ເຈົ້າແຂວງສະຫວັນນະເຂດ ຊີ້ນຳວຽກງານຮອບດ້ານຢູ່ສອງເມືອງ

ໂອກາດນີ້, ທ່ານເຈົ້າແຂວງ ໄດ້ພົບປະໂອ້ລົມ ແລະ ໃຫ້ທິດຊີ້ນຳຫຼາຍບັນຫາສຳຄັນຕໍ່ຄະນະບໍລິຫານງານພັກເມືອງຊຸດໃໝ່ຂອງສອງເມືອງດັ່ງກ່າວ, ຊຶ່ງມີເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ປກຊ-ປກສ, ເລຂາພັກບ້ານ-ນາຍບ້ານພາຍໃນສອງເມືອງເຂົ້າຮ່ວມຮັບຟັງ.

ທ່ານ ສຸກສາຄອນ ໂພທິລາດ ເລຂາພັກເມືອງຊົນນະບູລີ ແລະ ທ່ານ ບຸນຊູ ທຸ່ນຊົມພູ ເລຂາພັກເມືອງຈຳພອນ ໄດ້ລາຍງານໃຫ້ຮູ້ກ່ຽວກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນອົງຄະນະພັກເມືອງໃນໄລຍະຜ່ານມາໂດຍສັງເຂບ. ຈາກນັ້ນ, ທ່ານ ເຈົ້າແຂວງສະຫວັນນະເຂດ ໄດ້ໂອ້ລົມ, ຊຶ່ງກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍຄວາມພະຍາຍາມຂອງຄະນະບໍລິຫານງານພັກເມືອງທີ່ໄດ້ເອົາໃຈໃສ່ຊີ້ນຳ-ນຳພາໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກເມືອງໃນແຕ່ລະຂົງເຂດວຽກງານ, ຊຶ່ງສາມາດຍາດໄດ້ຜົນສຳເລັດໃນຫຼາຍດ້ານ. ພ້ອມນີ້, ຍັງໄດ້ເນັ້ນໜັກ ຕໍ່ຄະນະບໍລິຫານງານພັກເມືອງຊຸດໃໝ່ໃນຈຳນວນ 25 ສະຫາຍໃຫ້ເອົາໃຈໃສ່ເຊື່ອມຊຶມ ແລະ ກໍາແໜ້ນເນື້ອໃນມະຕິກອງປະຊຸມໃຫຍ່ອົງຄະນະພັກເມືອງເປັນຕົ້ນ: ບົດລາຍງານການເມືອງ ແລະ ແຜນພັດທະນາເສດຖະກິດ-ສັງຄົມທັງສອງພາກໃຫ້ເລິກເຊິ່ງ, ອັນສໍາຄັນຕ້ອງກຳໃຫ້ໄດ້ຜົນສຳເລັດທີ່ເປັນດ້ານຕັ້ງໜ້າຂອງຄະນະພັກເມືອງຊຸດເກົ່າ, ເພື່ອເສີມຂະຫຍາຍໃຫ້ຍືນຍົງພ້ອມທັງກຳໃຫ້ໄດ້ບັນດາຈຸດອ່ອນຂໍ້ຄົງຄ້າງເພື່ອຄົ້ນຄວ້າກັບຄະນະພັກເພື່ອວາງແຜນການແກ້ໄຂ ແລະ ພ້ອມກັນຊອກຄົ້ນທ່າແຮງບົ່ມຊ້ອນໃນດ້ານຕ່າງໆພາຍໃນທ້ອງຖິ່ນຂອງຕົນ, ເພື່ອນຳໃຊ້ເຂົ້າໃນການພັດທະນາເສດຖະກິດ-ສັງຄົມ, ຍູ້ແຮງການສ້າງເສດຖະກິດເອກະລາດເປັນເຈົ້າຕົນເອງ ແລະ ໃຫ້ພ້ອມກັນແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມໃຫ້ຫຼຸດໜ້ອຍຖອຍລົງຢ່າງຕໍ່ເນື່ອງ,

ທ່ານເຈົ້າແຂວງ ຍັງໄດ້ຍົກໃຫ້ຮູ້ເຖິງຄວາມໝາຍຄວາມສຳຄັນໃນການສ້າງຕັ້ງຕາແສງ, ຊຶ່ງແມ່ນການປັບປຸງບູລະນະລະບອບປະຊາທິປະໄຕ ປະຊາຊົນ, ເພື່ອສ້າງຮາກຖານການເມືອງໃຫ້ໜັກ ແໜ້ນເຂັ້ມແຂງ, ຊຶ່ງແມ່ນເນື້ອໃນຈິດໃຈຂອງພັກໃນການຫັນວຽກ, ຫັນບໍລິການຂອງລັດ, ຫັນນະໂຍ ບາຍ, ຫັນງົບປະມານ, ຫັນຄົນລົງສູ່ຮາກຖານ, ແນໃສ່ເພື່ອບໍລິການແກ່ປະຊາຊົນໃຫ້ມີຄວາມສະດວກສະບາຍທີ່ສຸດ, ພ້ອມນັ້ນ ກໍໃຫ້ປະຊາຊົນຮັບຮູ້, ເຂົ້າໃຈທຸກແນວທາງປ່ຽນແປງໃໝ່ຂອງພັກ-ລັດ, ໃຫ້ເຂົາເຈົ້າມີສ່ວນຮ່ວມໃນການພັດທະນາເສດຖະກິດ-ສັງຄັມ ແລະ ໃຫ້ປະຊາຊົນໄດ້ຊົມໃຊ້ໝາກຜົນທີ່ພວກເຂົາມີສ່ວນຮ່ວມ, ສຳລັບພະນັກງານທີ່ຈະລົງໄປປະຈຳຢູ່ຕາແສງແມ່ນໃຫ້ເຂົ້າໃຈວ່າບໍ່ແມ່ນການລົງຮາກຖານແຕ່ແມ່ນການໄປຮັບໜ້າທີ່ໃໝ່ ເພື່ອລົງນຳພາ-ຊີ້ນຳປະຊາຊົນໃຫ້ຮູ້ເຮັດການຜະລິດ, ສ້າງເສດຖະກິດປ່ຽນແປງໃໝ່ທີ່ກ້າວໜ້າ, ມີຄຸນນະພາບ. ຜູ້ທີ່ຈະປະກອບເປັນອົງຄະນະພັກຕາແສງຕ້ອງເປັນເຈົ້າການພັດທະນາທ້ອງຖິ່ນ ເຮັດໃຫ້ປະຊາຊົນບັນດາເຜົ່າພວກເຮົາມີຊີວິດການເປັນຢູ່ທີ່ດີຂຶ້ນຢ່າງເປັນກ້າວໆຕາມແນວທາງນະໂຍບາຍຂອງພັກ-ລັດວາງໄວ້.

ໃນໂອກາດນີ້, ທ່ານ ບຸນໂຈມ ອຸບົນປະເສີດ ພ້ອມຄະນະ ຍັງໄດ້ລົງໄປຕິດຕາມສະພາບຕາຝັ່ງເຈື່ອນເຊຊັງຊອຍ ບ້ານໂຄກຫົວຊ້າງ, ຕິດຕາມການສ້າງຄອງເໝືອງຊົນລະປະທານບ້ານດົງບູນ ເມືອງຊົນນະບູລີ ພ້ອມທັງໄດ້ສືບຕໍ່ຊຸກຍູ້ການກໍ່ສ້າງເສັ້ນທາງເບຕົງຂອງປະຊາຊົນບ້ານແກ້ງກອກກາງ ແລະ ບ້ານແກ້ງກອກດົງ ເມືອງຈຳພອນ, ຊຶ່ງໃນໂອກາດລົງເຄື່ອນໄຫວໃນແຕ່ລະຈຸດ, ທ່ານເຈົ້າແຂວງໄດ້ໃຫ້ທິດຊີ້ນຳທີ່ເປັນປະໂຫຍດຕໍ່ການພັດທະນາທ້ອງຖິ່ນຮາກຖານ ແລະ ການຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າຂອງສອງເມືອງດັ່ງກ່າວ.