 |
ທ່ານ ທອງໃສ ໄຊຍະວົງຄໍາດີ ເລຂາຄະນະບໍລິຫານງານພັກເມືອງ ອຸທຸມພອນ ໄດ້ລາຍງານວ່າ: ພາຍຫຼັງທີ່ລັດຖະບານໄດ້ມີມະຕິຮັບຮອງເອົາການໂຮມກົງຈັກການຈັດຕັ້ງຫຼາຍອົງການເຂົ້າກັນ, ຄະນະນໍາເມືອງກໍໄດ້ເຜີຍແຜ່ມະຕິຂອງສູນກາງພັກ, ມະຕິຂອງສະພາແຫ່ງຊາດ,ຄໍາສັ່ງຂອງແຂວງ,ມະຕິກອງປະຊຸມໃຫຍ່ອົງຄະນະພັກເມືອງ ຢູ່ຂັ້ນເມືອງໄດ້ 5 ຄັ້ງ ແລະ ເຜີຍແຜ່ຢູ່ຮາກຖານບ້ານໄດ້ 5 ຈຸດ ຖືວ່າທົ່ວເຖິງທຸກເປົ້າໝາຍ, ທຸກບ້ານ,ພ້ອມນັ້ນ ຍັງໄດ້ມອບໃຫ້ບັນດາທ່ານຄະນະພັກຮາກຖານ,ເລຂາໜ່ວຍພັກບ້ານສຶບຕໍ່ເຜີຍແຜ່ໃຫ້ປະຊາຊົນຢູ່ແຕ່ລະບານໄດ້ເຂົ້າໃຈຢ່າງເລິກຊຶ່ງຕື່ມອີກ
ອົງຄະນະພັກເມືອງອຸທຸມພອນ ສໍາເລັດກອງປະຊຸມຄົບຄະນະ ຄັ້ງທີ 1 ສະໄໝທີ 9, ເພື່ອເຊື່ອມຊືມບົດລາຍງານການເມືອງ,ແຜນພັດທະນາເສດຖະກິດ-ສັງຄົມ 5 ປີ ທີ່ວາງໄວ້,ສະເພາະໃນ 6 ເດືອນຕົ້ນປີ 2025 ການນໍາຂອງເມືອງໄດ້ສຸມໃສ່ການພັດທະນາເສດຖະກິດ-ສັງຄົມ ເຮັດໃຫ້ເສດຖະກິດຂອງເມືອງສືບຕໍ່ຂະຫຍາຍຕົວຢູ່ໃນລະດັບເກືອບ 3%, ລວມຍອດຜະລິດຕະພັນພາຍໃນ (ຈີດີພີ) ບັນລຸໄດ້ 2,423.10 ຕື້ກີບ,ໃນປີນີ້ແຜນເກັບລາຍຮັບເຂົ້າງົບປະມານທັງໝົດ 16.4 ຕື້ກີບ,ມາຮອດປັດຈຸບັນສາມາດເກັບລາຍຮັບເຂົ້າງົບປະມານໄດ້ແລ້ວ 8.3 ຕື້ກີບ ເທົ່າກັບ 51%,ນອກຈາກນີ້ຍັງໄດ້ຊຸກຍູ້ໃຫ້ປະຊາຊົນປັກດໍາເຂົ້ານາປີໄດ້ແລ້ວ 60%,ນາຢອດ 200 ເຮັກຕາ,ນາຫວ່ານ 100 ເຮັກຕາ ແລະ ປູກພຶດລະດູຝົນໄດ້ແລ້ວ 595 ເຮັກຕາກວ່າ.
ທ່ານ ທອງໃສ ໄຊຍະວົງຄໍາດີ ກ້າວຕື່ມວ່າ: ເພື່ອກະກຽມສ້າງເປັນຕາແສງ, ຄະນະນໍາເມືອງໄດ້ປະກາດສ້າງຕັ້ງ 4 ຄະນະພັກຮາກຖານຄື: ຄະນະພັກຮາກຖານໂພນເດື່ອ ມີ 12 ບ້ານ,ຄະນະພັກຮາກຖານດົງທ່າ ມີ 12 ບ້ານ,ຄະນະພັກຮາກຖານໜອງບົວທອງ ມີ 12 ບ້ານ,ຄະນະພັກຮາກຖານດົງນ້ອຍ ມີ 7 ບ້ານ, ຊຶ່ງໄດ້ແຕ່ງຕັ້ງກໍາມະການພັກເມືອງ ເປັນເລຂາຄະນະພັກຮາກຖານລໍຖ້າແຕ່ງຕັ້ງເປັນປະທານປົກຄອງຕາແສງໃນຕໍ່ໜ້າ,ແຕ່ງຕັ້ງພະນັກງານຫຼັກແຫຼ່ງສຶບທອດປ່ຽນແທນຂອງເມືອງເປັນຮອງເລຂາຄະນະພັກຮາກຖານ. ປັດຈຸບັນໄດ້ສໍາຫຼວດທີ່ດິນສະຖານທີ່ຈະສ້າງຕັ້ງສໍານັກງານປົກຄອງຕາແສງສໍາເລັດແລ້ວ
ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ເນັ້ນວ່າ: ພາຍຫຼັງເຜີຍແຜ່ຜົນສໍາເລັດມະຕິກອງປະຊຸມໃຫຍ່ຄັ້ງທີ 9 ຂອງອົງຄະນະພັກເມືອງແລ້ວ ກໍຕ້ອງປະເມີນຄືນໃນຄະນະພັກຊຸດທີ 9 ໂດຍເນັ້ນໃສ່ການເຊື່ອມຊືມໃນ 25 ສະຫາຍ. ອັນນີ້, ຖືວ່າມີຄວາມສໍາຄັນຫຼາຍ. ເມືອງຂອງພວກເຮົາມີຫຼາຍທ່າແຮງບົ່ມຊ້ອນ ເປັນຕົ້ນ ທ່າແຮງທີ່ຕັ້ງຂອງເມືອງ,ທ່າແຮງທາງດ້ານເສດຖະກິດໃນການພັດທະນາ, ສະນັ້ນຢາກໃຫ້ບັນດາໃນ 25 ສະຫາຍ ມີຄວາມຮັບຮູ້ຕໍ່ມະຕິຫຼາຍໜ້ອຍຊໍ່າໃດ? ເພື່ອຢາກໃຫ້ໄປລວງດຽວກັນ,ສິ່ງສໍາຕ້ອງແກ້ໃຫ້ໄດ້ບັນຫາແນວຄິດຄອງເດີມ,ຄຽງຄູ່ກັນນີ້ການເຊື່ອມຊືມມະຕິ 5 ຂອງສູນພັກ ເພື່ອເຮັດໃຫ້ລະບົບຮາກຖານມີຄວາມເຂັ້ມແຂງຮອບດ້ານ,ການສ້າງຕັ້ງຕາແສງ ກໍແມ່ນແນໃສ່ເຮັດໃຫ້ລະບົບການເມືອງມີຄວາມເຂັ້ມແຂງ,ຂໍໃຫ້ບັນດາສະຫາຍກໍາໄດ້ທິດຊີ້ນໍາຂອງຂັ້ນເທິງ ແລະ ກໍຕ້ອງຄໍານຶງເຖິງການສ້າງພະນັກງານກັບທີ່,ໂດຍສະເພາະເພດຍິງ ແລະ ເຜົ່າ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ