 |
ທ່ານ ສອນສະຫວັນ ສີວິໄລ ກ່າວວ່າ: ກອງປະຊຸມຄັ້ງນີ້, ຈັດຂຶ້ນເພື່ອໃຫ້ມີຄວາມເປັນເອກະພາບ ແລະ ຮັບປະກັນການຢັ້ງຢືນທະບຽນສານຖືກຕ້ອງຕາມຄວາມເປັນຈິງຕາມລະບຽບກົດໝາຍ, ຈະເປັນປະໂຫຍດໃຫ້ພາກລັດ ແລະ ເອກະຊົນ ທັງເປັນການຍົກລະດັບໃຫ້ພະນັກງານທະບຽນສານຮັບຮູ້ເຂົ້າໃຈ, ມີຄວາມໜັກແໜ້ນເຂັ້ມ ແຂງ, ຍຸຕິທຳ, ປົກປ້ອງສິດ ແລະ ຜົນປະໂຫຍດອັນຊອບທຳຂອງບຸກຄົນ, ນິຕິບຸກຄົນ ຫຼື ອົງການຈັດຕັ້ງໃນການເຮັດທຸລະກຳທາງແພ່ງ ໂດຍສະເພາະ ການເຮັດສັນຍາ ແລະ ເອກະສານຕ່າງໆ ເພື່ອສະກັດກັ້ນການລະເມີດກົດໝາຍ ແລະ ລະບຽບການ. ຊຶ່ງປັດຈຸບັນຫຼາຍປະເທດໄດ້ໃຫ້ຄວາມສໍາຄັນ ແລະ ໃຫ້ຄວາມເຊື່ອຖືຢ່າງກວ້າງຂວາງຕໍ່ວຽກງານທະບຽນສານ ເນື່ອງຈາກເປັນວຽກໜຶ່ງທີ່ມີຄວາມຈຳເປັນໃນການບໍລິຫານວຽກງານຍຸຕິທໍາໃນສັງຄົມ ໃນນັ້ນ, ກົດໝາຍວ່າດ້ວຍທະບຽນສານ ມີພາລະບົດບາດໃນການຢັ້ງຢືນສັນຍາ ແລະ ເອກະສານຕ່າງໆ ຂອງຜູ້ທີ່ມີຈຸດປະສົງ ຂໍຢັ້ງຢືນຄວາມຖືກຕ້ອງຕາມຄວາມເປັນຈິງ ແລະ ກົດໝາຍ ທັງນໍາໄປຈັດຕັ້ງ-ຜັນຂະຫຍາຍໂຄສະນາເຜີຍແຜ່ໃຫ້ປະຊາຊົນບັນດາເຜົ່າຮັບຮູ້ຢ່າງທົ່ວເຖິງ ເພື່ອສ້າງສະຕິເຄົາລົບກົດໝາຍໃຫ້ປະຊາຊົນ ທັງເປັນການປ້ອງກັນ-ສະກັດກັ້ນບໍ່ໃຫ້ຂໍ້ຂັດແຍ່ງເກີດຂຶ້ນ ແລະ ເຮັດໃຫ້ປະລິມານຂໍ້ຂັດແຍ່ງທີ່ໄປເຖິງສານຫຼຸດໜ້ອຍຖອຍລົງເທື່ອລະກ້າວ.
 |
ທ່ານ ບຸນທິດາ ພົມສະຫວັນ ຍົກໃຫ້ເຫັນກົດໝາຍວ່າດ້ວຍທະບຽນສານ (ສະບັບປັບປຸງ) ເລກທີ 24/ສພຊ, ລົງວັນທີ 29 ທັນວາ 2022 ຊຶ່ງມີ IX ພາກ, 63 ມາດຕາ. ກົດໝາຍສະບັບນີ້ ໄດ້ກໍານົດຫຼັກການ, ລະ ບຽບການ ແລະ ມາດຕະການກ່ຽວກັບການຈັດຕັ້ງ, ການເຄື່ອນໄຫວ, ການຄຸ້ມຄອງ ແລະ ຕິດຕາມກວດກາວຽກງານທະບຽນສານ ເພື່ອເຮັດໃຫ້ການຢັ້ງຢືນທະບຽນສານມີຄວາມຖືກຕ້ອງຕາມຄວາມເປັນຈິງ ແລະ ກົດໝາຍ ແນໃສ່ເພີ່ມທະວີນິຕິກໍາ, ປົກປ້ອງຄວາມຍຸຕິທໍາ, ສິດ ແລະ ຜົນປະໂຫຍດອັນຊອບທໍາຂອງບຸກຄົນ, ນິຕິບຸກຄົນ ແລະ ການຈັດຕັ້ງ ປະກອບສ່ວນເຂົ້າໃນການປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງ ຄົມ ແລະ ການພັດທະນາເສດຖະກິດ-ສັງຄົມຂອງຊາດ. ທະບຽນສານ ແມ່ນການຢັ້ງຢືນຂອງອົງການທະບຽນສານ ກ່ຽວກັບຄວາມຖືກຕ້ອງຕາມຄວາມເປັນຈິງ ແລະ ກົດໝາຍຂອງສັນຍາ, ເອກະສານຕາມການກຳນົດຂອງກົດໝາຍ ຫຼື ຕາມຄວາມສະໝັກໃຈຂອງຄູ່ສັນຍາ ຫຼືຜູ້ຂໍຢັ້ງຢືນ.
ກອງປະຊຸມຍັງໄດ້ເຜີຍແຜ່ ຄໍາແນະນໍາກ່ຽວກັບການຈັດຕັ້ງປະຕິບັດວຽກງານທະບຽນສານ, ຜ່ານບົດລາຍງານການເຄື່ອນໄຫວວຽກງານທະບຽນສານໃນໄລຍະຜ່ານມາ, ແນະນໍາການຈັດຕັ້ງປະຕິບັດວຽກງານທະບຽນສານ. ພ້ອມນີ້, ຜູ້ເຂົ້າຮ່ວມກໍແລກປ່ຽນຄໍາເຫັນ ກ່ຽວກັບວຽກງານທະບຽນສານ ເພື່ອເຮັດໃຫ້ວຽກງານດັ່ງກ່າວໄດ້ຮັບການ ຈັດຕັ້ງປະຕິບັດຢ່າງມີຜົນສໍາເລັດ. ຂ່າວ-ພາບ: ທູນທອງໃຈ
ຄໍາເຫັນ