ຮອງລັດຖະມົນຕີກະຊວງ ສທຂ ເຄື່ອນໄຫວຊຸກຍູ້ໂຄງການກໍ່ສ້າງນໍ້າປະປາ ຢູ່ແຂວງອັດຕະປື.

ການລົງເຄື່ອນໄຫວຄັ້ງນີ້, ທ່ານໄດ້ຮັບຟັງການລາຍງານກ່ຽວກັບໂຄງການກໍ່ສ້າງຢູ່ເມືອງສະໜາມໄຊ ໄລຍະເວລາການກໍ່ສ້າງ ເລີ່ມແຕ່ວັນທີ 25 ພະຈິກ 2020 ເຖິງ 25 ພະຈິກ 2022, ມີກຳລັງການຜະລິດຂອງໂຮງງານ 3,400 ແມັດກ້ອນຕໍ່ມື້, ລະບົບສາຍທໍ່ແມ່ ແລະ ທໍ່ແຈກ ຍາວ 43,260 ແມັດ, ລະບົບສາຍທໍ່ບໍລິການ ຍາວ 120,711 ແມັດ, ຕິດຕັ້ງກົງເຕີນໍ້າເຂົ້າເຮືອນ 2,230 ກົງເຕີ, ມູນຄ່າຕາມສັນຍາ 2 ລ້ານ 5 ແສນກວ່າໂດລາ, ສະໜອງນໍ້າໃຊ້ໃຫ້ 10 ບ້ານ, ລວມທັງບ້ານຈັດສັນໃໝ່ 3 ບ້ານ, ໂຄງການໄດ້ຕໍ່ເວລາໃຫ້ບໍລິສັດ ຄັ້ງທີ 5, ຮອດວັນທີ 30 ມິຖຸນາ 2025 ມາຮອດປັດຈຸບັນວຽກທີ່ສໍາເລັດໂດຍລວມ 95 ກວ່າ% ຖ້າທຽບໃສ່ແຜນດັດແກ້ຕໍ່ເວລາແມ່ນຊັກຊ້າກວ່າແຜນ 4%. ສ່ວນໂຄງການກໍ່ສ້າງ ລະບົບນໍ້າປະປາ ແລະ ສຸຂາພິບານ ຢູ່ເມືອງສາມັກຄີໄຊ, ໄລຍະເວລາການກໍ່ສ້າງຕາມສັນຍາ ວັນທີ 23 ທັນວາ 2019 ເຖິງ 23 ທັນວາ 2022 ລວມ 36 ເດືອນ, ມູນຄ່າຕາມສັນຍາ 5 ລ້ານກວ່າໂດລາ, ມີກໍາລັງການຜະລິດ 10,000 ແມັດກ້ອນຕໍ່ມື້, ສາມາດສະໜອງນໍ້າໃຊ້ໄດ້ 16 ບ້ານ ແລະ ຂະຫຍາຍໄດ້ຕື່ມ 4 ບ້ານ, ບັນດາໜ້າວຽກປັບປຸງ ແລະ ຂະຫຍາຍລະບົບທໍ່ແມ່ ແລະ ທໍ່ແຈກ ຍາວ 113,000 ພັນກວ່າແມັດ, ປັບປຸງ ແລະ ຂະຫຍາຍລະບົບທໍ່ບໍລິການ ຍາວ 123,000 ກວ່າແມັດ, ຕິດຕັ້ງກົງເຕີນໍ້າເຂົ້າເຮືອນ 3 ພັນກົງເຕີ ແລະ ວຽກທີ່ເຮັດສໍາເລັດໂດຍລວມ 99% ທຽບໃສ່ແຜນດັດແກ້ຫຼ້າສຸດ ແມ່ນຊັກຊ້າກວ່າເລັກໜ້ອຍ.

ໃນໂອກາດນີ້, ທ່ານ ງາມປະສົງ ເມືອງມະນີ ໄດ້ໃຫ້ທິດຊີ້ນໍາ ໂດຍໄດ້ເນັ້ນໃຫ້ຄະນະຮັບຜິດຊອບໂຄງການ ລວມທັງບັນດາບໍລິສັດຜູ້ຮັບເໝົາກໍ່ສ້າງ ລະບົບນໍ້າປະປາ ແລະ ສຸຂະພິບານ ຢູ່ທັງສອງເມືອງ ເປັນເຈົ້າການໃນການປະສານສົມທົບລະຫວ່າງເຈົ້າຂອງໂຄງການ ແລະ ບໍລິສັດຜູ້ຮັບເໝົາການກໍ່ສ້າງ ເພື່ອໃຫ້ໂຄງການໄດ້ຮັບການຈັດຕັ້ງປະຕິບັດມີຄຸນນະພາບ ແລະ ມີປະສິດທິຜົນສູງ, ໃຫ້ຮີບຮ້ອນເລັ່ງມືໃນການກໍ່ສ້າງແຕ່ລະໜ້າວຽກໃຫ້ສໍາເລັດທັນຕາມສັນຍາ, ເພື່ອຕິດຕັ້ງ ແລະ ສະໜອງນໍ້າໃຫ້ປະຊາຊົນ ໄດ້ນໍາໃຊ້ນໍ້າທີ່ສະອາດປອດໄພໂດຍໄວ. ພ້ອມນີ້ ຍັງເນັ້ນໃນການແກ້ໄຂບັນຫາກໍລະນີດິນຍຸບຂອງໂຄງການກໍ່ສ້າງກັນເຈື່ອນບ້ານເຊກະໝານ ໃຫ້ໄດ້ຮັບການແກ້ໄຂໂດຍດ່ວນ.

(ພາບ-ຂ່າວ: ມະນີວອນ ວຽງໄຊ)