ທ່ານບຸນໂຈມ ອຸບົນປະເສີດເຈົ້າແຂວງສະຫວັນນະເຂດ ພ້ອມດ້ວຍບັນດາທ່ານຫົວໜ້າພະແນກການຕ່າງໆຂອງແຂວງຄື: ພະແນກແຜນການ ແລະການລົງທຶນ, ພະແນກຊັບພະຍາກອນທະມະຊາດ ແລະສິ່ງແວດລ້ອມ, ຫົວໜ້າພະແນກກະສິກຳ ແລະປ່າໄມ້, ຫົວໜ້າຫ້ອງວ່າການປົກຄອງແຂວງ ແລະວິຊາການກ່ຽວຂ້ອງຈຳນວນໜຶ່ງ ໄດ້ລົງເຄື່ອນໄຫວຕິດຕາມ ແລະຊຸກຍູ້ວຽກງານການພັດທະນາເສດຖະກິດ-ສັງຄົມຢູ່ເມືອງເຊໂປນ ແລະເມືອງພີນ ໃນວັນທີ 8 ພຶດສະພາ 2024ນີ້.
ໃນການລົງເຄື່ອນໄຫວຄັ້ງນີ້, ກ່ອນອື່ນ ທ່ານ ບຸນໂຈມ ອຸບົນປະເສີດ ກໍ່ໄດ້ເຂົ້າພົບປະໂອ້ລົມຄະນະບໍລິຫານງານພັກເມືອງ ແລະພະນັກງານຫຼັກແຫຼ່ງຂອງເມືອງເຊໂປນ ທີ່ສະໂມສອນຂອງເມືອງ. ໂອກາດນີ້, ທ່ານ ພົງຄຳຮັກ ບຸດທະວົງ ເລຂາພັກເມືອງ ເຈົ້າເມືອງເຊໂປນ ກໍ່ໄດ້ລາຍງານໃຫ້ຮູ້ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ ໂດຍສັງເຂບວ່າ: ເມືອງເຊໂປນ ປະກອບມີ 88 ບ້ານ, ມີ 5 ຈຸດສຸມ, ໃນນັ້ນ ມີ 3 ຈຸດສຸມຂຶ້ນກັບແຂວງ ແລະ2 ຈຸດສຸມ ທີ່ຂຶ້ນກັບເມືອງ, ມີ 6 ກຸ່ມບ້ານ,14 ບ້ານໃຫຍ່, ມີ 12.877 ຄອບຄົວ, ມີປະຊາກອນ 66.995 ຄົນ, ປະກອບມີ: ເຜົ່າລາວ, ຜູ້ໄທ ແລະຊົນເຜົ່າບຣູ 70%(ຕຣີ ແລະມັງກອງ). ທົ່ວເມືອງມີສະມາຊິກພັັກ 2.267 ສະຫາຍ, ມີ 17 ຄະນະພັກຮາກຖານ, 138 ໜ່ວຍພັກ, ໜ່ວຍພັກທີ່ໄດ້ຮັບຮອງເປັນໜ່ວຍພັກປອດໃສ ເຂັ້ມແຂງ ໜັກແໜ້ນມີ 36 ໜ່ວຍ, ປະຈຸບັນ ການປັບປຸງການຈັດຕັ້ງຂັ້ນບ້ານ ເພື່ອກະກຽມໃສ່ກອງປະຊຸມໃຫຍ່ຂອງເມືອງ ສໍາເລັດແລ້ວ 60 ບ້ານ, ການຈັດຕັ້ງປະຕິບັດຂໍ້ກໍານົດ 416 ສໍາເລັດແລ້ວ 3 ຈຸດຄື: ບ້ານແດນສະຫວັນ ໄດ້ປັບປຸງໜ່ວຍພັກຮາກຖານ ມາເປັນຄະນະພັກຮາກຖານ ບ້ານໃຫຍ່ແດນສະຫວັນ, ປັບປຸງຈາກຄະນະພັກຮາກຖານຈຸດສຸມຊຽງຕູບ ມາເປັນຄະນະພັກຮາກຖານກຸ່ມບ້ານຈຽງຕູບ ແລະປັບປຸງຈາກຄະນະພັກຮາກຖານຈຸດສຸມກະຕູບ ມາເປັນຄະນະພັກຮາກຖານກຸ່ມບ້ານກະຕູບ.
ທ່ານເຈົ້າແຂວງ ພ້ອມຄະນະ ກໍ່ໄດ້ລົງຢ້ຽມຢາມ ແລະຊີ້ນຳວຽກງານບາງດ້ານຢູ່ໂຮງງານປຸງແຕ່ງມັນຕົ້ນເຊໂປນ ແລະບໍລິສັດຊັນເປເປີ້ໂຮນ ໂອກາດນີ້, ກໍ່ໄດ້ຮັບຟັງການລາຍງານສະພາບການດໍາເນີນງານຈາກຜູ້ບໍລິຫານຂອງທັງສອງບໍລິສັດດັ່ງກ່າວ ໂດຍໄດ້ຍົກໃຫ້ຮູ້ເຖິງຂໍ້ສະດວກ ແລະຂໍ້ຫຍຸ້ງຍາກໃນການດຳເນີນທຸລະກິດໃນໄລຍະຜ່ານມາ ເພື່ອຂໍທິດຊີ້ນຳຈາກທ່ານເຈົ້າແຂວງສະຫວັນນະເຂດ.
ໃນວັນດຽວກັນທ່ານ ເຈົ້າແຂວງ ກໍ່ໄດ້ສືບຕໍ່ເດີນທາງມາພົບປະໂອ້ລົມນຳຄະນະພັກ-ຄະນະນຳ ແລະພະນັກງານຫຼັກແຫຼ່ງຂອງເມືອງພີນ ທີ່ສະໂມສອນຫ້ອງວ່າການປົກຄອງເມືອງດັ່ງກ່າວ. ໃນນີ້, ທ່ານ ສຸດໃຈ ໄຊຍະວົງ ວ່າການເລຂາພັກເມືອງ ວ່າການເຈົ້າເມືອງພີນ ໄດ້ລາຍງານໃຫ້ຮູ້ວ່າ: ເມືອງພີນ ປະກອບມີ 15 ກຸ່ມບ້ານ, ມີ 99 ບ້ານ. ມີ 11.763 ຄອບຄົວ, ມີພົນລະເມືອງທັງໝົດ 74.862 ຄົນ, ປະກອບມີ: ເຜົ່າລາວ, ຜູ້ໄທ, ກະຕາງ ແລະມັງກອນ, ທົ່ວເມືອງມີ 17 ຮາກຖານພັກ, ມີ 141 ໜ່ວຍພັກ, ມີສະມາຊິກພັກທັງໝົດ 2.174 ສະຫາຍ, ກະກຽມດຳເນີນກອງປະຊຸມໃຫຍ່ຮາກຖານພັກ ແລະໜ່ວຍພັກອ້ອມຂ້າງໄດ້ 7 ໜ່ວຍ.
ເຊິ່ງໃນການລົງເຄື່ອນໄຫວວຽກງານໃນຄັ້ງນີ້, ທ່ານ ເຈົ້າແຂວງ ກໍ່ໄດ້ໃຫ້ກຽດໂອ້ລົມ ແລະທິດຊີ້ນຳຕໍ່ຄະນະພັກ-ຄະນະປົກຄອງ ແລະພະນັກງານຫຼັກແຫຼ່ງຂອງເມືອງເຊໂປນ ແລະເມືອງພີນ ໂດຍກ່ອນອື່ນ, ທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ເມືອງຍາດມາໄດ້ໃນໄລຍະຜ່ານມາ ພ້ອມນີ້, ທ່ານເຈົ້າແຂວງ ໄດ້ເນັ້ນໃຫ້ເມືອງ ກະກຽມຄວາມພ້ອມດ້ານຕ່າງໆແກ່ການດຳເນີນກອງປະຊຸມໃຫຍ່ 3 ຂັ້ນຂອງພັກ ໂດຍສະເພາະແມ່ນທາງດ້ານເນື້ອໃນ ກໍ່ຄືບັນດາໂຕເລກແຜນພັດທະນາເສດຖະກິດ-ສັງຄົມ ຕ້ອງໄດ້ໃຫ້ສຳເລັດນັບແຕ່ຂັ້ນຮາກຖານ ເພື່ອເປັນບ່ອນອີງໃນການກຳນົດແຜນຂອງຂັ້ນເມືອງ, ຂັ້ນແຂວງ ແລະສູນກາງ ເພື່ອໃຫ້ມີຄວາມເອກະພາບກັນ, ຊຶ່ງກອງປະຊຸມໃຫຍ່ຂັ້ນເມືອງ ຄາດວ່າຈະໄດ້ຈັດຂຶ້ນໃນຕົ້ນປີ 2025, ຂັ້ນແຂວງ ແມ່ນໃນຊ່ວງເດືອນສິງຫາ 2025 ແລະຂັ້ນສູນກາງຄາດວ່າຕົ້ນປີ 2026 ໂດຍໄລຍະເວລາແຕ່ລະຂັ້ນ ແມ່ນບໍ່ໃຫ້ເກີນ 6 ເດືອນ ທັງນີ້ກໍ່ເພື່ອບໍ່ໃຫ້ບັນດາໂຕເລກແຜນການຂອງແຕ່ລະຂັ້ນ ຜິດດ່ຽງກັນຫຼາຍ ຈາກນີ້, ທ່ານ ເຈົ້າແຂວງ ຍັງໄດ້ເນັ້ນໜັກໃຫ້ແຕ່ລະເມືອງຖືສຳຄັນຕໍ່ກັບວຽກງານການປັບປຸງຮາກຖານການເມືອງ ໂດຍສະເພາະບັນດາກຸ່ມບ້ານຕ່າງໆ ທີ່ຢູ່ໃນຄວາມຮັບຜິດຊອບຂອງຕົນ ເພື່ອ ໃຫ້ມີຄວາມໜັກແໜ້ນ ເຂັ້ມແຂງ ເພາະຖ້າຮາກຖານການເມືອງເຮົາບໍ່ໜັກແໜ້ນ ຈະເຮັດໃຫ້ປະກົດການຫຍໍ້ທໍ້ຕ່າງໆເກີດຂຶ້ນ ສະນັ້ນ, ຈິ່ງຮຽກຮ້ອງມາຍັງຄະນະພັກແຕ່ລະຂັ້ນ ຕ້ອງໄດ້ເອົາໃຈໃສ່ຈິງຈັງ ແລະຊີ້ນຳ-ນຳພາຢ່າງໃກ້ຊິດຕິດແທດ ຈາກນີ້, ທ່ານ ເຈົ້າແຂວງ ກໍ່ຍັງໄດ້ໃຫ້ທິດຊີ້ນຳໃນຫຼາຍບັນຫາສຳຄັນ ຊຶ່ງລ້ວນແລ້ວແຕ່ເປັນບົດຮຽນອັນສຳຄັນຕໍ່ການພັດທະນາເສດຖະກິດ-ສັງຄົມ ກໍ່ຄືການປັບປຸງຊີວິດການເປັນຢູ່ຂອງພໍ່່ແມ່ປະຊາຊົນບັນດາເຜົ່າພາຍໃນເມືອງເຊໂປນ ແລະເມືອງພີນ.
ຄໍາເຫັນ