 |
ໂອກາດນີ້, ທ່ານ ສຸລິເດດ ແກ້ວບົວລະເພັດ ຫົວໜ້າພະແນກສຶກສາທິການ ແລະ ກິລາ ໄດ້ລາຍງານການກະກຽມນັກກິລາເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ XII ຊຶ່ງໄດ້ເຫັນດີ ເປັນເອກະພາບສົ່ງນັກກິລາເຂົ້າຮ່ວມ 21 ປະເພດກິລາ ຄື: ບານເຕະ, ບານບ້ວງ, ບານສົ່ງ, ແລ່ນ-ລານ, ກະຕໍ້, ດອກປິກໄກ່, ເປຕັ່ງ, ປິ່ງປ໋ອງ, ຍິງປືນ, ເທັນນິດ, ລອຍນໍ້າ, ຊ່ວງເຮືອ, ກ໊ອຟ, ໝາກເສິກ, ເທຄວັນໂດ, ມວຍລາວ, ມວຍສາກົນ, ຄຣາເຕໂດ, ວຸຊູ, ໝາກຄ່າງ ແລະ ໜ້າເກັກ. ລວມມີຄະນະນໍາ, ຄູຝຶກ, ນັກກິລາ ເຂົ້າຮ່ວມທັງໝົດ 389 ຄົນ ຍິງ 85 ຄົນ, ຄາດຄະເນຫຼຽນຈະສູ້ຊົນໃຫ້ໄດ້ 16 ຫຼຽນຄໍາ, 21 ຫຼຽນເງິນ ແລະ 33 ຫຼຽນທອງແດງ ລວມທັງໝົດ 70 ຫຼຽນ.
ທ່ານ ບຸນເລື່ອມ ມະນີວົງ ໄດ້ຍົກໃຫ້ເຫັນຄວາມໝາຍສໍາຄັນຂອງວຽກງານກິລາ ຕໍ່ກັບການພັດທະນາເສດຖະກິດ-ສັງຄົມ, ກິລາ ເພື່ອສຸຂະພາບ, ມິດຕະພາບ ແລະ ການພັດທະນາ ທັງເປັນການຄັດເລືອກນັກກິລາແຕ່ລະປະເພດຂອງແຂວງ ໄປເປັນນັກກິລາລະດັບຊາດ. ການເຂົ້າຮ່ວມງານມະຫະກໍາກິລາຄັ້ງນີ້, ເປັນການເຄື່ອນໄຫວເກັບກໍາບົດຮຽນ, ປະສົບການ. ດັ່ງນັ້ນ, ຈືຶ່ງຮຽກຮ້ອງໃຫ້ຄະນະນໍາ, ຄູຝຶກ ແລະ ນັກກິລາທຸກຄົນ ເອົາໃຈໃສ່ຮັກສາສຸຂະພາບ, ຮັດແໜ້ນຄວາມສາມັກຄີພາຍໃນ; ສີ່ງສຳຄັນ ໄລຍະເຂົ້າຮ່ວມແຂ່ງຂັນນັກກິລາທຸກສະຫະພັນຕ້ອງມີວິໄນ, ມີນໍ້າໃຈເສຍສະຫຼະ, ມີຄວາມອົດທົນ ແລະ ມີຄວາມຮັບຜິດຊອບ ຕໍ່ໜ້າທີ່ຂອງຕົນ, ທຸ້ມເທພາລະກໍາລັງ, ເຕັກນິກສະເພາະຕົວ, ເຮັດໃຫ້ສຸດຄວາມສາມາດ, ຮູ້ໄດ້, ຮູ້ເສຍ, ສູ້ດ້ວຍນໍ້າໃຈນັກກິລາ; ສ່ວນຄູຝຶກ ທຸກສະຫະພັນກິລາ ຕ້ອງເອົາໃຈໃສ່ແນະນໍາເຕັກນິກໃນການແຂ່ງຂັນ ເພື່ອຍາດຫຼຽນລາງວັນ ໃຫ້ໄດ້ຕາມຄາດໝາຍທີ່ວາງໄວ້. ພ້ອມນີ້ ຕ້ອງເອົາໃຈໃສ່ ປະສານສົມທົບກັບເຈົ້າພາບ ເພື່ອເຮັດໃຫ້ການເຄື່ອນໄຫວຂອງນັກກິລາແຂວງຫຼວງພະບາງ ມີຄວາມສະດວກ; ຕິດພັນກັບການໂຄສະນາເຜີຍແຜ່ຂ່າວສານ ໃຫ້ກວ້າງຂວາງ ແລະ ເຊີນຊວນຊາວຫລວງພະບາງ ທີ່ອາໄສຢູ່ນະຄອນຫຼວງວຽງຈັນ ໃຫ້ເຂົ້າຮ່ວມຊົມຮ່ວມເຊຍ ເປັນກໍາລັງໃຈໃຫ້ນັກກິລາ ເພື່ອຍາດໃຫ້ໄດ້ໄຊຊະນະ ມາໃຫ້ພີ່ນ້ອງຊາວແຂວງຫຼວງພະບາງ ຕາມຄວາມມຸ້ງມາດປາຖະໜາ.
(ພາບ+ຂ່າວ: ທະນູສິນ ອິດທິພົ)
ຄໍາເຫັນ