 |
ຈາກຄວາມເຂັ້ມແຂງ ແລະ ການຂະຫຍາຍຕົວຢ່າງໄວວາ, ໃນປີ 2025 ໄດ້ຍົກລະດັບສ້າງຕັ້ງເປັນ "ສະຫະກອນ ຜະລິດເສັ້ນເຝີພັດທະນາຊຸມຊົນ ດອນຂະເໝົາ" ຢ່າງເປັນທາງການ. ປັດຈຸບັນ ມີສະມາຊິກເພີ່ມຂຶ້ນເຖິງ 48 ຄອບຄົວ, ມີກຳລັງແຮງງານທັງໝົດ 144 ຄົນ (ຍິງ 48 ຄົນ) ແລະ ມີໂຮງງານຜະລິດເສັ້ນເຝີກວມເອົາ 4 ບ້ານ (ບ້ານຂະເໝົາໂພນຈໍາປາ, ຂະເໝົາພູແມວ, ຂະເໝົາປາກເຊ, ແລະ ລົບປາກດີກາງ) ລວມທັງໝົດ 22 ແຫ່ງ.
ໃນໄລຍະ 6 ເດືອນຕົ້ນປີ 2026 ຜ່ານມາ, ສະຫະກອນສາມາດຜະລິດເສັ້ນເຝີໄດ້ສະເລ່ຍ 288 ໂຕນ/ເດືອນ (ມູນຄ່າ 7.2 ຕື້ກີບ/ເດືອນ), ລວມ 6 ເດືອນ ສາມາດຜະລິດໄດ້ທັງໝົດ 1,728 ໂຕນ ສ້າງລາຍຮັບໄດ້ເຖິງ 43 ພັນລ້ານກີບ, ປະຕິບັດໄດ້ 90% ຂອງແຜນການປີ ແລະ ເພີ່ມຂຶ້ນ 9% ຖ້າທຽບໃສ່ໄລຍະດຽວກັນຂອງປີຜ່ານມາ. ນອກຈາກຕົວເລກທາງເສດຖະກິດທີ່ໂດດເດັ່ນແລ້ວ, ເສັ້ນເຝີດອນຂະເໝົາຍັງໄດ້ເຂົ້າຮ່ວມງານວາງສະແດງທັງລະດັບເມືອງ ແລະ ແຂວງ ລວມ 7 ຄັ້ງ, ທີ່ສໍາຄັນແມ່ນສາມາດຍາດໄດ້ອັນດັບທີ 1 ໃນງານວັດພູຈໍາປາສັກ ຈາກ 9 ຕົວເມືອງ ແລະ 1 ນະຄອນ ທົ່ວແຂວງຈຳປາສັກ. ພ້ອມກັນນັ້ນ, ສະຫະກອນຍັງໄດ້ແບ່ງປັນຜົນກຳໄລຄືນສູ່ສັງຄົມ ໂດຍໄດ້ປະກອບສ່ວນຊ່ວຍເຫຼືອວຽກງານສ່ວນລວມພາຍໃນຕາແສງ ແລະ ເມືອງ ເປັນມູນຄ່າຫຼາຍກວ່າ 180 ລ້ານກີບ.
 |
ທ່ານ ໄພທອງ ແສງປະທຸມ ໃຫ້ຮູ້ຕື່ມວ່າ: ຄວາມສໍາເລັດອັນຍິ່ງໃຫຍ່ນີ້ ແມ່ນເກີດຈາກການຊີ້ນຳ-ນຳພາຂອງພັກ-ລັດ, ຜ່ານມາໄດ້ຮັບການສະໜັບສະໜູນອຸປະກອນການຜະລິດຈາກ ໂຄງການພັດທະນາເຂື່ອນໄຟຟ້າດອນສະໂຮງ ເຊັ່ນ: ຈັກຊອຍເສັ້ນເຝີ 5 ເຄື່ອງ, ຜ້າຢາງເຮືອນຕາກ 10 ມັດ ແລະ ເຄື່ອງອັດສູນຍາກາດ 1 ເຄື່ອງ (ມູນຄ່າ 250 ລ້ານກີບ).
ຄຽງຄູ່ກັບຜົນງານຕ່າງໆທີ່ກ່າວມານັ້ນ ສະຫະກອນກໍຍັງເຫັນເຖິງຂໍ້ຫຍຸ້ງຍາກ ເປັນຕົ້ນ: ແມ່ນການຂາດເຂີນເຂົ້າທີ່ເປັນວັດຖຸດິບ (ເຂົ້າທີ່ຊາວບ້ານຜະລິດເອງໃຊ້ໄດ້ພຽງ 3 ເດືອນ ຈຳເປັນຕ້ອງຊື້ເພີ່ມຈາກບ້ານໃກ້ຄຽງ) ແລະ ສະພາບເສດຖະກິດສິນຄ້າລາຄາແພງ ເຮັດໃຫ້ສະມາຊິກບາງຄອບຄົວຕ້ອງຢຸດຕິການຜະລິດຊົ່ວຄາວ. ແຕ່ເຖິງຢ່າງໃດກໍຕາມ, ສະຫະກອນ ຜະລິດເສັ້ນເຝີພັດທະນາຊຸມຊົນ ດອນຂະເໝົາ ຍັງຄົງມຸ່ງໝັ້ນທີ່ຈະປັບປຸງ ແລະ ເດີນໜ້າຕໍ່ໄປເພື່ອຮັກສາຄຸນນະພາບເສັ້ນເຝີ ດອນຂະເໝົາ ໃຫ້ເປັນສິນຄ້າພູມປັນຍາທີ່ສ້າງລາຍໄດ້ ແລະ ຊື່ສຽງໃຫ້ເມືອງໂຂງຢ່າງຍືນຍົງ.
ຂ່າວ-ພາບ: ພຸດທະສິນ ວົງວິໄລທອງ
ຄໍາເຫັນ