ເຈົ້າແຂວງຫຼວງນໍ້າທາ ຢ້ຽມຢາມບໍລິສັດປູກໝາກຖົ່ວເຫຼືອງ ແລະ ໝາກເຜັດ

ເມື່ອບໍ່ດົນມານີ້, ທ່ານ ວຽງສະຫວັດ ສີພັນດອນ ເຈົ້າແຂວງຫຼວງນໍ້າທາ ພ້ອມຄະນະ ລົງຕິດຕາມການເກັບກູ້ໝາກຖົ່ວເຫຼືອງ ແລະ ໂຄງການທົດລອງປູກໝາກເຜັດຢູ່ເມືອງຫຼວງນໍ້າທາ ເຂດບ້ານພຽງງາມ, ບ້ານນໍ້າແງ້ນ,  ບ້ານທົ່ງໃຈ້ໃຕ້ - ທົ່ງໃຈ້ເໜືອ ໂດຍການນໍາພາຂອງຂອງທ່ານ ພີມແກ້ວ ທໍາລະສີນ ຫົວໜ້າພະແນກກະສິກໍາ ແລະ ປ່າໄມ້ແຂວງ, ມີຮອງເຈົ້າເມືອງຫຼວງນໍ້າທາ ແລະ ຂະແໜງການທີ່ກ່ຽວຂ້ອງ.
ທ່ານ ຈຽງ ຫົວໜ້າບໍລິສັດ ເຖິງເຟີຍການຄ້າ ແລະ ສົ່ງເສີມກະສິກຳຈຳກັດຜູ້ດຽວ ໃຫ້ຮູ້ວ່າ: ບໍລິສັດ ໄດ້ເຊົ່າພື້ນທີ່ນາຂອງປະຊາຊົນ ເພື່ອປູກໝາກຖົ່ວເຫຼືອງໃນປີ 2024 ທັງໝົດ 327 ເຮັກຕາ. ໃນນັ້ນ, ບ້ານພຽງງາມ 56 ເຮັກຕາ, ບ້ານນໍ້າແງ້ນມີ 2 ຈຸດ (ຈຸດທີໜຶ່ງ 48 ເຮັກຕາ, ຈຸດທີສອງ 47 ເຮັກຕາ), ບ້ານທົ່ງໃຈ້ເໜືອ 57 ເຮັກຕາ, ບ້ານທົ່ງໃຈ້ໃຕ້ 33 ເຮັກຕາ, ບ້ານປ່າປົ່ວະ 31 ເຮັກຕາ, ບ້ານນໍ້າທຸງ 52 ເຮັກຕາ, ເສຍຄ່າເຊົ່າພື້ນທີ່ທັງໝົດ 2 ຕື້ 3 ຮ້ອຍລ້ານກີບ, ສະເລ່ຍ 1 ເຮັກຕາຕໍ່ 7 ລ້ານກີບ, ເສຍອາກອນ 1 ໂຕນຕໍ່ 6 ແສນກີບ, ສະເລ່ຍທັງໝົດ 3 ຮ້ອຍກວ່າລ້ານກີບ, ເສຍຄ່າໃຫ້ກັບປະຊາຊົນມີສ່ວນຮ່ວມຄື: ຄ່າເຊົ່າ, ຄ່າປູກ, ຄ່າເກັບ ແລະ ອື່ນໆ 6 ຕື້ກວ່າກີບ.  ປັດຈຸບັນ ການເກັບກູ້ຖົ່ວເຫຼືອງໄດ້ 50 ເຮັກຕາ, ສົ່ງໄປຂາຍຢູ່ ສປ ຈີນ ແລ້ວ 500 ກວ່າໂຕນ, ຄາດວ່າປີນີ້ຈະເກັບກູ້ໄດ້ 4.000 ກວ່າໂຕນ ແລະ ທ່ານ ຍັງໃຫ້ຮູ້ຕື່ວ່າ:  ແຜນປີ 2025 ຄາດວ່າຈະເຊົ່າພື້ນທີ່ ແລະ ປູກໝາກຖົ່ວເຫຼືອງໃຫ້ໄດ້ 300 ຫາ 400 ແຮັກຕາ.
ໃນວັນດຽວກັນນີ້, ທ່ານເຈົ້າແຂວງ ພ້ອມຄະນະ ກໍໄດ້ໄປຢ້ຽມຢາມໂຄງການທົດລອງປູກໝາກເຜັດ, ຊຶ່ງໂຄງການດັ່ງກ່າວເປັນໂຄງການຮ່ວມມື ລະຫວ່າງ ພະແນກກະສິກຳ ແລະ ປ່າໄມ້ແຂວງຫຼວງນໍ້າທາ ແລະ ພະແນກກະສິກຳ ແລະ ປ່າໄມ້ແຂວງກຸຍໂຈ ສປ ຈີນ ໄດ້ເລີ່ມປູກ ແຕ່ທ້າຍປີ 2023 ຫາ ເດືອນພືດສະພາ 2024 ທົດລອງປູກໝາກເຜັດ 12 ສາຍພັນ. ທັງນີ້ກໍເພື່ອເປັນການຊຸກຍູ້ສົ່ງເສີມໃຫ້ບໍລິສັດ ແລະ ໂຄງການທົດລອງຂະຫຍາຍ ແລະ ສືບຕໍ່ປູກໝາກຖົ່ວເຫຼືອງ, ໝາກເຜັດໃຫ້ມີປະລິມານເພີ່ມຂຶ້ນເປັນຈໍານວນຫຼາຍໃນຕໍ່ໜ້າ, ເປັນການສ້າງລາຍຮັບໃຫ້ກັບບໍລິສັດ ແລະ ຊ່ວຍພັດທະນາເຮັດໃຫ້ປະຊາຊົນມີລາຍຮັບເຂົ້າສູ່ຄອບຄົວ ເຮັດໃຫ້ຊິວິດການເປັນຢູ່ດີຂຶ້ນ.
(ຂ່າວ: ມຸນຕີ)