ທ່ານ ໄຊຍະເສນ ແກ້ວວິໄລສັກ ຫົວໜ້າອົງການກາແດງແຂວງສະຫວັນນະເຂດ ໄດ້ລາຍງານສະພາບການເກີດອັກຄີໄພສາງມ້ຽນເຄື່ອງຂອງອົງການກາແດງແຂວງ ແລະ ຜົນເສຍຫາຍຈາກເຫດການດັ່ງກ່າວ ພ້ອມທັງໄດ້ລາຍງານສະພາບຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆໃນການເຄື່ອນໄຫວວຽກງານໃນໄລຍະຜ່ານມາ. ສໍາລັບເຫດການໄຟໄໝ້ສາງເກັບມ້ຽນເຄື່ອງຂອງອົງການກາແດງແຂວງ ໄດ້ເກີດຂຶ້ນໃນເວລາ 10 ໂມງ 45 ນາທີຂອງຄ່ຳຄືນວັນທີ 23 ກຸມພາ 2025 ຊຶ່ງມີເຫດການໄຟຟ້້າລັດວົງຈອນ ແລະ ໄດ້ກໍ່ໃຫ້ເກີດໄຟໄໝ້ຕົວອາຄານສາງເຄື່ອງຂອງອົງການກາແດງແຂວງ ທີ່ເປັນເຮືອນກໍຝາດິນຈີ່ຊັ້ນດຽວ, ມຸງດ້ວຍກະເບື້ອງ, ໂຄງໄມ້ຫຼັງຄາ, ຂະໜາດກວ້າງ 3.50 ແມັດ, ຍາວ 17 ແມັດ, ສູງ 3 ແມັດ, ມີ 2 ຫ້ອງນອນຂອງພະນັກງານ, 3 ຫ້ອງສາງເກັບມ້ຽນ, ຊຶ່ງຈາກເຫດການດັ່ງກ່າວ ໄດ້ສົ່ງຜົນກະທົບໃຫ້ມີພະນັກງານຖືກບາດເຈັບ 3 ຄົນ, ເຄື່ອງຂອງທີ່ຢູ່ພາຍໃນສາງ ທີ່ເປັນເຄື່ອງໃຊ້ ແລະ ອຸປະກອນຮັບໃຊ້ແກ່ການເຄື່ອນໄຫວວຽກງານຮັບບໍລິຈາກເລືອດ ລວມທັງຊັບສິນວັດຖຸສ່ວນບຸກຄົນຖືກໄຟໄໝ້ເສຍຫາຍໝົດ, ລວມມູນຄ່າເສຍຫາຍທັງໝົດ 789 ລ້ານກວ່າກີບ.
ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ໃຫ້ທິດຊີ້ນຳຫຼາຍດ້ານຕໍ່ກັບອົງການກາແດງແຂວງ. ໃນນີ້, ທ່ານເຈົ້າແຂວງ ຈະປະກອບສ່ວນຕຽງທີ່ໃຊ້ໃນພາກສະໜາມໃນການເຄ່ືອນໄຫວຮັບບໍລິຈາກເລືອດທີ່ຖືກໄຟໄໝ້ຈຳນວນ 15 ໜ່ວຍໃຫ້ອົງການກາແດງໃໝ່ ລວມທັງເຄື່ອງຂອງ ແລະ ອຸປະກອນຈຳເປັນອື່ນໆທີ່ໃຊ້ເຂົ້າໃນການຮັບບໍລິຈາກເລືອດ ໂດຍໃຫ້ອົງການກາແດງແຂວງ ຂຸ້ນຂ້ຽວເຮັດໃບສະເໜີຂຶ້ນມາຫາແຂວງ ເພື່ອຈະຊອກທິດທາງຊ່ວຍເຫຼືອ ແລະ ເລັ່ງແກ້ໄຂໃຫ້ໂດຍໄວ, ອັນສໍາຄັນແມ່ນເພື່ອເຮັດໃຫ້ການເຄື່ອນໄຫວຮັບບໍລິຈາກເລືອດໄດ້ດຳເນີນໄປຢ່າງຕໍ່ເນື່ອງ ແລະ ມີຜົນສຳເລັດ ທັງນີ້ກໍເພື່ອຮັບປະກັນໃຫ້ພວກເຮົາມີຄັງເລືອດພຽງພໍຕໍ່ຄວາມຕ້ອງການໃນການປິ່ນປົວຄົນເຈັບຕາມໂຮງໝໍແຫ່ງຕ່າງໆ. ສະນັ້ນ, ຈິ່ງໃຫ້ຄະນະພັກ-ຄະນະນຳອົງການ ເອົາໃຈໃສ່ ແລະ ຖືເອົາວຽກງານການຮັບບໍລິຈາກເລືອດເປັນບູລິມະສິດອັນດັບໜຶ່ງ ພ້ອມນີ້, ພວກເຮົາຈະຕ້ອງໄດ້ມີການຂົນຂວາຍ ແລະ ປຸກລະດົມທົ່ວສັງຄົມໃຫ້ເຫັນເຖິງຄວາມສຳຄັນ ແລະ ຈຳເປັນຂອງການບໍລິຈາກເລືອດ ໂດຍຈະຕ້ອງໄດ້ເຮັດຢ່າງຈິງຈັງ ແລະ ເຮັດໃຫ້ເປັນຂະບວນການອັນກວ້າງຂວາງກວ່າເກົ່າ ໂດຍໃຫ້ການນຳຂັ້ນຕ່າງໆເຂົ້າມາມີສ່ວນຮ່ວມໃນວຽກງານດັ່ງກ່າວນີ້. ປັດຈຸບັນ, ແຂວງພວກເຮົາມີຄວາມຕ້ອງການເລືອດເພື່ອນຳໃຊ້ເຂົ້າໃນການປີ່ນປົວຄົນເຈັບທີ່ນັບມື້ນັບສູງຂຶ້ນ ໃນຂະນະທີ່ອັດຕາການຮັບບໍລິຈາກເລືອດແມ່ນເຫັນວ່າຍັງບໍ່ທັນພຽງພໍຕໍ່ຄວາມຕ້ອງການຂອງສັງຄົມ.
ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ຍັງໄດ້ມອບເງິນຊ່ວຍເຫຼືອແກ່ພະນັກງານຂອງອົງການກາແດງແຂວງ ທີ່ໄດ້ຮັບຜົນກະທົບຈາກເຫດການໄຟໄໝ້ນຳອີກ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ