 |
ທ່ານ ຄຳໄຜ່ ມູນປະເສີດ ຮອງປ້ອມຫຼັກ 1 ຂ້າງວັດອິນແປງ ໄດ້ໃຫ້ສຳພາດຕໍ່ສື່ມວນຊົນໃນວັນທີ 4 ມີນາຜ່ານມາວ່າ: ນັບແຕ່ເລີ່ມຈັດຕັ້ງປະຕິບັດການປັບປ່ຽນທິດທາງການສັນຈອນຕາມ 9 ເສັ້ນທາງໃຈກາງເມືອງເປັນຕົ້ນມາ ຕົນເອງກໍໄດ້ຕັ້ງໜ້າເອົາໃຈໃສ່ປະຕິບັດໜ້າທີ່ຮັບຜິດຊອບຕາມພາລະບົດບາດຢ່າງເຕັມທີ່ ໂດຍໄດ້ຜັດປ່ຽນໝູນວຽນກັນເປັນກະປະຈຳຢູ່ແຕ່ລະຈຸດ ໂດຍເລີ່ມມາປະຕິບັດໜ້າທີ່ແຕ່ເວລາ 06:00-19:00 ໂມງ ເພື່ອແນະນຳໃຫ້ປະຊາຊົນຜູ້ໃຊ້ລົດໃຊ້ຖະໜົນເຂົ້າໃຈ ແລະ ປະຕິບັດຕາມປ້າຍຫ້າມ, ປ້າຍສັນຍານ, ລູກສອນບອກທິດທາງ ແລະ ອື່ນໆຢ່າງເຂັ້ມງວດ. ຜ່ານການຈັດຕັ້ງປະຕິບັດຕົວຈິງເຫັນໄດ້ວ່າ ຜູ້ໃຊ້ລົດໃຊ້ຖະໜົນແມ່ນຮັບຮູ້ ແລະ ເຂົ້າໃຈ, ໄປຖືກຕ້ອງຕາມການປັບປ່ຽນທິດທາງການສັນຈອນເປັນສ່ວນໃຫຍ່, ແຕ່ຍັງມີຜູ້ໃຊ້ລົດໃຊ້ຖະໜົນຈຳນວນໜຶ່ງໂດຍສະເພາະຜູ້ທີ່ມາແຕ່ຕ່າງແຂວງ, ຕ່າງເມືອງຍັງບໍ່ທັນຮັບຮູ້ ແລະ ເຂົ້າໃຈເທົ່າທີ່ຄວນ. ຢ່າງໃດກໍຕາມ, ການຈັດຕັ້ງປະຕິບັດວຽກງານໂຄສະນາ, ໃຫ້ຄຳແນະນຳກ່ຽວກັບການໃຊ້ລົດໃຊ້ຖະໜົນຕໍ່ປະຊາຊົນຜູ້ໃຊ້ລົດໃຊ້ຖະໜົນ ໃນໄລຍະການປັບປ່ຽນທິດທາງການສັນຈອນໃໝ່ນີ້, ຈະສືບຕໍ່ຈັດຕັ້ງປະຕິບັດໂດຍບໍ່ມີກຳນົດເວລາ ຈົນກວ່າປະຊາຊົນໃນ ນວ ກໍຄື ຜູ້ໃຊ້ລົດໃຊ້ຖະໜົນມີຄວາມຮັບຮູ້, ເຂົ້າໃຈ ແລະ ມີຄວາມຊິນເຄີຍ ກ່ຽວກັບການນຳໃຊ້ຖະໜົນດັ່ງກ່າວ ແນໃສ່ເຮັດໃຫ້ການປັບປ່ຽນທິດທາງການສັນຈອນ ດຳເນີນໄປຕາມແຜນການທີ່ວາງໄວ້.
 |
ໂອກາດນີ້, ທ່ານ ຄຳໄຜ່ ມູນປະເສີດ ຍັງໄດ້ຮຽກຮ້ອງໃຫ້ຜູ້ໃຊ້ລົດໃຊ້ຖະໜົນ ໃຫ້ມີສະຕິໃນການຂັບຂີ່, ເອົາໃຈໃສ່ປະຕິບັດຕາມກົດລະບຽບການສັນຈອນ ໂດຍສະເພາະໃຫ້ປະຕິບັດຕາມປ້າຍສັນຍານ ແລະ ສັນຍາລັກການສັນຈອນທີ່ໄດ້ປັກໝາຍ ແລະ ແຕ້ມໄວ້ຕາມເສັ້ນທາງຢ່າງເຂັ້ມງວດ, ແນໃສ່ຫຼີກລ່ຽງການເກີດອຸບັດເຫດ ແລະ ເພື່ອສ້າງຄວາມຊິນເຄີຍໃນການໃຊ້ຖະໜົນດັ່ງກ່າວ, ທັງຮັບປະກັນໃຫ້ການປັບປ່ຽນທິດທາງການສັນຈອນຄັ້ງນີ້ ດຳເນີນໄປຢ່າງໂລ່ງລ່ຽນ.
ສຳລັບມາດຕະການໃນການປັບໃໝ ທີ່ຈະນຳໃຊ້ຕໍ່ຜູ້ຂັບຂີ່ທີ່ລ່ວງລະເມີດ ແມ່ນຍັງບໍ່ທັນໄດ້ນຳໃຊ້ເທື່ອ ຄາດວ່າ 2-3 ເດືອນຕໍ່ໜ້າ ຈະເລີ່ມຈັດຕັ້ງປະຕິບັດການປັບໃໝຕໍ່ຜູ້ລ່ວງລະເມີດ.
ຂ່າວ-ພາບ: ທະນູທອງ
ຄໍາເຫັນ