ຫວ່າງແລ້ວນີ້, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມຄະນະ ໄດ້ຢ້ຽມຢາມ ປະຊາຊົນ ບ້ານ ກີ່ວງີ້ວ ເມືອງ ເງິນ ແຂວງໄຊຍະບູລີ, ໃຫ້ການຕ້ອນຮັບມີທ່ານ ທະວີສັກ ໄຊຍະວົງ ເຈົ້າເມືອງໆເງິນ, ມີພາກສ່ວນກ່ຽວຂ້ອງທົ່ວເມືອງ ແລະ ປະຊາຊົນບັນດາເຜົ່າພາຍໃນບ້ານ ກີ່ວງີ້ວ.
ທ່ານ ທອງພັນ ສຸກສະຫວັດ ຮອງເຈົ້າເມືອງ ໄດ້ລາຍງານການຈັດຕັ້ງປະຕິບັດວຽກງານຈັດສັນ, ຍົກຍ້າຍ ບ້ານກີ່ວງີ້ວ ວ່າ: ບ້ານກິ່ວງິ້ວແມ່ນບ້ານໜຶ່ງໃນ 22 ບ້ານ ຂອງເມືອງເງິນ, ປະກອບມີ 2 ເຜົ່າຄື: ເຜົ່າມົ້ງ ແລະ ເຜົ່າກຶມມຸ, ມີ 10 ໜ່ວຍຄຸ້ມຄອງ, ມີ 109 ຄອບຄົວ, ມີປະຊາກອນທັງໝົດ 694 ຄົນ ຍິງ 334 ຄົນ. ບ້ານດັ່ງກ່າວເປັນບ້ານທີ່ຖືກຜົນກະທົບຈາກການສໍາປະທານເນື້ອທີ່ບ່ອນຖິ້ມດິນຂອງບໍລິສັດໄຟຟ້າຫົງສາຈໍາກັດ, ສະນັ້ນຈຶ່ງໄດ້ຈັດສັນທີ່ຢູ່ອາໄສໃໝ່ໃຫ້ປະຊາຊົນ, ຮອດປັດຈຸບັນ ຂັ້ນຕອນຕ່າງໆໃນການຊົດເຊີຍຜົນເສຍຫາຍ, ການສ້າງບ້ານໃໝ່ ແລະ ຍົກຍ້າຍປະຊາຊົນເຂົ້າຢູ່ແມ່ນສໍາເລັດໂດຍພື້ນຖານ, ຊຶ່ງໄດ້ປຸກເຮືອນຢູ່ຖາວອນມີທັງໝົດ 3 ປະເພດຄື: ເຮືອນປະເພດ1: ມີ 10 ຫຼັງ, ເຮືອນປະເພດ2: ມີ 6 ຫຼັງ, ເຮືອນປະເພດ3: ມີ 120 ຫຼັງ, ກໍ່ສ້າງໂຮງຮຽນປະຖົມ, ໂຮງຮຽນອານຸບານ ແຕ່ລະໂຮງຮຽນມີ ຫໍພັກຄູ, ຫ້ອງຄົວ, ຫ້ອງນໍ້າໂຮງຮຽນ ແລະ ຫ້ອງນໍ້າຂອງຄູ, ກໍ່ສ້າງຫໍປະຊຸມ+ຫ້ອງນໍ້າ 2 ຫ້ອງ, ສ້າງຕະຫຼາດ+ຫ້ອງນໍ້າ 2 ຫ້ອງ, ສາລາສັງເວດ+ຫ້ອງນໍ້າ 2 ຫ້ອງ, ກໍ່ສ້າງລະບົບໄຟຟ້າ ແລະ ນໍ້າສະອາດ, ກໍ່ສ້າງທາງຮ່ອມພາຍໃນບ້ານ ແລະ ໄດ້ຈັດສັນເນື້ອທີ່ທໍາການຜະລິດໃຫ້ປະຊາຊົນ 3 ຮຕ/ຄອບຄົວ.
ໂອກາດດັ່ງກ່າວ, ທ່ານ ເຈົ້າແຂວງ ໄຊຍະບູລີ ໄດ້ໂອ້ລົມຕໍ່ປະຊາຊົນ ແລະ ທ່ານໄດ້ຢື້ຢາມຖາມຂ່າວເຖິງ ຂໍ້ສະດວກ, ຂໍ້ຫຍຸ້ງຍາກຂອງປະຊາຊົນທີ່ໄດ້ມາຢູ່ບ້ານໃໝ່ ພ້ອມທັງໄດ້ຮຽກຮ້ອງໃຫ້ເອົາໃຈໃສ່ສືກສາອົບຮົມພໍ່ແມ່ປະຊາຊົນ ໃຫ້ມີສະຕິໃນການເຄົາລົບລະບຽບກົດໝາຍ, ເປັນພົນລະເມືອງດີຂອງສັງຄົມ, ອົບຮົມລູກຫຼານໃຫ້ຫ່າງໄກຈາກຢາເສບຕິດ, ສືບຕໍ່ຊີ້ນໍາແຕ່ລະຂະແໜງການຂອງບ້ານໃຫ້ເຮັດໜ້າທີ່ດ້ວຍຄວາມຮັບຜິດຊອບສູງ, ນໍາພາປະຊາຊົນພາຍໃນບ້ານທໍາການຜະລິດໃຫ້ກຸ້ມກິນ ແລະ ຮັ່ງມີເທື່ອລະກ້າວ, ເອົາໃຈໃສ່ຮັກສາປ່າ-ແຫຼ່ງນໍ້າ, ປ້ອງກັນບໍ່ໃຫ້ມີໄຟໄໝ້ລາມປ່າ, ສໍາລັບອໍານາດການປົກຄອງເມືອງ ແລະ ຝ່າຍໂຄງການໃຫ້ສືບຕໍ່ຈັດສັນອາຊີບໃຫ້ປະຊາຊົນດ້ວຍການຝືກອົບຮົມໄລຍະສັ້ນ ແລະ ໄລຍະຍາວ.
(ຂ່າວ-ພາບ: ອຸ່ນເຮືອນ ໂພທິລັກ)
ຄໍາເຫັນ