 |
ທ່ານ ພົນຈັດຕະວາ ຂັນທີ ສະໜາມອຸ່ນ ໄດ້ລາຍງານຫຍໍ້ ໃນການຈັດຕັ້ງປະຕິບັດໜ້າທີ່ວຽກງານຂອງກອງພົນໃນໄລຍະຜ່ານມາ ຊຶ່ງໄດ້ຍົກໃຫ້ເຫັນປະຫວັດສາດ, ມູນເຊື້ອ, ທີ່ຕັ້ງ ແລະ ພາລະບົດບາດຂອງຄະນະພັກ - ຄະນະບັນຊາແຕ່ລະຮຸ່ນ. ຈາກນັ້ນ, ທ່ານ ວັນໄຊ ພອງສະຫວັນ ໄດ້ມີຄໍາເຫັນ ຊຶ່ງໄດ້ສະແດງຄວາມຂອບໃຈ ຕໍ່ການຕ້ອນຮັບຢ່າງອົບອຸ່ນ ຂອງຄະນະພັກ - ຄະນະບັນຊາກອງພົນທີ 4 ລວມໄປເຖິງຜົນງານ ແລະ ໄຊຊະນະ ທີ່ຄະນະພັກ - ຄະນະບັນຊາແຕ່ລະຮຸ່ນຍາດໄດ້ຕະຫຼອດໄລຍະຜ່ານມາ, ພ້ອມນີ້ ຍັງໄດ້ຍົກໃຫ້ເຫັນສະພາບການຂອງໂລກ ແລະ ພາກພື້ນ ທີ່ກຳລັງຜັນແປໄປຢ່າງສັບສົບ, ບັນຫາສົງຄາມລະຫວ່າງປະເທດ, ສິນຄ້າລາຄາແພງ ແລະ ອື່ນໆ, ພ້ອມກັນນັ້ນ ຍັງໄດ້ຮຽກຮ້ອງ ໃຫ້ຄະນະພັກ - ຄະນບັນຊາໃນແຕ່ລະຂັ້ນ, ແຕ່ລະຫົວໜ່ວຍ-ກົມກອງ, ຕະຫຼອດຮອດ ນາຍ ແລະ ພົນທະຫານທຸກທົ່ວໜ້າ ຈົ່ງຍົກສູງໜ້າທີ່ ແລະ ພາລະບົດບາດຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງຂຶ້ນກວ່າເກົ່າ, ສຸມໃສ່ວຽກງານປ້ອງກັນຊາດ - ປ້ອງກັນຄວາມສະຫງົບ ຂອບເຂດຮັບຜິດຊອບໃຫ້ມີຄວາມສະຫງົບໂດຍພື້ນຖານ, ປະສານສົມທົບແໜ້ນກັບອຳນາດການປົກຄອງທ້ອງຖິ່ນແຕ່ລະຂັ້ນ ເພື່ອເກັບກຳສະພາບໃຫ້ທ່ວງທັນກັບເວລາ, ອົບຮົມ - ຫັດແອບ, ການເມືອງ ການທະຫານ, ພະລາທິການ ແລະ ເຕັກນິກ ໃຫ້ມີຄວາມຊຳນິຊຳນານ ແລະ ຮັບປະກັນໃນເວລາສູ້ຮົບຕົວຈິງ, ປັບປຸງສະຖານທີ່ພັກເຊົາ, ຫ້ອງການ ແລະ ອື່ນໆ ໃຫ້ແໜ້ນໜາຖາວອນ, ຍົກສູງນ້ຳໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ປົກປັກຮັກສາ ພາຫະນະ ອາວຸດກະສູນ, ວັດຖຸອຸປະກອນທີ່ຂັ້ນເທິ່ງປະກອບໃຫ້ ມີຄວາມຮັບປະກັນສາມາດນຳໃຊ້ໄດ້ຍາວນານ. ໃນໂອກາດດຽວກັນນີ້, ທ່ານເຈົ້າແຂວງຄໍາມ່ວນ ຍັງໄດ້ ມອບຈໍ LED ພ້ອມອຸປະກອນຄົບຊຸດ ມູນຄ່າ 600 ລ້ານກວ່າກີບ ແລະ ເງິນສົດ 50 ລ້ານກີບ ໃຫ້ກອງພົນທີ 4 ເພື່ອປະກອບເຂົ້າໃນວຽກງານລວມຂອງກົມກອງໃຫ້ເກີດປະໂຫຍດສູງສຸດ.
 |
(ຂ່າວ: ຮທ ໂພຄໍາ ພອນປະເສີດ, ພາບ: ກອງຄໍາ)
ຄໍາເຫັນ