ທ່ານ ອາລຸນໄຊ ສູນນະລາດ ໄດ້ກ່າວຕື່ມວ່າ: ການຈັດຕັ້ງປະຕິບັດມະຕິ ກອງປະຊຸມໃຫຍ່ ອົງຄະນະພັກແຂວງ ຄັ້ງທີ VIII ໄດ້ກໍານົດ 11 ວຽກຈຸດສຸມ ຊຶ່ງຕີລາຄາແຕ່ລະຈຸດສຸມ ໄດ້ຮັບການຈັດຕັ້ງປະຕິບັດ ຫຼາຍຄາດໝາຍບັນລຸຜົນສໍາເລັດ, ບາງຄາດໝາຍກໍລື່ນແຜນ ມີລັກສະນະຕັ້ງໜ້າ ແລະ ບາງ ຄາດໝາຍບໍ່ບັນລຸຕາມແຜນ (ວຽກສຶກສາ ໃນ 15 ຄາດໝາຍ ບັນລຸ 8 ຄາດໝາຍ) ແຕ່ກໍມີຄວາມຄືບໜ້າ ໂດຍປະຕິບັດຕາມມະຕິ 09/ລບ ມີທ່າຕັ້ງໜ້າ, ອັນພົ້ນເດັ່ນ: ສາມາດຮັບປະກັນຄວາມໝັ້ນຄົງ, ຄວາມເປັນລະບຽບຮຽບຮ້ອຍທົ່ວສັງຄົມ. ດ້ານເສດຖະກິດມະຫາພາກ: ມີການຂະຫຍາຍຕົວຕໍ່ເນື່ອງ ສາມາດບັນລຸລວມຍອດຜະລິດຕະພັນພາຍໃນ ຫຼື GDP ສະເລ່ຍ 5 ປີ ລະດັບ 5.45%, ລາຍຮັບສະເລ່ຍຕໍ່ຫົວຄົນ ບັນລຸໄດ້ 51 ລ້ານ ກີບ ຫຼື ເທົ່າກັບ 2,424 ໂດລາສະຫະລັດ. ພົ້ນເດັ່ນ ສາມາດຈັດເກັບລາຍຮັບເຂົ້າງົບປະມານ ທັງໝົດ 11 ພັນຕື້ກວ່າກີບ ກວມເອົາ 6.8% ຂອງ GDP ສະເລ່ຍແຕ່ລະປີເພີ່ມຂຶ້ນ ເຮັດໃຫ້ແຂວງລື່ນແຜນ 3 ປີ ຊ້ອນ ເປັນແຂວງເກີນດຸນງົບປະມານ ແລະ ດຸ່ນດ່ຽງຊ່ວຍໜູນໃຫ້ສູນກາງ 758 ຕື້ກວ່າກີບ ພ້ອມທັງ ສາມາດແກ້ໄຂບັນຫາໜີ້ສິນ 804 ຕື້ກວ່າກີບ ແລະ ມີແຫຼ່ງທຶນເພື່ອພັດທະນາ, ນໍາພາແກ້ໄຂບັນຫາ ເຄັ່ງຮ້ອນທາງດ້ານເສດຖະກິດ-ການເງິນ ເຮັດໃຫ້ເກີດມີຕົວແບບຜະລິດຕະພັນທີ່ພົ້ນເດັ່ນຫຼາຍຢ່າງ ເພີ້ມຂຶ້ນ ສາມາດຜະລິດເປັນສິນຄ້າກຸ້ມຕົນເອງ 188 ຜະລິດຕະພັນ, ສົ່ງອອກ 18 ຜະລິດຕະພັນ, ມີສິນຄ້າໂອດັອບ 150 ຜະລິດຕະພັນ, ສ້າງເປັນແບຣນຂອງຕົນເອງ 40 ຜະລິດຕະພັນ ເຮັດໃຫ້ແຂວງ ເປັນແຂວງເກີນດຸນການຄ້າ; ນໍາພາແກ້ໄຂບັນຫາຂອດອຸດຕັນ ໂດຍຍົກເລີກການເກັບຄ່າຜ່ານທາງ, ຫຼຸດຜ່ອນດ່ານກວດກາ ແລະ ຫຼຸດຂັ້ນຕອນການລົງທຶນ ເຮັດໃຫ້ການລົງທຶນເພີ່ມຂຶ້ນ ແລະ ນໍາພາສົ່ງເສີມການສຳພັນເສດຖະກິດ ແລະ ຮ່ວມມືພາຍໃນ ຕິດພັນກັບການພັດທະນາຕາມເຂດແຄວ້ນ ເຮັດໃຫ້ຖານການຜະລິດຂະຫຍາຍກວ້າງອອກ, ພົ້ນເດັ່ນ ສ້າງຕັ້ງທ່າບົກວັງເຕົ່າ, ຕະຫຼາດຄ່ຽນຖ່າຍ ສິນຄ້າເນລະມິດລາວ ທັງເປັນການເຕົ້າໂຮມສິນຄ້າ ພາຍໃນ ແລະ ເປັນສູນກາງສົ່ງອອກ ເຮັດໃຫ້ແຂວງພວກເຮົາມີການພັດທະນາດີຂຶ້ນ (ສະເພາະໃນປີ 2025 ອັດຕາເງິນເຟີ້ມີທ່ວງທ່າຫຼຸດລົງ ໃນເດືອນສິງຫາ 3.96%, ເດືອນກັນຍາ 2.85% ຫຼຸດລົງ 1.11%: ການຂະຫຍາຍຕົວຂອງ GDP ຢູ່ໃນ ລະດັບ 5.45%, ຮອດທ້າຍປີ 2025 ຄາດຄະເນການຂະຫຍາຍຕົວໃນລະດັບ 6%: ການຜະລິດໜໍ່ແໜງເປັນຕ່ອງໂສ້ ຕາມທິດ ສອຈ).
ທ່ານ ອາລຸນໄຊ ສູນນະລາດ ໄດ້ກ່າວອີກວ່າ: ການດຳເນີນນກອງປະຊຸມໃຫຍ່ອົງຄະນະພັກແຂວງທີ່ຈະໄຂຂຶ້ນຄັ້ງນີ້, ມີຄວາມສຳຄັນຫຼາຍຊຶ່ງຈະໄດ້ເລືອກຕັ້ງເອົາຄະນະບໍລິຫານງານພັກແຂວງຊຸດໃໝ່, ຕີລາຄາການນຳພາພັດທະນາເສດຖະກິດ -ສັງຄົມໃນໄລຍະ 5 ປີຜ່ານມາ, ກຳນົດທິດທາງນຳພາ 5 ປີຕໍ່ໜ້າ. ດັ່ງນັ້ນ, ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມສືບຕໍ່ປະກອບສ່ວນຢ່າງຕັ້ງໜ້າເຂົ້າໃນທຸກຂະບວນການເພື່ອຂໍ່ານັບຊົມເຊີຍເຮັດໃຫ້ກອງປະຊຸມໃຫຍ່ຜູ້ແທນອົງຄະນະພັກແຂວງຄັ້ງທີ IX ທີ່ຈະໄຂຂຶ້ນໃນວັນທີ 24 -25 ກັນຍາ 2025 ນີ້, ໃຫ້ມີບັນຍາກາດ, ມີຄວາມໝາຍ ແລະ ມີຜົນສໍາເລັດຕາມລະດັບຄາດໝາຍທີ່ວາງໄວ້.
(ຂ່າວ: ເກດສະໜາ, ພາບ: ຈັນທະວີສັກ)
ຄໍາເຫັນ