ຈະພັດທະນາຂະແໜງສ່ວຍສາອາກອນໃຫ້ເປັນທັນສະໄໝແບບຄົບຊຸດ

ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ກະຊວງການເງິນກ່າວຄວາມເປັນມາຂອງໂຄງການເພີ່ມລາຍຮັບສ່ວຍສາອາກອນພາຍໃນປະເທດແບບທັນສະໄໝຕໍ່ພິທີເປີດໂຄງການເພີ່ມລາຍຮັບສ່ວຍສາອາກອນພາຍໃນປະເທດແບບທັນສະໄໝເມື່ອບໍ່ດົນມານີ້ວ່າ: ໃນການຈັດຕັ້ງປະຕິບັດໂດຍຈະສຸມໃສ່ພັດທະນາ 4 ດ້ານຄື: ການຫັນເປັນທັນສະໄໝໃນການບໍລິການເສຍອາກອນຜ່ານຊ່ອງທາງດີຈີຕອນໂດຍພັດທະນາຖານຂໍ້ມູນ, ປັດຈຸບັນພວກເຮົານຳໃຊ້ລະບົບ Server ຊຶ່ງບໍ່ສາມາດຮອງຮັບຂໍ້ມູນເປັນຈໍານວນຫຼາຍໄດ້ ຈໍາເປັນຕ້ອງໄດ້ຍ້າຍຂໍ້ມູນໄປໄວ້ຢູ່ຖານຂໍ້ມູນ Cloud ທີ່ສາມາດຮອງຮັບຂໍ້ມູນຂະໜາດໃຫຍ່ ແລະ ພັດທະນາລະບົບເຊື່ອມຕໍ່ອື່ນໆໄດ້ຢ່າງມີປະສິດທິພາບ, ການພັດທະນາລະບົບຄຸ້ມຄອງໃບເກັບເງິນແບບເອເລັກໂຕຣນິກ (E-invoice): ລະບົບດັ່ງກ່າວແມ່ນມີຄວາມສຳຄັນຫຼາຍຕໍ່ຂະແໜງສ່ວຍສາອາກອນ ເພື່ອສົ່ງເສີມການນຳໃຊ້ໃບເກັບເງິນ, ລະບົບ E-Invoice ທີ່ໂຄງການຈະພັດທະນາໃໝ່ນີ້ ຈະຊ່ວຍໃຫ້ເຈົ້າໜ້າທີ່ສ່ວຍສາອາກອນ ກວດສອບຄວາມຖືກຕ້ອງຂອງໃບເກັບເງິນອາກອນທີ່ຊໍາລະຜ່ານລະບົບທະນາຄານ, ຊ່ວຍໃຫ້ຜູ້ຂາຍ, ຜູ້ຊື້ມີຄວາມສະດວກ ແລະ ປະຢັດຄ່າໃຊ້ຈ່າຍໃນການຈັດພິມໃບເກັບເງິນ, ການພັດທະນາການວິເຄາະ-ວິໄຈຂໍ້ມູນຄວາມສ່ຽງໃນການຫຼົບຫຼິີກການປະຕິບັດພັນທະອາກອນ: ໂມດູນດັ່ງກ່າວຈະສ້າງຄວາມເຂັ້ມແຂງໃຫ້ກົມສ່ວຍສາອາກອນ ໃນການນໍາໃຊ້ຂໍ້ມູນຈາກຫຼາຍແຫຼ່ງທີ່ມາ ເພື່ອວິເຄາະວິໄຈລາຍຮັບ ແລະ ປະເມີນຄວາມສ່ຽງຜູ້ເສຍອາກອນທີ່ຫຼົບຫຼີກເຊື່ອງອຳລາຍຮັບ ໂດຍລະບົບຈະມີການອອກແບບ ແລະ ພັດທະນາ Platform ເພື່ອວິເຄາະຂໍ້ມູນ ໃນນັ້ນຈະມີການນໍາໃຊ້ຂໍ້ມູນການແຈ້ງ-ມອບພັນທະອາກອນຕ່າງໆ ຂອງຜູ້ເສຍອາກອນໂດຍແຍກເປັນ ປະເພດ ບຸກຄົນ, ນິຕິບຸກຄົນ ຫຼື ການຈັດຕັ້ງ ແລະ ຂະແໜງການດຳເນີນທຸລະກິດ (ການຄ້າ, ການຜະລິດ ແລະ ການບໍລິການ), ການສ້າງຕັ້ງສະຖາບັນການສຶກສາດ້ານອາກອນ (ຫ້ອງຝຶກອົບຮົມ): ເປັນກິດຈະກໍາທີ່ຈະຊ່ວຍເພີ່ມປະສິດທິພາບໃຫ້ຄວາມຮູ້ກ່ຽວກັບວຽກງານສ່ວຍສາອາກອນ ໂດຍການນຳໃຊ້ເຕັກໂນໂລຊີທີ່ທັນສະໄໝ (ສະໜອງອຸປະກອນດ້ານໄອທີ ແລະ ສິ່ງອໍານວຍຄວາມສະດວກຕ່າງໆ) ເພື່ອອໍານວຍຄວາມສະດວກເພີ່ມຂີດຄວາມສາມາດໃຫ້ເຈົ້າໜ້າທີ່ສ່ວຍສາອາກອນ ໃນການນຳໃຊ້ເຄື່ອງມືທັນສະໄໝເຂົ້າໃນການຈັດເກັບລາຍຮັບໃຫ້ໂປ່ງໃສ, ວ່ອງໄວ ແລະ ສາມາດກວດສອບໄດ້.

ໂຄງການເພີ່ມລາຍຮັບສ່ວຍສາອາກອນພາຍໃນປະເທດແບບທັນສະໄໝ ແມ່ນເປັນການສືບຕໍ່ພັດທະນາວຽກງານຄຸ້ມຄອງສ່ວຍສາອາກອນເປັນທັນສະໄໝຢ່າງຕໍ່ເນື່ອງ ຊຶ່ງຈະໄດ້ສຸມໃສ່ບັນດາກິດຈະກຳທີ່ເປັນບຸລິມະສິດ, ເພື່ອສ້າງຄວາມເຂັ້ມແຂງໃຫ້ພະນັກງານສ່ວຍສາອາກອນ ແລະ ຜູ້ເສຍອາກອນໃຫ້ມີຄວາມເຂົ້າໃຈຢ່າງລວງເລິກ. ໂຄງການດັ່ງກ່າວເປັນການປະກອບສ່ວນທີ່ສຳຄັນ ແລະ ສອດຄ່ອງກັບແຜນຍຸດທະສາດເສດຖະກິດດີຈີຕອນຂອງລັດຖະບານ ໂດຍມີເປົ້າໝາຍໃນການຈັດເກັບລາຍຮັບຂອງຂະ ແໜງສ່ວຍສາອາກອນໃຫ້ຄົບຖ້ວນ, ເພີ່ມລາຍຮັບພາຍໃນປະເທດໃຫ້ມີຄວາມຍືນຍົງ ໂດຍມີຄາດໝາຍໂຕເລກລາຍຮັບສ່ວຍສາອາກອນຢ່າງໜ້ອຍບໍ່ຫຼຸດ 20% ຂອງ GDP. ເຖິງແມ່ນວ່າ ມີລະບົບການຄຸ້ມຄອງທີ່ທັນສະໄໝ, ມີແຜນງານຈຸດສຸມໃນການຕິດຕາມການຈັດຕັ້ງປະຕິບັດ, ແຕ່ໃນການຈັດຕັ້ງປະຕິບັດຕົວຈິງແລ້ວ ແມ່ນມີຄວາມຈຳເປັນທີ່ສຸດຕ້ອງມີສ່ວນຮ່ວມຈາກຫຼາຍພາກສ່ວນ ລວມທັງພາກລັດ, ພາກທຸລະກິດ ແລະ ທຸກຊັ້ນຄົນໃນສັງຄົມ ໂດຍສະເພາະຜູ້ເສຍອາກອນຕ້ອງໃຫ້ການຮ່ວມມື ໃຫ້ການສະໜັບສະໜູນ ເພື່ອເຮັດໃຫ້ການຫັນປ່ຽນຈາກລະບົບທີ່ຂີດຂຽນດ້ວຍມືໄປສູ່ລະບົບດີຈີຕອນທີ່ກ້າວໜ້າ ແລະ ທັນສະໄໝຂຶ້ນກວ່າເກົ່າ.