ນັບຕັ້ງແຕ່ໄດ້ຮັບການສ້າງຕັ້ງຂຶ້ນໃນປີ 2016 ເປັນຕົ້ນມາ, ຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ (ຊຶ່ງປະກອບມີ ກຳປູເຈຍ, ຈີນ, ສປປ ລາວ, ມຽນມາ, ໄທ ແລະ ຫວຽດນາມ) ໄດ້ມີການຂະຫຍາຍຕົວຈາກວິໄສທັດ ມາເປັນການຮ່ວມມືທີ່ຕັ້ງໜ້າ ແລະ ເນັ້ນໃສ່ໝາກຜົນຕົວຈິງ. ໃນທົດສະວັດຜ່ານມາ, ພາຍໃຕ້ຫຼັກການທີ່ເນັ້ນການເປັນເອກະພາບ, ຄວາມສະເໝີພາບ ແລະ ຜົນປະໂຫຍດຮ່ວມກັນ, MLC ໄດ້ກາຍມາເປັນຕົວແບບຊັ້ນນຳຂອງຄວາມສາມັກຄີໃນພາກພື້ນ, ການໃຫ້ກຽດຊຶ່ງກັນ ແລະ ກັນ, ແລະ ຄວາມຈະເລີນຮຸ່ງເຮືອງຮ່ວມກັນ.
ຕະຫຼອດໄລຍະ 10 ປີ ຜ່ານມາ, ຄວາມມຸ່ງໝັ້ນພະຍາຍາມຂອງພວກເຮົາ ໄດ້ນຳໄປສູ່ຄວາມຄືບໜ້າທີ່ສຳຄັນໃນ 5 ຂົງເຂດບຸລິມະສິດ ຄື: ການເຊື່ອມຈອດ, ການຮ່ວມມືດ້ານກຳລັງການຜະລິດ, ການຮ່ວມມືດ້ານເສດຖະກິດຂ້າມແດນ, ການຄຸ້ມຄອງຊັບພະຍາກອນນ້ຳ, ການພັດທະນາກະສິກຳ ແລະ ການລຶບລ້າງຄວາມທຸກຍາກ. ຄວາມພະຍາຍາມເຫຼົ່ານີ້ ບໍ່ພຽງແຕ່ນຳຜົນປະໂຫຍດມາສູ່ປະເທດສະມາຊິກໃນພາກພື້ນ, ແຕ່ຍັງໄດ້ຊ່ວຍການແກ້ໄຂສິ່ງທ້າທາຍທີ່ສຳຄັນ ເປັນຕົ້ນແມ່ນການແຜ່ລະບາດຂອງພະຍາດ, ການປ່ຽນແປງສະພາບພູມອາກາດ ແລະ ຄວາມຫຍຸ້ງຍາກທາງດ້ານເສດຖະກິດ ຊຶ່ງໄດ້ສະແດງໃຫ້ເຫັນເຖິງພະລັງແຫ່ງຄວາມສາມັກຄີ ແລະ ຄວາມເຂັ້ມແຂງຮ່ວມກັນຂອງພວກເຮົາ.
ໃນຂະນະທີ່ພວກເຮົາກ້າວໄປຂ້າງໜ້າ, ໝາກຜົນຂອງກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 4 ແລະ ບັນດາຂໍ້ລິເລີ່ມທີ່ໄດ້ກຳນົດໄວ້ໃນແຜນປະຕິບັດງານ 5 ປີ (2023-2027) ໄດ້ກຳນົດວິໄສທັດອັນຈະແຈ້ງ ເພື່ອຮັດແໜ້ນສາຍພົວພັນຂອງພວກເຮົາໃຫ້ເລິກເຊິ່ງກວ່າເກົ່າ. ສປປ ລາວ ຈະສືບຕໍ່ປະກອບສ່ວນຢ່າງເຕັມທີ່ຕໍ່ແຜນປະຕິບັດງານດັ່ງກ່າວ ແລະ ຈະເພີ່ມທະວີການຈັດຕັ້ງປະຕິບັດບັນດາຂໍ້ລິເລີ່ມເສັ້ນທາງສາຍໄໝສີຂຽວ, ການພັດທະນາແລວທາງນະວັດຕະກຳ, ການຮັດແໜ້ນການຮ່ວມມືດ້ານສາທາລະນະສຸກ, ການນຳໃຊ້ທ່າແຮງຂອງເສດຖະກິດດີຈີຕອນ ແລະ ຂົງເຂດບຸລິມະສິດອື່ນໆ ຢ່າງມີປະສິດທິຜົນ ເພື່ອຮັບປະກັນສະຖຽນລະພາບ, ຄວາມຈະເລີນຮຸ່ງຮືອງ ແລະ ການພັດທະນາແບບຍືນຍົງໃນທົ່ວພາກພື້ນ.
ສຳລັບ ສປປ ລາວ, ພວກເຮົາໄດ້ຮັບຜົນປະໂຫຍດຢ່າງຫຼວງຫຼາຍຈາກຂອບການຮ່ວມມື MLC, ຜ່ານບັນດາຂໍ້ລິເລີ່ມທີ່ໄດ້ຮັບທຶນສະໜັບສະໜູນຈາກກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ, ພວກເຮົາໄດ້ຮັບການອະນຸມັດໂຄງການ ທັງໝົດ 100 ໂຄງການ, ລວມມູນຄ່າປະມານ 26 ລ້ານໂດລາ. ບັນດາໂຄງການເຫຼົ່ານີ້ແມ່ນໄດ້ແນໃສ່ການປັບປຸງພື້ນຖານໂຄງລ່າງ, ສົ່ງເສີມການພັດທະນາຊັບພະຍາກອນມະນຸດ, ເສີມສ້າງການຄຸ້ມຄອງຊັບພະຍາກອນນ້ຳ ແລະ ປັບປຸງການເຊື່ອມຈອດ, ພ້ອມທັງສະໜັບສະໜູນວຽກງານສາທາລະນະສຸກ ແລະ ການຫຼຸດຜ່ອນຄວາມທຸກຍາກ. ຄວາມພະຍາຍາມໃນການຮ່ວມມືເຫຼົ່ານີ້ ບໍ່ພຽງແຕ່ໄດ້ຕອບສະໜອງຄວາມຕ້ອງການໃນດ້ານການພັດທະນາເທົ່ານັ້ນ, ແຕ່ຍັງໄດ້ສ້າງຂີດຄວາມສາມາດທີ່ຈຳເປັນໃຫ້ແກ່ການເຕີບໂຕທາງດ້ານເສດຖະກິດ-ສັງຄົມ ໃນໄລຍະຍາວ ແລະ ໄດ້ຊ່ວຍຍົກລະດັບຊີວິດການເປັນຢູ່ຂອງປະຊາຊົນພວກເຮົາໃຫ້ດີຂຶ້ນ.
ໃນໂອກາດນີ້, ສປປ ລາວ ຂໍສະແດງຄວາມຂອບໃຈຢ່າງສູງ ມາຍັງລັດຖະບານ ແຫ່ງ ສາທາລະນະລັດ ປະຊາຊົນຈີນ ທີ່ໄດ້ໃຫ້ການຮ່ວມມື ແລະ ການປະກອບສ່ວນອັນສຳຄັນເຂົ້າໃນກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ ຊຶ່ງໄດ້ນຳເອົາຜົນປະໂຫຍດຕົວຈິງມາສູ່ປະຊາຊົນໃນອະນຸພາກພື້ນແມ່ນ້ຳຂອງ. ການມີສ່ວນຮ່ວມຢ່າງຫ້າວຫັນ ແລະ ຕໍ່ເນື່ອງຂອງພວກເຮົາໃນຂອບການຮ່ວມມືນີ້ ແມ່ນການຢັ້ງຢືນເຖິງຄວາມມຸ່ງໝັ້ນອັນໜັກແໜ້ນຕໍ່ກັບການຮ່ວມມື ແລະ ຜົນປະໂຫຍດຮ່ວມກັນ ຂອງບັນດາປະເທດສະມາຊິກແມ່ນ້ຳຂອງ-ແມ່ນ້ຳລ້ານຊ້າງ ທັງໝົດ.
ໃນຂະນະທີ່ພວກເຮົາຮ່ວມກັນສະເຫຼີມສະຫຼອງວາລະຄົບຮອບ 10 ປີນີ້, ຂໍໃຫ້ພວກເຮົາພ້ອມກັນຢັ້ງຢືນເຖິງຄວາມມຸ່ງໝັ້ນຕໍ່ກັບ "ປະຊາຄົມແຫ່ງອະນາຄົດຮ່ວມກັນ" ແລະ ບັນລຸວິໄສທັດຍຸດທະສາດສຳລັບ 10 ປີຕໍ່ໜ້າ ແຫ່ງການພັດທະນາທີ່ມີຄຸນນະພາບສູງ. ຂໍໃຫ້ 10 ປີຕໍ່ໜ້ານີ້ ຈົ່ງເປັນທົດສະວັດທີ່ຮຸ່ງເຮືອງສີວິໄລກວ່າເກົ່າ, ມີສ່ວນຮ່ວມຫຼາຍຂຶ້ນ ແລະ ມີຄວາມຍືນຍົງຍິ່ງໆຂຶ້ນກວ່າໄລຍະທີ່ຜ່ານມາ.
ຄໍາເຫັນ