ໃຫ້ກຽດເຂົ້າຮ່ວມ, ມີ ທ່ານ ທະນູສອນ ພົນອາມາດ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ທ່ານ ຊູ່ ບີນ ຮອງຫົວໜ້າສູນການຄ້າສາກົນ ສປ ຈີນ, ທ່ານ ຫານ ເຢ້ ເລຂາເອກທີ່ປຶກສາເສດຖະກິດການຄ້າ ສປ ຈີນ ປະຈໍາລາວ, ບັນດາທ່ານແຂກຖືກເຊີນທີ່ກ່ຽວຂ້ອງທັງສອງຝ່າຍ ຈາກ ສປປ ລາວ ແລະ ສປ ຈີນ.
ທ່ານ ທະນູສອນ ພົນອາມາດ ກ່າວວ່າ: ສະພາການຄ້າ ແລະ ອຸດສາຫະກໍາແຫ່ງຊາດ (ສຄອຊ) ໃຫ້ຄວາມສໍາຄັນຫຼາຍໃນການຮ່ວມມືກັບ ສປ ຈີນ, ໂດຍສະເພາະໄດ້ຮ່ວມກັບກະຊວງອຸດສາຫະກຳແລະການຄ້າລະດົມບັນດາຫົວໜ່ວຍທຸລະກິດເຂົ້າຮ່ວມງານວາງສະແດງຕ່າງໆຢູ່ ສປ ຈີນຢ່າງຕັ້ງໜ້າ. ງານດັ່ງກ່າວເປັນເວທີທີ່ສຳຄັນໃນການໂຄສະນາວັດທະນະທຳທີ່ເປັນເອກະລັກຂອງລາວ, ການວາງສະແດງສິນຄ້າ,ການເຂົ້າຫາຕະຫຼາດ ແລະ ຊອກຊື້ສິນຄ້າເພື່ອມາດຳເນີນທຸລະກິດໃນ ສປປ ລາວຊຶ່ງເວທີດັ່ງກ່າວໄດ້ຊ່ວຍເພີ່ມທະວີການພົວພັນສອງປະເທດ, ຊຸກຍູ້ການຄ້າສອງຝ່າຍ, ດຶງດູດການລົງທຶນຂອງຈີນເຂົ້າມາໃນລາວ.
ງານວາງສະແດງ ນຳເຂົ້າ-ສົ່່ງອອກ ສປຈີນ ຄັ້ງທີ 137 ຫຼືCantan fair ແມ່ນງານໜຶ່ງທີ່ມີຊື່ສຽງ ແລະ ເປັນເວທີທີ່ສຳຄັນໃນການສົ່ງເສີມການຮ່ວມມືການຄ້າໃນທົ່ວໂລກ. ການຈັດກອງປະຊຸມເຜີຍແຜ່ງານCantanfair ແມ່ນເປັນໂອກາດອັນດີໃຫ້ແກ່ ສປປ ລາວ ເພື່ອຈະໄດ້ເຂົ້າໃຈເລິກເຊິ່ງຂຶ້ນກ່ຽວກັບງານດັ່ງກ່າວ, ໂດຍສະເພາະວິທີສະໝັກເຂົ້າຮ່ວມວາງສະແດງ ແລະ ເຂົ້າຮ່ວມຊົມງານຊຶ່ງຈະເປີດໂອກາດໃຫ້ຫົວໜ່ວຍທຸລະກິດສາມາດໂຄສະນາສິນຄ້າຂອງຕົນ ແລະ ສາມາດຈັບຈອງສິນຄ້າທີ່ຕົນເອງຕ້ອງການເພື່ອມາປະກອບເຂົ້າໃນທຸລະກິດຂອງຕົນ, ຂ້າພະ ເຈົ້າຫວັງວ່າບັນດາທ່ານທີ່ເຂົ້າຮ່ວມກອງປະຊຸມໃນມື້ນີ້ຈະເຂົ້າໃຈເລິກເຊິ່ງຂຶ້ນກ່ຽວກັບງານດັ່ງກ່າວ, ຖ້າມີບັນຫາໃດບໍ່ຊັດເຈນກໍສາມາດສອບຖາມກັບ ສູນສົ່ງເສີມການຄ້າ ແຂວງກວາງຕົ່ງ ສປ ຈີນ ໃນທີ່ປະຊຸມໄດ້.
ທ່ານ ຫານ ເຢ້ ກ່າວວ່າ: ຈີນ-ລາວ ເປັນປະເທດ ບ້ານໃກ້ເຮືອນຄຽງທີ່ດີ, ມີສາຍພູ, ສາຍນໍ້າຕິດຈອດກັນ, ປະເທດຈີນ ມີຄວາມຍິນດີຕ້ອນຮັບສິນຄ້າລາວເຂົ້າສູ່ຕະຫຼາດຈີນຫຼາຍຂຶ້ນ. ປັດຈຸບັນ ການຮ່ວມມື ຈີນ-ລາວ ພວມພັດທະນາໄປຢ່າງບໍ່ຢຸດຢັ້ງ, ການລິເລີ່ມ ໜຶ່ງເສັ້ນທາງ ໜຶ່ງແລວທາງ ພວມມີບາດກ້າວໃໝ່, ຈີນເປີດປະຕູສູ່ພາຍນອກ ດ້ວຍຄຸນນະພາບສູງ.
ທ່ານ ຈັນສະໝອນ ສີສະອາດ ຮອງຫົວໜ້າກົມສົ່ງເສີມການຄ້າ ແລະ ຫັດຖະກຳ ກະຊວງອຸດສາຫະກໍາ ແລະ ກ້ານຄ້າ ກ່າວວ່າ: ຈຸດປະສົງກອງປະຊຸມ, ແມ່ນເພື່ອຊຸກຍູ້ສົ່ງເສີມການຮ່ວມມືດ້ານການຄ້າ ແລະ ການລົງທຶນຂອງສອງຝ່າຍ ລາວ-ຈີນ (ແຂວງກວາງໂຈ) ໃຫ້ນັບມື້ເພີ່ມທະວີຂຶ້ນ ໂດຍພື້ນຖານການຮ່ວມມືຂອງສອງຝ່າຍຕ່າງຝ່າຍຕ່າງມີຜົນ ພ້ອມກັນສ້າງເສດຖະກິດ ຂອງປະເທດໃຫ້ມີຄວາມເຂັ້ມແຂງ, ຮັ່ງມີ ແລະ ມີຄວາມໝັ້ນຄົງຢ່າງບໍ່ຢຸດຢັ້ງ. ພາຍໃຕ້ການຮ່ວມມື ຂອງລັດຖະບານຂອງສອງປະເທດ ໄດ້ມີການຊຸກຍູ້ສົ່ງເສີມການຮ່ວມມືແບບຮອບດ້ານເພື່ອສ້າງຄວາມເຂັ້ມແຂງ ແລະ ຄວາມຈະເລີນກ້າວໜ້າໃຫ້ກັບປະເທດຊາດ, ສ້າງຄວາມເປັນຢູ່ທີ່ດີຂຶ້ນໃຫ້ກັບປະຊາຊົນຂອງສອງຊາດ ແລະ ສ້າງຄວາມເຊື່ອໝັ້ນໃຫ້ກັບນັກທຸລະກິດ ຂອງທັງສອງປະເທດ ໄດ້ຮ່ວມກັນລົງທຶນຄ້າ-ຂາຍຮ່ວມກັນ. ກວາງໂຈ ເປັນເມືອງຫຼວງຂອງມົນທົນກວາງຕຸ້ງ ແລະ ເປັນເມືອງທີ່ໃຫຍ່ທີ່ສຸດໃນພາກໃຕ້ຂອງຈີນ ແລະ ເປັນສູນກາງດ້ານການຄ້າ ແລະ ການຂົນສົ່ງທີ່ໃຫຍ່ທີ່ສຸດ ມີພື້ນຖານເສດຖະກິດທີ່ເຂັ້ມແຂງ, ສຳລັບງານວາງສະແດງ Canton Fair (ງານວາງສະແດງສິນຄ້າ ນຳເຂົ້າ ແລະ ສົ່ງອອກຂອງຈີນ) ເປັນງານວາງສະແດງທີ່ເກົ່າແກ່ ແລະ ຍິ່ງໃຫຍ່ ຂອງ ສປ ຈີນຊຶ່ງຈະມີຫຼາຍປະເທດເຂົ້າຮ່ວມໃນງານນີ້, ເພື່ອຊອກຫາຊ່ອງທາງ ແລະ ໂອກາດໃນການຄ້າຂາຍ, ລົງທຶນ.
(ຂ່າວ-ພາບ: ແສງຈັນ)
ຄໍາເຫັນ