ທ່ານ ຄໍາພູສະຫວັນ ເພັນສະຫວັດ ກ່າວວ່າ: ຕົນເອງມີຄວາມຮູ້ສຶກດີໃຈ ແລະ ພາກພູມໃຈເປັນຢ່າງຍິ່ງ ທີ່ໄດ້ເປັນກຽດເຂົ້າຮ່ວມກອງປະຊຸມຄັ້ງປະຫວັດສາດນີ້ ຊຶ່ງຖືເປັນຄັ້ງທຳອິດໃນຮອບ 76 ປີຂອງວຽກງານສື່ມວນຊົນລາວ. ພ້ອມນີ້, ທ່ານໄດ້ຍົກໃຫ້ເຫັນເຖິງຄວາມໝາຍ ຄວາມສຳຄັນຂອງກອງປະຊຸມຄັ້ງນີ້ ໂດຍສະເພາະແມ່ນການສໍາມະນາກະກຽມໃນມື້ຜ່ານມາ ທີ່ມີຫົວຂໍ້ສໍາຄັນກ່ຽວກັບການກະກຽມໃຫ້ການພັດທະນາ, ປັບປຸງ ແລະ ຫັນ ປ່ຽນວຽກງານສື່ມວນຊົນ ຊຶ່ງຖືເປັນຂີດໝາຍໃໝ່ທີ່ຈະນຳໄປສູ່ການພັດທະນາສື່ມວນຊົນຂອງປະເທດໃຫ້ມີຄວາມທັນສະໄໝ ແລະ ທັນກັບຍຸກໃໝ່ຍຸກດີຈີຕອນໃນປັດຈຸບັນ. ພ້ອມນີ້, ກອງປະຊຸມຄັ້ງຍັງໄດ້ມີການສະຫຼຸບຕີລາຄາວຽກງານສື່ມວນຊົນຕະຫຼອດໄລຍະຜ່ານມາ ຊຶ່ງສະແດງໃຫ້ເຫັນເຖິງການເຄື່ອນໄຫວທີ່ມີໃບໜ້າໃໝ່ ແລະ ສາ ມາດທຽບທັນກັບສື່ມວນຊົນຂອງຕ່າງປະເທດ. ນອກຈາກນີ້, ການປະກອບຄຳຄິດຄຳເຫັນຕ່າງໆ ພາຍໃນກອງປະຊຸມຈະເປັນບ່ອນອີງທີ່ສຳຄັນໃຫ້ການພັດທະນາວຽກງານສື່ມວນຊົນ ແລະ ສິ່ງສຳຄັນທີ່ສຸດແມ່ນການຜ່ານຮ່າງມະຕິ ວ່າດ້ວຍການນຳພາຂອງພັກຕໍ່ວຽກງານສື່ມວນຊົນ ຊຶ່ງເປັນຂີດໝາຍໃນການນຳພາສື່ມວນຊົນ ໂດຍສະເພາະແມ່ນສື່ທ້ອງຖິ່ນໄປພັດທະນາໃນໄລຍະຕໍ່ໄປ. ສໍາລັບແຂວງອຸດົມໄຊ ຊຶ່ງເປັນແຂວງທີ່ມີຈຸດພິເສດຕັ້ງຢູ່ພາກເໜືອ ແລະ ເປັນຈຸດໃຈກາງຂອງພາກເໜືອທີ່ມີທ່າແຮງ ແລະ ເງື່ອນໄຂທີ່ດີ ໃນການພັດທະນາເສດຖະກິດ-ສັງຄົມ. ດັ່ງນັ້ນ, ວຽກງານສື່ມວນຊົນ ຈຶ່ງເປັນວຽກງານໜຶ່ງທີ່ຈະປະກອບສ່ວນເຮັດໃຫ້ການພັດທະນາເສດຖະກິດ-ສັງຄົມຂອງແຂວງບັນລຸຜົນສຳເລັດຕາມແຜນການທີ່ວາງໄວ້. ໃນໄລຍະຜ່ານມາ, ວຽກງານສື່ມວນຊົນແຂວງອຸດົມໄຊມີຫຼາຍຜົນງານທີ່ພົ້ນເດັ່ນ ໂດຍມີສື່ມວນຊົນສູນກາງໄປຕັ້ງຢູ່ແຂວງອຸດົມໄຊ ເປັນວິທະຍຸກະຈາຍສຽງແຫ່ງຊາດ ແລະ ໂທລະພາບແຫ່ງຊາດ ທີ່ເປັນຈຸດເຊື່ອມຕໍ່ຢູ່ພາກເໜືອ. ນອກຈາກນີ້, ສື່ມວນຊົນຂອງແຂວງ ຍັງມີວິທະຍຸຊຸມຊົນຢູ່ຂັ້ນເມືອງ ແລະ ມີລະບົບໂທລະໂຄ່ງທີ່ກວມເອົາເກືອບ 90% ຂອງຈໍານວນບ້ານໃນທົ່ວແຂວງ.
ທ່ານ ຫົວໜ້າຂະແໜງສື່ມວນຊົນແຂວງອຸດົມໄຊ ຍັງກ່າວຕື່ມວ່າ: ຈະນຳເອົາເນື້ອໃນຈິດໃຈຂອງກອງປະ ຊຸມຄັ້ງນີ້ ໄປຈັດຕັ້ງຜັນຂະຫຍາຍໃຫ້ມີຜົນສຳເລັດຕາມຈຸດປະສົງ ແລະ ຄາດໝາຍທີ່ວາງໄວ້ ເພື່ອພັດທະນາສື່ມວນຊົນຂອງແຂວງອຸດົມໄຊ. ທັງນີ້, ເພື່ອໃຫ້ການພັດທະນາວຽກງານສື່ມວນຊົນໃນໄລຍະໃໝ່ ສາມາດທຽບທັນກັບສາກົນ ແລະ ສະເໜີທິດທາງໃນການປັບປຸງສື່ຕົນເອງ 3 ດ້ານ ດັ່ງນີ້: ດ້ານເນື້ອໃນ: ຕ້ອງປັບປຸງເນື້ອໃນໃຫ້ມີຄວາມສັ້ນກະທັດຮັດ, ສາມາດດຶງດູດ ແລະ ເຂົ້າເຖິງຜູ້ຊົມ, ຜູ້ຟັງ, ຜູ້ເບິ່ງໄດ້ດີຂຶ້ນ; ດ້ານບຸກຄະລາກອນ: ຕ້ອງໄດ້ມີການປັບປຸງຕົນເອງ ນອກຈາກການຮຽນຮູ້ດ້ານທິດສະດີແລ້ວ ຕ້ອງໄດ້ປະຕິບັດຕົວຈິງ ແລະ ໝູນໃຊ້ເຄື່ອງມືຕ່າງໆເຊັ່ນ: ເຕັກໂນໂລຊີປັນຍາປະດິດ (AI) ມາພັດທະນາວຽກງານສື່ມວນຊົນ ໃຫ້ສາມາດຈັດຕັ້ງປະຕິບັດໄດ້; ດ້ານພື້ນຖານໂຄງລ່າງ: ຕ້ອງໄດ້ຮັບການປັບປຸງໃຫ້ມີຄວາມເຂັ້ມແຂງຂຶ້ນຕື່ມໃນຕໍ່ໜ້າ.
ຄໍາເຫັນ