມວ່າ: ນີ້ແມ່ນໂຄງການດຳເນີນງານແຫ່ງຊາດ, ຮຽກຮ້ອງໃຫ້ປະຊາຊົນ ມາເລເຊຍ ທຸກຄົນເຂົ້າຮ່ວມ, ລວມທັງບັ້ນໂຄສະນາສິນຄ້າ ໂດຍ ມາເລເຊຍ ຜະລິດ, ເວທີປາໄສ ອາຊຽນ + 3 ເພື່ອແນໃສ່ມອບສິດໃຫ້ແກ່ແມ່ຍິງຊົນນະບົດ, ກອງປະຊຸມສຸດຍອດຊາວໜຸ່ມ ອາຊຽນ ແລະ ງານວາງສະແດງ Halal ສາກົນ ມາເລເຊຍ ຄັ້ງພິເສດ (MIHAS), ກໍຄືບັນດາຂໍ້ລິເລີ່ມສະເພາະແກ່ນັກຮຽນມັດທະຍົມ ແລະ ນັກສຶກສາມະຫາວິທະຍາໄລ. ບັນດາການເຄື່ອນໄຫວ ແລະ ໂຄງການນີ້ ລ້ວນແຕ່ເໝາະສົມກັບວິໄສທັດກ່ຽວກັບປະຊາຄົມ ອາຊຽນ ຖືປະຊາຊົນເປັນໃຈກາງ, ກໍຄືຫົວຂໍ້ຂອງປະທານ ອາຊຽນ 2025 ແມ່ນ “ກວມລວມ ແລະ ຍືນຍົງ”.
ໂດຍຈະມີທັງໝົດ 357 ກອງປະຊຸມທີ່ກ່ຽວຂ້ອງເຖິງອາຊຽນ ຊຶ່ງຈະດຳເນີນໃນປີນີ້ທົ່ວໂລກ, ລວມມີ 14 ກອງປະຊຸມສຸດຍອດ ທີ່ມີການເຂົ້າຮ່ວມຂອງການນຳບັນດາປະເທດ ແລະ ລັດຖະບານ. ກອງປະຊຸມສຸດຍອດ ອາຊຽນ ຄັ້ງທີ 46 ຄາດວ່າຈະດຳເນີນໃນກາງປີ, ພ້ອມດຽວກັນນັ້ນ ກໍມີກອງປະຊຸມສຸດຍອດ ອາຊຽນ - ສະພາຮ່ວມມືເຂດອ່າວ (GCC) - ຈີນ, ໃນຂະນະທີ່ກອງປະຊຸມສຸດຍອດ ອາຊຽນ ຄັ້ງທີ 47 ຈະໄດ້ຈັດຂຶ້ນໃນທ້າຍປີນີ້.
ຄໍາເຫັນ