ຈໍາປາສັກ​ ປະກາດການຈັດຕັ້ງ

ສະຫາຍ ສາທິດ ປັດສາພັນ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງຂອງຄະນະປະຈຳພັກແຂວງ ວ່າດ້ວຍການປະກາດຍຸບເລີກການຈັດຕັ້ງຮາກຖານພັກ 8 ພາກສ່ວນ ຄື: ໜ່ວຍພັກຮາກຖານຄະນະຈັດຕັ້ງແຂວງ, ໜ່ວຍພັກຮາກຖານພະແນກພາຍໃນແຂວງ, ຄະນະພັກຮາກຖານພະແນກກະສິກຳ ແລະ ປ່າໄມ້ແຂວງ, ຄະນະພັກຮາກຖານພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ຄະນະພັກຮາກຖານພະແນກອຸດສາຫະກຳ ແລະ ການຄ້າແຂວງ, ຄະນະພັກຮາກຖານພະແນກພະລັງງານ ແລະ ບໍ່ແຮ່ແຂວງ, ຄະນະພັກຮາກຖານພະແນກການເງິນແຂວງ, ຄະນະພັກຮາກຖານພະແນກແຜນການ ແລະ ການລົງທຶນແຂວງ. ຜ່ານມະຕິຕົກລົງຂອງຄະນະປະຈຳພັກແຂວງ ວ່າດ້ວຍການສ້າງຕັ້ງຄະນະພັກຮາກຖານ ແລະ ໜ່ວຍພັກທີ່ຂຶ້ນກັບ ພ້ອມທັງ ບົ່ງຕົວແຕ່ງຄະນະພັກຮາກຖານ ແລະ ແຕ່ງຕັ້ງຫົວໜ້າ, ຮອງຫົວໜ້າຂອງບັນດາພາກສ່ວນທີ່ໄດ້ຮັບການປັບປຸງ.

ໃນກອງປະຊຸມ, ຍັງໄດ້ຜ່ານຂໍ້ຕົກລົງຂອງເຈົ້າແຂວງ ວ່າດ້ວຍການຍົກຍ້າຍ ທ່ານ ວິໄລ ແກ້ວມະນີໄລ ຫົວໜ້າພະແນກເຕັກໂນໂລຊີ ແລະ ການສື່ສານແຂວງ ໄປປະຈໍາການຢູ່ຫ້ອງວ່າການແຂວງ; ຍົກຍ້າຍ ທ່ານ ແກ້ວ ສີລິສະຫວັດ ຫົວໜ້າພະແນກພະລັງງານ ແລະ ບໍ່ແຮ່ແຂວງ ໄປປະຈໍາການຢູ່ພະແນກເຕັກໂນໂລຊີ ແລະ ການສື່ສານແຂວງ ພ້ອມທັງແຕ່ງຕັ້ງເປັນຫົວໜ້າພະແນກ; ຍົກຍ້າຍ ທ່ານ ຈັນທະບູນ ສີປະເສີດ ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ໄປປະຈໍາການຢູ່ຄະນະຄຸ້ມຄອງດ່ານສາກົນໜອງນົກຂຽນ ແລະ ແຕ່ງຕັ້ງເປັນຫົວໜ້າຄະນະຄຸ້ມຄອງດ່ານດັ່ງກ່າວ. ພ້ອມນີ້ກໍໄດ້ຜ່ານຂໍ້ຕົກລົງຂອງເຈົ້າແຂວງ ວ່າດ້ວຍການໂອນວຽກງານຖະແຫຼງຂ່າວ (ວຽກງານສື່ມວນຊົນ) ແລະ ບຸກຄະລາກອນ ມາຂຶ້ນກັບ ຄະນະໂຄສະນາອົບຮົມແຂວງ.

ຈາກນັ້ນ, ກໍໄດ້ມອບມະຕິຕົກລົງ ໃຫ້ບັນດາທ່ານທີ່ໄດ້ຮັບການແຕ່ງຕັ້ງ, ເປັນກຽດມອບໂດຍ ສະຫາຍ ອາລຸນໄຊ ສູນນະລາດ. ໃນພິທີ ຍັງໄດ້ເຊັນບົດບັນທຶກ ມອບ - ຮັບ ໜ້າທີ່ລະຫວ່າງຫົວໜ້າພະແນກ (ຜູ້ເກົ່າ) ແລະ (ຜູ້ໃໝ່). (ຂ່າວ-ພ: ທູນທອງໃຈ)