ເຈົ້າເມືອງຫົງສາ ເຄື່ອນໄຫວຊຸກຍູ້ວຽກງານຢູ່ ປກສ ເມືອງ

ທ່ານ ພອນສະຫວັນ ໄຊສົມພັນ ເຈົ້າເມືອງໆ ຫົງສາ ແຂວງໄຊຍະບູລີ ປະທານປ້ອງກັນຊາດ(ປກຊ)-ປ້ອງກັນຄວາມສະຫງົບ(ປກສ)ເມືອງ ໄດ້ເຄື່ອນໄຫວຊຸກຍູ້ວຽກງານຢູ່ກອງບັນຊາການ ປກສ ເມືອງໃນວັນທີ 15 ພຶດສະພາຜ່ານມາ ທີ່ສະໂມສອນກອງບັນຊາການດັ່ງກ່າວ ໂດຍມີຄະນະພັກ-ຄະນະກອງບັນຊາການ, ຫົວໜ້າພະແນກ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພັນໂທ ທອງໄຫຼ ເພັດດາວົງ ຫົວໜ້າກອງບັນຊາການ ປກສ ເມືອງ ໄດ້ຂຶ້ນລາຍງານຫຍໍ້ການຈັດຕັ້ງປະຕິບັດວຽກງານໄລຍະ 3 ເດືອນຜ່ານມາ ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ປະ ກົດການຫຍໍ້ທໍ້ຕ່າງໆທີ່ເກີດຂຶ້ນ ພ້ອມທັງຜ່ານທິດທາງແຜນການໃນຕໍ່ໜ້າ.
 ໂອກາດນີ້ທ່ານເຈົ້າເມືອງໄດ້ມີຄຳເຫັນໂອ້ລົມ ພ້ອມເນັ້ນໜັກໃຫ້ຄະນະພັກ-ຄະນະກອງບັນຊາການ ຈົ່ງສືບຕໍ່ສຶກສາອົບຮົມການເມືອງ-ແນວຄິດໃຫ້ກຳລັງ ປກສ ມີຄວາມໜັກແໜ້ນ, ອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການນໍາພາຂອງພັກ-ລັດ, ເພີ່ມທະວີຄວາມຮັບຜິດຊອບໃນການນຳພາບັນຊາ, ກໍ່ສ້າງພັກ, ກໍ່ສ້າງກຳລັງໃຫ້ໜັກແໜ້ນເຂັ້ມ ແຂງ, ເສີມຂະຫຍາຍຄວາມສາມັກຄີພາຍໃນໃຫ້ແໜ້ນແຟ້ນ ແລະ ເນັ້ນໜັກໃຫ້ ປກສ ກຸ່ມບ້ານ ຕະຫຼອດຮອດນາຍ ແລະ ພົນຕຳຫຼວດທົ່ວເມືອງ ຈົ່ງພ້ອມກັນເປັນເຈົ້າການໃນການເຮັດໜ້າວຽກງານທີ່ໄດ້ຮັບການມອບໝາຍຈາກຂັ້ນເທິງຢ່າງຕັ້ງໜ້າ, ເອົາໃຈໃສ່ຕ້ານປະກົດການຫຍໍ້ທໍ້ໃນສັງຄົມໃຫ້ດີຂຶ້ນ. ເປັນຕົ້ນໃຫ້ເຂັ້ມງວດໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ສືບຕໍ່ຫັນລົງກໍ່ສ້າງຮາກຖານການເມືອງຢ່າງແຂງ ແຮງ ເຮັດໃຫ້ວຽກງານປ້ອງກັນຄວາມສະຫງົບກາຍເປັນສະຕິ ແລະ ຄວາມຮັບຜິດຊອບຮ່ວມກັນຂອງທົ່ວສັງຄົມ.  ຂ່າວ-ພາບ: ກິດຕິສັກ ບົວໄລ