ແຂວງສະຫວັນນະເຂດ; ໃນວັນທີ 22 ມັງກອນຜ່ານມານີ້, ທ່ານ ບຸນໂຈມ ອຸບົນປເສີດ ກໍາມະການສູນກາງພັກ ເລຂາຄະນະບໍລິຫານງານພັກ ເຈົ້າແຂວງສະຫວັນນະເຂດ ພ້ອມດ້ວຍຫົວໜ້າ-ຮອງຫົວໜ້າພະແນກການອ້ອມຂ້າງແຂວງ ໄດ້ຂີ່ເຮືອຕາມແມ່ນ້ຳຂອງແຕ່ບ້ານຄັນທ່າຈານໄປຫາບ້ານດອນຖ້ຳເງິນເມືອງໄຊພູທອງ, ມີທ່ານນາງ ດາວວອນ ໄຊສຸລຽນ ເຈົ້າເມືອງໄຊພູທອງ ເພື່ອນຳເອົາເຄື່ອງອຸປະໂພກ-ບໍລິໂພກ ແລະ ເງິນຈຳນວນໜຶ່ງ ປະກອບສ່ວນໃນການພັດທະນາທ້ອງຖິ່ນໃນເຂດບ້ານດອນຖໍ້າເງິນ ແລະ ຢ້ຽມຢາມຖາມຂ່າວຊີວິດການເປັນຢູ່ຂອງປະຊາຊົນໃນເຂດດອນ. ໃນນັ້ນ, ໄດ້ຢ້ຽມຢາມເບິ່ງການສິດສອນຂອງໂຮງຮຽນປະຖົມສົມບູນ ບ້ານດອນຖໍ້າເງິນ ຊຶ່ງເປັນໂຮງຮຽນເອກະລາດຂຶ້ນກັບກຸ່ມບ້ານທີ 1 ຂອງເມືອງ, ມີຄູສອນ 2 ຄົນ ແລະ ມີນັກຮຽນແຕ່ຊັ້ນ ປໍ1 ຮອດຊັ້ນປໍ 5 ລວມມີນັກຮຽນ 20 ຄົນ ຍິງ 9 ຄົນ ໂດຍທ່ານເຈົ້າແຂວງ ໄດ້ມອບຊຸດນັກຮຽນ, ອຸປະກອນການຮຽນໃຫ້ນ້ອງນັກຮຽນ, ພ້ອມທັງໃຫ້ນັກຮຽນຮູ້ຮ້ອງເພງຊາດລາວ, ຮູ້ຮັກຊາດລາວ, ພ້ອມກັນຕັ້ງໃຈຮຽນ ເພື່ອເອົາຄວາມຮູ້ມາພັດທະນາຕົນເອງ ແລະ ໄດ້ມອບເງິນໃຫ້ໂຮງຮຽນຈຳນວນໜຶ່ງເພື່ອພັດທະນາໂຮງຮຽນຕື່ມອີກ. ຈາກນັ້ນ, ກໍໄດ້ພົບປະກັບອຳນາດການປົກຄອງ ແລະ ປະຊາຊົນເພື່ອຖາມກ່ຽວກັບການພັດທະນາຊີວິດການເປັນຢູ່, ການຊອກແຫຼ່ງລາຍຮັບໃຫ້ຄອບຄົວ ແລະ ໃຫ້ປະຊາຊົນສະເໜີຕໍ່ການນຳແຂວງກ່ຽວກັບຄວາມຕ້ອງການ ເພື່ອສຸມໃສ່ການພັດທະນາໃຫ້ດີຂຶ້ນ. ບ້ານດອນຖ້ຳເງິນມີ 48 ຫຼັງຄາເຮືອນ, 46 ຄອບຄົວ, ມີ 243 ຄົນ ຍິງ 111 ຄົນ, ມີເນື້ອທີ່ນາປີ 103 ເຮັກຕາ, ເນື້ອທີ່ການຜະລິດລະດູແລ້ງ 76 ເຮັກຕາ ລວມທັງການປູກພືດຖົ່ວດິນ, ສາລີ ແລະ ເຮັດນາແຊງ.
ບ້ານດອນຖໍ້າເງິນມີແຫຼ່ງທ່ອງທ່ຽວທຳມະຊາດຄື: ແຫຼ່ງທ່ອງທ່ຽວຖ້ຳໝາກຍໍປະຫວັດສາດເກົ່າ ຊຶ່ງເປັນກົກເຄົ້າປະຫວັດສາດບ້ານດອນຖ້ຳເງິນ, ປະຊາຊົນມີຄວາມຕ້ອງການທໍ່ແງ່ມ, ເພື່ອນຳເອົານ້ຳຂຶ້ນຫົດເນື້ອທີ່ປູກພືດລະດູແລ້ງ. ຕ້ອງການສ້າງສາລາໂຮງທຳໃຫ້ສຳເລັດ.
ໂອກາດນີ້, ທ່ານເຈົ້າແຂວງ ກໍໄດ້ມອບເງິນພັດທະນາບ້ານ ແລະ ທ່ານເຈົ້າເມືອງໄຊພູທອງກໍໄດ້ລະດົມການປະກອບສ່ວນຈາກພະແນກການທີ່ໄປຮ່ວມຄັ້ງນີ້ໄດ້ເງິນຈຳນວນ 40 ລ້ານກ່ວາກີບເພື່ອສ້າງສາລາໂຮງທຳຂອງບ້ານ ໃຫ້ສຳເລັດ.
ໃນວັນດຽວກັນນີ້, ທ່ານເຈົ້າແຂວງໄດ້ໄປຢ້ຽມຢາມນາຍ ແລະ ພົນທະຫານທີ່ປະຕິບັດໜ້າທີ່ຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, ທີ່ປະຈໍາຢູ່ບັນດາເກາະດອນຕ່າງໆ, ພ້ອມມອບເງິນຈໍານວນໜຶ່ງ ໃຫ້ກັບຈຸທະຫານທີ່ຂຶ້ນກັບກອງຮ້ອຍທະຫານຊາຍແດນ 325.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ