ຈີນ ຍົກ​ສູງ​ການ​ສ້າງ​ປະ​ຊາ​ຄົມ​ຮ່ວມ​ຊາ​ຕາ​ກຳ ເພື່ອຄວາມ​ຈະ​ເລີນ​ຮຸ່ງ​ເຮືອງ​ຮ່ວມ​ກັນ

ຖາມ: ໄລຍະມໍ່ໆມານີ້ ສູນກາງພັກກອມມູນິດຈີນ ໄດ້ເປີດກອງປະຊຸມ

ວຽກງານປະເທດອ້ອມຂ້າງຂັ້ນສູນກາງຂຶ້ນ, ຂໍໃຫ້ທ່ານແນະນໍາກ່ຽວກັບ

ສະພາບເນື້ອໃນການຈັດກອງປະຊຸມວຽກງານປະເທດອ້ອມຂ້າງຂອງ

ຈີນ ແລະ ທ່ານຄິດວ່າ ການພົວພັນ ຈີນ-ລາວ ຈະມີທິດທາງການ

ພັດທະນາໃນຕໍ່ໜ້າຄືແນວໃດ?

ໃນໄລຍະມໍ່ໆມານີ້ ປະເທດຈີນຫາກໍສຳເລັດກອງປະຊຸມວຽກງານປະເທດອ້ອມຂ້າງຂັ້ນສູນກາງພັກຂອງພັກກອມມູນິດຈີນ, ສະຫາຍ ສີຈິ້ນຜິງ ເລຂາທິການໃຫຍ່ ໄດ້ມີຄໍາເຫັນສໍາຄັນ ແລະ ໄດ້ສັງລວມຢ່າງເປັນລະບົບ ກ່ຽວກັບຜົນສຳເລັດ ແລະ ບົດຮຽນການເຮັດວຽກງານກັບປະເທດອ້ອມຂ້າງຈີນ ໃນໄລຍະໃໝ່, ທັງໄດ້ວິເຄາະສະຖານະການ ແລະ ກໍານົດທິດທາງໜ້າທີ່ເປົ້າ ໝາຍ, ແນວຄິດມາດຕະການສຳລັບວຽກງານກັບປະເທດອ້ອມຂ້າງໃນໄລຍະຕໍ່ໜ້າ ເນັ້ນໜັກວ່າປະເທດຈີນ ຕ້ອງໄດ້ຍົກສູງຄັນທຸງຂອງປະຊາຄົມຮ່ວມຊາຕາກຳຂອງມວນມະນຸດ, ຖືເອົາການສ້າງສັນຕິພາບ, ຄວາມສະຫງົບສຸກ, ຄວາມຈະເລີນຮຸ່ງເຮືອງ, ຄວາມສວຍງາມ ແລະ ມິດຕະພາບ ເປັນເປົ້າໝາຍຍາວນານຮ່ວມກັນ, ຖືເອົາການເປັນບ້ານໃກ້ເຮືອນຄຽງທີ່ດີ, ບ້ານໃກ້ເຮືອນຄຽງທີ່ສະຫງົບ, ບ້ານໃກ້ເຮືອນຄຽງທີ່ຮັ່ງມີ, ສະໜິດສະໜົມ, ຈິງໃຈ, ເອື້ອອຳນວຍ, ໃຈກວ້າງ ແລະ ຮ່ວມຊາຕາກຳດຽວກັນເປັນແນວທາງດ້ານແນວຄິດ, ຖືເອົາສັນຕິພາບ, ການຮ່ວມມື, ເປີດກວ້າງ ແລະ ໃຈກວ້າງຮັບເອົາກັນ ເປັນຄ່ານິຍົມຂອງທະວີບອາຊີ ເປັນບ່ອນອີງ, ຖືເອົາການຮ່ວມກັນກໍ່ສ້າງ “ໜຶ່ງແລວ ໜຶ່ງເສັ້ນທາງ” ດ້ວຍຄຸນນະພາບສູງ ເປັນເວທີຫຼັກ, ຖືເອົາຮຸບແບບການຮັກສາຄວາມໝັ້ນຄົງຂອງທະວີບອາຊີ ທີ່ຖືການຢູ່ຮ່ວມກັນດ້ວຍຄວາມສະຫງົບສຸກ, ສະແຫວງຫາຄວາມຄ້າຍຄືກັນໃນຄວາມແຕກຕ່າງກັນ, ເຈລະຈາປຶກສາຫາລືເປັນສິ່ງຄໍ້າປະກັນດ້ານຍຸດທະສາດ, ຈັບມືກັນກັບປະເທດອ້ອມຂ້າງຮ່ວມກັນສ້າງອະນາຄົດທີ່ສວຍງາມ. ເວົ້າລວມແລ້ວ, ພວກເຮົາຈະຮ່ວມກັບປະເທດອ້ອມຂ້າງຈີນລົງເລິກຮັດແໜ້ນຄວາມເຊື່ອໝັ້ນເຊິ່ງກັນ ແລະ ກັນທາງດ້ານຍຸດທະສາດ, ສະໜັບສະໜູນໃຫ້ປະເທດໃນພາກພື້ນເດີນຕາມເສັ້ນທາງການພັດທະນາຂອງຕົນຢ່າງໝັ້ນທ່ຽງ, ລົງເລິກການເຊື່ອມໂຍງການພັດທະນາ, ສ້າງຕາໜ່າງເຊື່ອມໂຍງເຊື່ອມຈອດດ້ວຍລະດັບສູງ, ຮ່ວມກັນຮັບມືສິ່ງທ້າທາຍນາໆປະການ, ຂະຫຍາຍການພົວພັນແລກປ່ຽນກັນ, ສ້າງເປັນປະຊາຄົມຮ່ວມຊາຕາກຳ ລະຫວ່າງຈີນ ກັບປະເທດອ້ອມຂ້າງຂອງຕົນ.

ຝ່າຍຈີນກຳລັງຍູ້ແຮງຈັດຕັ້ງປະຕິບັດເນື້ອໃນຈິດໃຈຂອງກອງປະຊຸມ. ສະຫາຍ ປະທານປະເທດ ສີຈິ້ນຜິງ ກໍໄດ້ເປັນແບບຢ່າງໃນການນໍາໜ້າຈັດຕັ້ງປະຕິບັດ, ໄລຍະມໍ່ໆມານີ້ໄດ້ໄປຢ້ຽມຢາມຫວຽດນາມ, ມາເລເຊຍ ແລະ ກຳປູເຈຍ ຕາມລຳດັບ, ໄດ້ເຫັນດີເປັນເອກະພາບກັບ ຝ່າຍຫວຽດນາມໃນການເລັ່ງລັດກໍ່ສ້າງການເປັນຄູ່ຮ່ວມຊາຕາກຳ ຈີນ-ຫວຽດນາມ ທີ່ມີຄວາມໝາຍຍຸດທະສາດ, ໄດ້ຮ່ວມກັບຝ່າຍມາເລເຊຍ ປະກາດການສ້າງເປັນຄູ່່ຮ່ວມຊາຕາກຳ ຈີນ-ມາເລເຊຍ ທ່ີ່ມີລັກສະນະຍຸດທສາດລະດັບສູງ, ໄດ້ຮ່ວມກັບຝ່າຍກຳປູເຈຍປະກາດຍົກລະດັບການພົວພັນຈີນ-ກຳປູເຈຍ ຂຶ້ນເປັນຄູ່ຮ່ວມຊາຕາກໍາຮອບດ້ານຈີນ-ກຳປູເຈຍ ໃນຍຸກໃໝ່. ໃນສະພາບເບື້ອງຫຼັງທີ່ຖືກຜົນກະທົບຈາກລັດທິຝ່າຍດຽວ ແລະ ການເມືອງຂອງປະເທດມະຫາອຳນາດ, ການຢ້ຽມຢາມຄັ້ງນີ້ໄດ້ຂຽນປະຫວັດສາດໜ້າໃໝ່ຂອງການສ້າງປະຊາຄົມຮ່ວມຊາຕາກຳລະຫວ່າງຈີນກັບປະເທດອ້ອມຂ້າງ, ໄດ້ສະຫຼັກໃຫ້ເຫັນບັນຍາກາດໃໝ່ຂອງການຊຸກຍູ້ສະຖຽນລະພາບ ແລະ ຄວາມຈະເລີນຮຸ່ງເຮືອງລະຫວ່າງຈີນ ກັບປະເທດອ້ອມຂ້າງ, ໄດ້ເປັນການເພີ່ມເຕີມຄວາມແນ່ນອນຫຼາຍຂຶ້ນກວ່າເກົ່າ ແລະ ເພີ່ມກຳລັງຂັບເຄື່ອນທີ່ເຂັ້ມແຂງກວ່າເກົ່າໃຫ້ແກ່ການພັດທະນາຂອງພາກພື້ນ.

ປະເທດອ້ອມຂ້າງຈີນ ແມ່ນພື້ນຖານທີ່ສໍາຄັນຂອງປະເທດຈີນໃນການພັດທະນາໄປສູ່ຄວາມຈະເລີນຮຸ່ງເຮືອງ, ເປັນຈຸດສໍາຄັນຂອງການປົກປັກຮັກສາຄວາມໝັ້ນຄົງຂອງຊາດ, ເປັນວຽກງານບູລິມະສິດທຳອິດໃນການເຄື່ອນໄຫວວຽກງານຕ່າງປະເທດລວມ ແລະ ເປັນຂໍກະແຈສໍາຄັນໃນການຊຸກຍູ້ກໍ່ສ້າງເປັນປະຊາຄົມຮ່ວມຊາຕາກຳຂອງມວນມະນຸດ. ປະເທດລາວ ແລະ ປະເທດຈີນ ມີສາຍພູສາຍນໍ້າຕິດຈອດກັນ, ແມ່ນສະຫາຍອ້າຍນ້ອງທີ່ພິເສດນໍາກັນ. ຝ່າຍຈີນຍາມໃດກໍຈະສືບຕໍ່ຊຂຸກຍູ້ການພົວພັນ ຈີນ-ລາວ ຈາກທິດທາງບຸລິມະສິດຂອງວຽກການຕ່າງປະ ເທດກັບປະເທດອ້ອມຂ້າງ ແລະ ຈາກມູມມອງລະດັບສູງດ້ານຍຸດທະສາດຂອງການເປັນຄູ່ຮ່ວມຊາຕາກຳສັງຄົມນິຍົມ, ຍິນດີຮ່ວມກັບຝ່າຍລາວຢຶດໝັ້ນຖືເອົາຄວາມຮັບຮູ້ຮ່ວມກັນອັນສໍາຄັນຂອງການນໍາສູງສຸດສອງພັກ, ສອງລັດ ເປັນທິດນໍາ, ເພີ່ມທະວີີຄວາມໄວ້ເນື້ອເຊື່ອໃຈເຊິ່ງກັນແລະ ກັນດ້ານຍຸດທະສາດ, ບຸກເບີກການຮ່ວມມືຮູບປະທຳ, ສືບທອດເສີມຂະຫຍາຍມູນເຊື້ອມິດຕະພາບ, ອອກແຮງປາບປາມການຕົວະຕົ້ມທາງອິນເຕີເນັດ, ການພະນັນ ແລະ ການກະທຳຜິດກົດໝາຍຂ້າມແດນອື່ນໆ, ຮ່ວມກັນແບກຫາບຄັນທຸງຂອງສັງຄົມນິຍົມໃຫ້ດີ ແລະ ສ້າງຄວາມຜາສຸກໃຫ້ແກ່ປະຊາຊົນສອງຊາດ.

ຖາມ: ພວກຂ້າພະເຈົ້າໄດ້ສັງເກດເຫັນວ່າກອງປະຊຸມວຽກງານປະເທດອ້ອມຂ້າງ ຂັ້ນສູນກາງຂອງພັກກອມມູນິດຈີນໄດ້ເນັ້ນໜັກວ່າ ປັດຈຸບັນພວມຢູ່ໃນໄລຍະສໍາຄັນຂອງການປ່ຽນ ແປງ ອັນເລິກເຊິ່ງທີ່ເຊື່ອມໂຍງກັນລະຫວ່າງສະພາບການຂອງປະເທດອ້ອມຂ້າງ ແລະ ຂອງໂລກ. ໄລຍະມໍ່ໆມານີ້ ອາເມຣິກາໄດ້ດຳເນີນສົງຄາມພາສີຕໍ່ປະເທດລາວ, ປະເທດຈີນ ແລະ ບັນດາປະເທດໃນພາກພື້ນ, ໃນນັ້ນ “ການກໍານົດພາສີເທົ່າທຽມກັນ” ຕໍ່ປະເທດລາວ ມີອັດຕາສູງເຖິງ 48%. ຕໍ່ບັນຫານີ້ ຝ່າຍຈີນມີຄໍາຄິດເຫັນແນວໃດ?

ອາເມຣິກາ ໄດ້ປະກາດການເພີ່ມພາສີຕໍ່ຄູ່ຮ່ວມມືການຄ້າທັງໝົດຂອງຕົນ ດ້ວຍຄໍາຂວັນ “ຄວາມເທົ່າທຽມກັນ”, ພ້ອມນັ້ນຍັງໄດ້ບັງຄັບໃຫ້ແຕ່ລະຝ່າຍເຈລະຈາ “ກ່ຽວກັບພາສີເທົ່າທຽມກັນ” ກັບອາເມຣິກາ. ນີ້ເປັນການໃຊ້ “ຄວາມເທົ່າທຽມກັນ” ເປັນຂໍ້ອ້າງ, ນີ້ເປັນການສົ່ງເສີມການເມືອງປະເທດມະຫາອຳນາດ ແລະ ການກົດຂີ່ ໃຊ້ອຳນາດໃນຂົງເຂດເສດຖະກິດ-ການຄ້າ. ຂ້າພະເຈົ້າຂໍເນັ້ນໜັກ 4 ຈຸດ ຄື:

ໜຶ່ງ: ໃນເວລາປະເຊີນໜ້າກັບການສະແດງ “ການກົດໜີບແບບສຸດຂີດ” ແບບນີ້, ປະເທດຂະຫຍາຍຕົວຂຶ້ນມາບໍ່ແມ່ນຍ້ອນການຖືກນາບຂູ່, ໃນປະຫວັດສາດຫ້າພັນປີຜ່ານມາຂອງເຊື້ອຊາດຈີນ ບໍ່ມີຄື້ນພາຍຸລົມແດງໃດທີ່ບໍ່ເຄີຍຜ່ານຜ່າ. ພວກເຮົາບໍ່ຍິນດີຈະເຮັດສົງຄາມການຄ້າ, ແຕ່ເດັດຂາດບໍ່ໄດ້ຢ້ານການເຮັດສົງຄາມການຄ້າ, ພວກເຮົາຈະຕອບໂຕ້ຄືນຢ່າງເດັດດ່ຽວ ແລະ ຈະສູ້ຈົນເຖິງທີ່ສຸດ. ການອ່ອນຂໍ້ບໍ່ໄດ້ໝາຍວ່າຈະສາມາດເຮັດໃຫ້ອີກຝ່າຍໜຶ່ງຍອມຖອຍໄດ້, ແຕ່ຍິ່ງຈະເປັນການປະປ່ອຍໃຫ້ອີກຝ່າຍໜຶ່ງນັບມື້ນັບພາໂລຫຼາຍຂຶ້ນ. ມີພຽງແຕ່ການຕອບໂຕ້ຢ່າງເດັດດ່ຽວຈິ່ງຈະສາມາດຕ້ານທານຕໍ່ການກະທົບໄດ້, ເປັນການບັງຄັບໃຫ້ອີກຝ່າຍໜຶ່ງຕ້ອງໄດ້ສະແດງທ່າທີຂອງຄວາມສະເໝີພາບ, ຄວາມເຄົາລົບ ແລະ ເອື້ອອຳນວຍເຊິ່ງກັນ ແລະ ກັນ. ອັນນີ້ກໍເພື່ອປົກປ້ອງອະທິປະໄຕ, ຄວາມໝັ້ນຄົງ ແລະ ຜົນປະໂຫຍດການພັດທະນາຂອງປະເທດຈີນເອງ, ທັງເປັນການປົກປັກຮັກສາຄວາມຍຸຕິທຳ ແລະ ທ່ຽງທຳຂອງສາກົນ, ເປັນການປົກປ້ອງລະບອບການຄ້າຫຼາຍຝ່າຍ, ປົກປ້ອງຜົນປະໂຫຍດຮ່ວມກັນຂອງປະຊາຄົມສາກົນ.

ສອງ, ປະເທດຈີນມີີຄວາມໝັ້ນໃຈຢ່າງເຕັມສ່ວນໃນການຮັກສາການພັດທະນາດ້ານເສດຖະກິດຂອງຕົນໃຫ້ເຂັ້ມແຂງໝັ້ນທ່ຽງ. ພວກເຮົາມີການນໍາພາອັນໜັກແໜ້ນຂອງສູນກາງພັກ ທີ່ມີ ສະຫາຍ ສີຈິ້ນຜິງ ເປັນແກນກາງ, ມີລະບົບການຜະລິດອຸດສາຫະກໍາທີ່ເຂັ້ມແຂງທີ່ສຸດໃນທົ່ວໂລກ ແລະ ມີຄວາມສາມາດໃນການປະດິດສ້າງໃໝ່ດ້ານເຕັກໂນໂລຊີທີ່ນໍາໜ້າໃນທົົ່ວໂລກ, ໃນໄຕມາດທຳອິດຂອງປີນີ້ ລວມຍອດມູນຄ່າການຜະລິດພາຍໃນຂອງຈີນ ທຽບກັບໄລຍະດຽວກັນຂອງປີຜ່ານມາ ເພີ່ມຂຶ້ນ 5.4% ເປັນການເລີ່ມຕົ້ນທີ່ດີ. ພວກເຮົາຍັງມີຕະຫຼາດຂະໜາດໃຫຍ່ຫຼາຍ ແລະ ມີການຂະຫຍາຍຂະໜາດແບບບໍ່ຢຸດຢັ້ງ, ອັດຕາການບໍລິໂພກຂອງປະຊາຊົນຈີນ ມີພຽງແຕ່ 40%, ການເພີ່ມຂຶ້ນແຕ່ລະໜຶ່ງສ່ວນຮ້ອຍ ກໍຈະກາຍເປັນຕະຫຼາດທີ່ຂະຫຍາຍຕົວຈຳນວນ 1,000 ກວ່າຕື້ຢວນຈີນ, ທຽບເທົ່າປະມານ 3-4 ສ່ວນ (60-70%) ຂອງມູນຄ່າການສົ່ງອອກຈາກຈີນໄປອາເມຣິກາ ໃນປີ 2024. ນັ້ນກໍໝາຍຄວາມວ່າ, ຂໍພຽງແຕ່ອັດຕາການບໍລິໂພກຂອງປະຊາຊົນເພີ່ມຂຶ້ນທຸກ 3-4 ສ່ວນຮ້ອຍ, ພວກເຮົາກໍຈະສາມາດອາໄສການບໍລິໂພກພາຍໃນມາຖົມພາກສ່ວນການສົ່ງອອກທີ່ຖືກກົດໜ່ວງຈາກອາມຣິກາ, ປະເທດຈີນພວມປະຕິບັດຍຸດທະສາດການຂະຫຍາຍຄວາມຕ້ອງການພາຍໃນປະເທດ ແລະ ວຽກງານສະເພາະກິດໃນການກະຕຸ້ນການບໍລິໂພກພາຍໃນ, ເຫັນວ່າໄດ້ຮັບຜົນສຳເລັດທີ່ຕັ້ງໜ້າ. ປະເທດຈີນຍັງຈະສືບຕໍ່ ເດັດດ່ຽວດຳເນີນການເປີດກວ້າງຢ່າງບໍ່ຄອນແຄນ, ຮ່ວມ ກັບຝ່າຍລາວ ແລະ ປະເທດຕ່າງໆເພີ່ມທະວີການຮ່ວມມືທີ່ສ້າງຜົນປະໂຫຍດຮ່ວມກັນ ແລະ ແບ່ງປັນກາລະໂອກາດການພັດທະນາ.

ສາມ, ອາເມຣິກາສູນເສຍຄຸນນະທຳ ແລະ ຂາດການຊ່ວຍເຫຼືອຈາກຜູ້ອື່ນ. “ພາສີທີ່ເທົ່າທຽມກັນ” ສຸດທ້າຍກໍຈະສິ້ນສຸດລົງດ້ວຍຄວາມປະລາໄຊ. ອາເມຣິກາໄດ້ເກັບເພີ້ມພາສີພຽງຝ່າຍດຽວ ເຊິ່ງເປັນການຂັດກັບລະບຽບຫຼັກການຂອງອົງການການຄ້າໂລກ, ເປັນການທຳລາຍຜົນປະໂຫຍດຮ່ວມກັນຂອງປະຊາຊົນບັນດາປະເທດ, ນັບມື້ນັບມີຫຼາຍປະເທດຄັດຄ້ານຕໍ່ການເພີ້ມພາສີ ແລະ ການປະຕິບັດແບບມະຫາອຳນາດຝ່າຍດຽວຂອງອາເມຣິກາ.

ສີ່, ບັນດາປະເທດຕ້ອງໄດ້ສາມັກຄີຈັບມືກັນ ແລະ ຮັບມືຮ່ວມກັນ. ມະນຸດດຳລົງຊີວິດຢູ່ຮ່ວມໂລກດຽວກັນ, ບໍ່ມີປະເທດໃດຈະສາມາດຢູ່ພຽງລຳພັງໄດ້. ບໍ່ວ່າຈະເປັນປະເທດນ້ອຍຫຼືໃຫຍ່ ລ້ວນແຕ່ຕ້ອງໄດ້ເຄົາລົບ ແລະ ປະຕິບັດຕາມລະບຽບຫຼັກການພື້ນຖານຂອງການພົວພັນສາກົນ, ປົກປ້ອງກົດໝາຍສາກົນ ແລະ ຮັກສາຄວາມເປັນລະບຽບຂອງການຄ້າເສລີ, ຖ້າຫາກອາເມຣິກາປະຕິບັດນະໂຍບາຍພາສີແບບຊະຊາຍຕາມໃຈຕົນເອງ, ໃນອະນາຄົດແນ່ນອນວ່າຈະມີການເຄື່ອນໄຫວທີ່ຖືເບົາຕໍ່ກົດໝາຍສາກົນ ແລະ ຮຸກຮານກືນກິນຜົນປະໂຫຍດຂອງປະເທດອື່ນຫຼາຍຂຶ້ນ. ໂລກກໍຈະກັບຄືນໄປສູ່ “ຫຼັກການເຖື່ອນ”, ເມື່ອຮອດເວລານັ້ນຜູ້ທີ່ຈະຖືກກະທົບຫຼາຍກວ່າໝູ່ກໍແມ່ນປະເທດກຳລັງພັດທະນາ, ຂໍພຽງແຕ່ເພີ່ມທະວີຄວາມສາມັກຄີປະສານງານກັນ ຈິ່ງຈະສາມາດປົກປ້ອງຜົນປະໂຫຍດຂອງການພັດທະນາຂອງຕົນໄດ້.

ປັດຈຸບັນ, ການຮ່ວມມືລະຫວ່າງ ຈີນ-ອາຊຽນ ມີທ່າແຮງທີ່ເຂັ້ມແຂງ, ປີຜ່ານມາມູນຄ່າການຄ້າສອງຝ່າຍ ບັນລຸໄດ້ 982,3 ຕື້ໂດລາ, ທຽບກັບໄລຍະດຽວກັນຂອງປີ 2023 ເພີ່ມຂຶ້ນ 7.7%, ສອງຝ່າຍໄດ້ສືບຕໍ່ເປັນຄູ່ຮ່ວມການຄ້າໃຫຍ່ທີ່ສຸດເຊິ່ງກັນ ແລະ ກັນ ເປັນເວລາ 5 ປີ ຕິດຕໍ່ກັນ, ມູນຄ່າການຄ້າ ຈີນ-ລາວ ກໍໄດ້ສ້າງສະຖິຕິສູງອັນໃໝ່, ໃນນັ້ນ ມູນຄ່າການສົ່ງອອກສິນຄ້າຂອງລາວ ໄປຈີນ ບັນລຸໄດ້ 880 ລ້ານໂດລາ, ຫຼາຍກວ່າຍອດລວມມູນຄ່າການຄ້າ ລະຫວ່າງ ລາວ ກັບ ອາເມຣິກາ, ທຽບກັບໄລຍະຜ່ານມາເພີ່ມຂຶ້ນ 121%. ເມື່ອ RCEP ໄດ້ມີຜົນສັກສິດແລ້ວ ກໍຄື ການເຈລະຈາເຂດການຄ້າເສລີ ຈີນ-ອາເມຣິກາ ສະບັບ 3.0 （ACFTA）3.0 ໄດ້ສຳເລັດລົງດ້ວຍໝາກຜົນຕົວຈິງແລ້ວ, ການຄ້າ ແລະ ການລົງທຶນໃນພາກພື້ນກໍຈະຍິ່ງມີຄວາມເສລີ ແລະ ສະດວກສະບາຍຍິ່ງຂຶ້ນ, ຈະເປັນການປະກອບສ່ວນຕົວຈິງໃຫ້ຊີວິດການເປັນຢູ່ຂອງປະຊາຊົນໃນພາກພື້ນມີຄວາມຮັ່ງມີຂຶ້ນ. ພວກເຮົາຄວນຈັບມືກັນ ປະກອບສ່ວນໃຫ້່ລັດທິຫຼາຍຝ່າຍທີ່ແທ້ຈິງໄດ້ຮັບມືກັບລັດທິຝ່າຍດຽວ, ໃຫ້ການຄ້າທີ່ມີຄວາມຍຸຕິທຳເອົາຊະນະລັດທິປົກປ້ອງການຄ້າ, ຮ່ວມກັນປົກປັກຮັກສາສັນຕິພາບ ແລະ ການພັດທະນາທີ່ໄດ້ມາຍາກນີ້ຂອງບັນດາປະເທດໃນພາກພື້ນ.