ເຈົ້າແຂວງຫຼວງພະບາງເຄື່ອນໄຫວຢ້ຽມຢາມກອງພັນນ້ອຍ 413.

ວັນທີ 13 ມີນາຜ່ານມາ, ສະຫາຍ ຄຳຂັນ ຈັນທະວີສຸກ ກຳມະການສູນກາງພັກ ເລຂາພັກແຂວງ ເຈົ້າແຂວງ ປະທານປ້ອງກັນຊາດ-ປ້ອງກັນຄວາມສະຫງົບແຂວງຫຼວງພະບາງ ພ້ອມຄະນະ ໄດ້ເຄື່ອນໄຫວຢ້ຽມຢາມພົບປະໂອ້ລົມນາຍ ແລະ ພົນທະຫານກອງພັນນ້ອຍ 413 ທະຫານແຂວງ, ມີຄະນະນຳເມືອງພູຄູນ, ກອງບັນຊາການທະຫານແຂວງ, ໂດຍມີສະຫາຍ ພັນໂທ ຄຳຊາງ ມະນີຈັນ ຫົວໜ້າການທະຫານກອງພັນນ້ອຍ 413 ພ້ອມຄະນະ ໃຫ້ການຕ້ອນຮັບ.
ສະຫາຍ ພັນໂທ ບຸນປັນ ສະວະບຸດ ຫົວໜ້າການເມືອງກອງພັນນ້ອຍ 413 ທະຫານແຂວງ ໄດ້ລາຍຫຍໍ້ສະພາບຈຸດພິເສດ, ທີ່ຕັ້ງ, ພາລະບົດບາດຄວາມຮັບຜິດຊອບ, ຜົນສຳເລັດທີ່ພົ້ນເດັ່ນຂອງກອງພັນນ້ອຍ 413. ຈາກນັ້ນ, ສະຫາຍ ເຈົ້າແຂວງ ກໍໄດ້ກ່າວສະແດງຄວາມຍ້ອງຍໍຊົມເຊີຍຄະນະພັກ - ຄະນະບັນຊາ ແລະ ພະນັກງານ - ນັກຮົບທົ່ວກອງພັນ ທີ່ໄດ້ສຸມສະຕິປັນຍາ, ເຫືອແຮງ ແລະ ຄວາມສາມາດປະກອບສ່ວນເຄື່ອນໄຫວເຮັດໃຫ້ສະພາບຂອບເຂດຮັບຜິດຊອບມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ, ສ້າງເງື່ອນໄຂເອື້ອອໍານວຍໃຫ້ແກ່ການພັດທະນາເສດຖະກິດ-ສັງຄົມຂອງເມືອງ. ທ່ານເຈົ້າແຂວງຍັງໄດ້ຮຽກຮ້ອງໃຫ້ຄະນະພັກ-ຄະນະບັນຊາກອງພັນ ສືບຕໍ່ສຶກສາອົບຮົມການເມືອງນໍາພາແນວຄິດນາຍ ແລະ ພົນທະຫານດ້ວຍຫຼາຍຮູບແບບ, ຕໍ່ເນື່ອງ, ເລິກເຊິ່ງ, ປະຕິບັດນະໂຍບາຍ ເພື່ອຊຸກຍູ້ນ້ຳໃຈຫ້າວຫັນເຮັດສໍາເລັດໜ້າທີ່ການເມືອງທີ່ໄດ້ຮັບມອບໝາຍ, ເສີມຂະຫຍາຍທາດແທ້, ມູນເຊື້ອອັນດີງາມຂອງກອງທັບ, ສືບຕໍ່ຈັດຕັ້ງກໍາລັງລົງກໍ່ສ້າງຮາກຖານການເມຶອງ ປະຕິບັດ 4 ເນື້ອໃນ 4 ຄາດໝາຍ, ກໍາແໜ້ນສະພາບຮອບດ້ານ ແລະ ພ້ອມກັນແກ້ໄຂສະພາບການທີ່ເກີດຂື້ນໃຫ້ສອດຄ່ອງກັບລະບຽບກົດໝາຍ, ຖືເອົາປະຊາຊົນເປັນກົກ, ເຄົາລົບວິໄນ 12 ຂໍ້ຕໍ່ປະຊາຊົນ, ພ້ອມກັນນີ້ໃຫ້ເອົາໃຈໃສ່ປັບປຸງກໍ່ສ້າງກໍາລັງໃຫ້ມີຄວາມໜັກແໜ້ນເຂັ້ມແຂງຮອບດ້ານ, ເອົາໃຈໃສ່ສ້າງພະລາທິການ ຕາມທິດ 4 ປູກ 4 ລ້ຽງເພື່ອຮັບປະກັນແກ້ໄຂຊີວິດການເປັນຢູ່ຂອງພະນັກງານ-ນັກຮົບໃຫ້ດີຂຶ້ນເລື້ອຍໆ.
(ຂ່າວ: ສົມພອນ ສຸວັນທອນ)