ເຈົ້າແຂວງຊຽງຂວາງ ຊີ້ນຳການກະກຽມດຳເນີນກອງປະຊຸມໃຫຍ່ເມືອງຜາໄຊ

ທ່ານ ບຸນຈັນ ສີວົງພັນ ກຳມະການສູນກາງພັກ ເລຂາພັກແຂວງ ເຈົ້າແຂວງຊຽງຂວາງ ພ້ອມດ້ວຍຄະນະໄດ້ລົງຢ້ຽມຢາມ ແລະ ຊີ້ນຳການກະກຽມ ດຳເນີນກອງປະຊຸມໃຫຍ່ຂອງເມືອງຜາໄຊ ເມື່ອວັນທີ 26 ມີນາຜ່ານມາ.  ທ່ານ ບຸນມາ ສຸຍະວົງ ກຳມະການພັກແຂວງ ເລຂາພັກເມືອງ ເຈົ້າເມືອງຜາໄຊ ໄດ້ລາຍງານການຊີ້ນຳ-ນຳພາພັດທະນາເສດຖະກິດ-ສັງຄົມຂອງເມືອງ ຊຶ່ງເສດຖະກິດຂອງເມືອງໄດ້ຂະຫຍາຍຕົວ 4,18% ຕໍ່ປີ, ລວມຍອດຜະລິດຕະພັນພາຍໃນບັນລຸ 154,40 ຕື້ກີບ, ສະເລ່ຍໄດ້ 11.949.000 ກີບຕໍ່ຄົນຕໍ່ປີ ໂດຍຖືເອົາການປູກຝັງຽລ້ຽງສັດໃຫຍ່ເປັນສິນຄ້າ, ການທ່ອງທ່ຽວ ແລະ ໄດ້ລົງຕິດແທດກັບບັນດາບ້ານໃນການກະກຽມດຳເນີນກອງປະຊຸມໃຫຍ່ຂອງບ້ານ, ກຸ່ມບ້ານ ແລະ ໜ່ວຍພັກອ້ອມຂ້າງສຳນັກງານ. ປັດຈຸບັນສຳເລັດແລ້ວ 35 ໜ່ວຍພັກ, ຍັງບໍ່ທັນສຳເລັດ 33 ໜ່ວຍພັກ ແລະ 4 ຄະນະພັກຮາກຖານ. 
ໂອກາດນີ້, ທ່ານເຈົ້າແຂວງຊຽງຂວາງ ໄດ້ມີຄຳຄິດເຫັນແລກປ່ຽນຊີ້ນຳ ຊຶ່ງທ່ານໄດ້ເນັ້ນໜັກໃຫ້ເຕົ້າໂຮມຄວາມສາມັກຄີພາຍໃນ-ພາຍນອກໃຫ້ກ້ວາງຂວາງບົນພື້ນຖານແນວທາງຂອງພັກ-ລັດ, ຕ້ານ-ສະກັດກັ້ນບັນຫາຢາເສບຕິດ ແລະ ເຝົ້າລະວັງການລະບາດຂອງຜະຍາດຄົນ-ສັດ ເນື່ອງຈາກກຽມເຂົ້າລະດູຝົນ ຊຶ່ງມັກມີຜະຍາດຫຼາຍສະນິດເກີດຂື້ນ, ສຸມໃສ່ແກ້ໄຂຄວາມທຸກຍາກເພິ່ງຕົນເອງກຸ້ມຕົນເອງ, ປົກປັກຮັກສາປ່າໄມ້, ເອົາໃຈໃສ່ວຽກງານ ປກຊ-ປກສ ເປັນຫຼັກ, ກຳປະຊາຊົນໃຫ້ແໜ້ນ, ຮັກສາເຂດນ້ຳແດນດິນ, ຊຸກຍູ້ສົ່ງເສີມລູກຫຼານເຂົ້າໂຮງຮຽນ, ຮັກສາອານາໄມ 3 ສະອາດ ແລະ ຊຸກຍູ້ສົ່ງເສີມວຽກງານອື່ນໆ. ນອກນີ້ ທ່ານເຈົ້າແຂວງໆຊຽງຂວາງ ພ້ອມດ້ວຍຄະນະ ໄດ້ລົງຢ້ຽມຢາມການລ້ຽງມ້າຂອງປະຊາຊົນບ້ານນາໂຄ້, ການຫຼໍ່ບ່ວງຂອງປະຊາຊົນບ້ານນາເພຍ, ກຸ່ມສ້າງເຕົາໂລ້,  ກຸ່ມລ້ຽງແບ້ບ້ານຫໍກາງ ແລະໂອ້ລົມຊີ້ນຳປະຊາຊົນໃນການກະກຽມ ດຳເນີນກອງປະຊຸມໃຫຍ່ຂອງໜ່ວຍພັກບ້ານ ພ້ອມມອບເຄື່ອງນຸ່ງຫົ່ມຈຳນວນໜຶ່ງໃຫ້ກັບປະຊາຊົນ ແລະ ໂຮງຮຽນບ້ານນ້ຳກະ
(ຂ່າວ: ບຸນມີ ແສງທຸມມີ)