ຈັດສັນຄືນໃໝ່ຮ້ານຂາຍເຄື່ອງຕາມບ່າທາງຕະຫຼາດຫຼັກ 8 ເພື່ອຄວາມເປັນລະບຽບ

ພະແນກອຸດສາຫະກຳ-ການຄ້າແຂວງຮ່ວມກັບນະຄອນໄກສອນພົມວິຫານແຂວງສະຫວັນນະເຂດໄດ້ຈັດກອງປະຊຸມປຶກສາຫາລືກ່ຽວກັບການຫ້າມຂາຍເຄື່ອງຕາມບ່າທາງກໍຄືແຄມທາງຫຼວງ-ທາງຮ່ອມຢູ່ເຂດຕະຫຼາດຫຼັກ 8 ບ້ານອຸດົມວິໄລນະຄອນໄກສອນພົມວິຫານ.
ການປຶກສາຫາລືດັ່ງກ່າວໄດ້ຈັດຂຶ້ນໃນວັນທີ 16 ມັງກອນ ຜ່ານມາ ທີ່ຫ້ອງການບ້ານອຸດົມວິໄລ, ໂດຍການເປັນປະທານຂອງທ່ານໄຊຍະເດດຜຸຍຍະວົງຮອງຫົວໜ້າພະແນກອຸດສາຫະກຳ-ການຄ້າແຂວງ, ບັນດາຫ້ອງການທີ່ກ່ຽວຂ້ອງຂອງນະຄອນໄກສອນພົມວິຫານເຂົ້າຮ່ວມ.
    ທ່ານໄຊຍະເດດຜຸຍຍະວົງໄດ້ກ່າວວ່າ: ໂດຍປະຕິບັດຕາມທິດຊີ້ນຳຂອງຄະນະປະຈຳພັກແຂວງກໍຄືທ່ານເຈົ້າແຂວງສະຫວັນນະເຂດເຫັນວ່າຢູ່ຕະຫຼາດແຫ່ງນີ້ ໄດ້ມີການຂາຍເຄື່ອງຢູ່ບໍລິເວນບ່າທາງລາມອອກມາຮອດແຄມທາງເລກ 9  ເຮັດໃຫ້ມີຄວາມສັບສົນ, ແອອັດໃນການສັນຈອນເພາະວ່າຢູ່ບໍລິເວນດັ່ງກ່າວ ມີທາງ 3 ແຍກຢູ່ຫຼາຍຈຸດທີ່ໃກ້ກັນ, ອາດຈະສ່ຽງຕໍ່ການເກີດອຸບັດເຫດຕາມທ້ອງຖະໜົນ, ດັ່ງນັ້ນເພື່ອຄວາມເປັນລະບຽບຮຽບຮ້ອຍແລະບໍ່ລະເມີດຕໍ່ກົດໝາຍທາງຫຼວງພ້ອມທັງຫຼີກລ່ຽງຕໍ່ການເກີດອຸບັດເຫດຜ່ານການປຶກສາຫາລືໃນທີ່ປະຊຸມໄດ້ຕົກລົງກັນດັ່ງນີ້: ມອບໃຫ້ຫ້ອງວ່າການນະຄອນໄກສອນພົມວິຫານອອກແຈ້ງການກ່ຽວກັບການຫ້າມຂາຍເຄື່ອງຢູ່ບໍລິເວນດັ່ງກ່າວນີ້ຢ່າງເດັດຂາດ, ຈາກນັ້ນມອບໃຫ້ຄະນະກຳມະການຈັດສັນຄວາມເປັນລະບຽບຮຽບຮ້ອຍຂັ້ນນະຄອນຈົ່ງເອົາໃຈໃສ່ຊຸກຍູ້ຢ່າງຈິງຈັງໃນການຂົນຂວາຍໃຫ້ຊາວຄ້າຂາຍຂາຍເຄື່ອງຢູ່ບໍລິເວນນັ້ນໄດ້ເຂົ້າໃຈ, ພ້ອມນັ້ນກໍຫ້າມທຸກພາກສ່ວນບໍ່ໃຫ້ເກັບຄ່າເຊົ່ານຳແມ່ຄ້າຢູ່ບໍລິເວນນັ້ນເດັດຂາດ, ສ່ວນເຈົ້າຂອງຕະຫຼາດຫຼັກ 8 ໃຫ້ຮີບຮ້ອນເລັ່ງໂຄງການກໍ່ສ້າງອາຄານຕະຫຼາດໃຫ້ສຳເລັດໃນເດືອນກຸມພາທີ່ຈະມາເຖິງນີ້ເພື່ອຮອງຮັບຮ້ານຂາຍເຄື່ອງທີ່ຈະຍົກຍ້າຍອອກແລະຕ້ອງຈັດສັນບ່ອນຂາຍເຄື່ອງຊົ່ວຄາວໃຫ້ເຂົາເຈົ້າໃໝ່ເພື່ອຈະມີບ່ອນທຳມາຫາກິນຕໍ່ໄປ ຊຶ່ງການຈັດສັນຄັ້ງນີ້ແມ່ນຈະໃຫ້ສຳເລັດໃນທ້າຍເດືອນມັງກອນນີ້.
    ທັງນີ້ກໍເພື່ອຄວາມສວຍງາມ, ຄວາມເປັນລະບຽບຮຽບຮ້ອຍໃນສັງຄົມແລະຄວາມສະອາດຈົບງາມຂອງບ້ານເມືອງ.
ຂ່າວ-ພາບ: ສະຫວັນນະເຂດ