ເຈົ້າແຂວງຈໍາປາສັກ​ ເຄື່ອນໄຫວຊຸກຍູ້ການກໍ່ສ້າງທາງເບຕົງ​ ຢູ່ບ້ານໂພນໄຊ

ໂອກາດນີ້, ທ່ານເຈົ້າແຂວງຈໍາປາສັກ ໄດ້ຍ້ອງຍໍຊົມຊົມຄະນະພັກ - ອົງການປົກຄອງນະຄອນປາກເຊ, ອົງການປົກຄອງບ້ານ ແລະ ພໍ່ແມ່ປະຊາຊົນພາຍໃນບ້ານພັດທະນາໂພນໄຊ ທີ່ມີຄວາມຕັດສິນໃຈເປັນເອກະພາບ ພ້ອມພຽງກັນປະກອບສ່ວນດ້ານວັດຖຸ ແລະ ທຶນຮອນໃນການກໍ່ເສັ້ນທາງພາຍໃນບ້ານ. ພ້ອມນີ້ ກໍສະແດງຄວາມຂອບໃຈນັກທຸລະກິດ, ຜູ້ປະກອບການ ທີ່ສະໜັບສະໜູນທຶນຮອນປະກອບສ່ວນໃນການກໍ່ສ້າງທາງເບຕົງ ຢູ່ບ້ານດັ່ງກ່າວ. ຕອນທ້າຍ ທ່ານ ຍັງແນະນໍາໃຫ້ຫ້ອງການ ຍທຂ ນະຄອນປາກເຊ ສົມທົບກັບ ຄະນະນໍາບ້ານ ແລະ ພໍ່ແມ່ປະຊາຊົນ ປະກອບສ່ວນໃນການອະນາໄມ ແລະ ຮັກສາເສັ້ນທາງ ເພື່ອເຮັດໃຫ້ເສັ້ນທາງສາມາດນໍາໃຊ້ຢ່າງຍືນຍົງ.

ທ່ານ ສຸກວິໃສ ສີສົມຫວັງ ເຈົ້ານະຄອນປາກເຊ ໃຫ້ຮູ້ວ່າ: ການກໍ່ສ້າງເສັ້ນທາງ ຢູ່ຂອບເຂດບ້ານໂພນໄຊ ຄັ້ງນີ້, ມີ 2 ເສັ້ນທາງ ຄື: ເສັ້ນທາງເລກທີ 24 ແລະ 46 ຄື: ເສັ້ນທາງເລກທີ 24, ກວ້າງ 12 ແມັດ, ທາງຄົນຍ່າງ ກວ້າງ 1,5 ແມັດ x 2 ເບື້ອງ ເປັນ 3 ແມັດ, ລວມ 15 ແມັດ, ຍາວ 320 ແມັດ, ມີຮ່ອງລະບາຍນໍ້າເປັນຮູບໂຕຢູ. ເສັ້ນທາງເລກທີ 46, ກວ້າງ 9 ແມັດ, ທາງຄົນຍ່າງ ກວ້າງ 1,5 ແມັດ x 2 ເບື້ອງ ເປັນ 3 ແມັດ, ລວມ 12 ແມັດ, ຍາວ 393 ແມັດ, ມີຮ່ອງລະບາຍນໍ້າເປັນຮູບໂຕຢູ ໂດຍແມ່ນບໍລິສັດ ຕັງຈະເລີນ ເປັນຜູ້ດໍາເນີນການສ້ອມແປງ - ກໍ່ສ້າງ ມູນຄ່າປະມານ 10 ຕື້ກີບ ຊຶ່ງເປັນທຶນທີ່ໄດ້ມາຈາກການລະດົມຂອງຄະນະພັກ - ອົງການປົກຄອງແຂວງຈໍາປາສັກ, ການປະກອບສ່ວນຂອງອົງການຈັດຕັ້ງສັງຄົມ, ບໍລິສັດ, ຫົວໜ່ວຍທຸລະກິດ, ນະຄອນປາກເຊ ແລະ ປະຊາຊົນພາຍໃນບ້ານພັດທະນາໂພນໄຊ. ປັດຈຸບັນ ບໍລິສັດ ຕັງຈະເລີນ ໄດ້ລົງມືສ້ອມແປງ - ກໍ່ສ້າງເສັ້ນທາງທັງເທເບຕົງ ແລະ ອະນາໄມໜ້າທາງ, ເກດ - ກວາດປັບລະດັບໜ້າທາງ, ຈົກຮ່ອງ - ວາງທໍ່ລະບາຍນໍ້າ ເພື່ອສູ້ຊົນສ້ອມແປງ - ກໍ່ສ້າງໃຫ້ສໍາເລັດໃນເດືອນກັນຍາ 2025.

(ຂ່າວ-ພາບ: ທູນທອງໃຈ)