 |
ໃນພິທີ, ທ່ານ ສິລິລາດທົງສິນ ທອງເພັງ ໄດ້ກ່າວວ່າ: ຂະບວນແຫ່-ແລ່ນທວນໄຟ ຄັ້ງນີ້, ຄະນະຮັບຜິດຊອບລະດັບຊາດ ພ້ອມດ້ວຍການນໍາຂອງແຂວງຄໍາມ່ວນ ແລະ ແຂວງຫຼວງພະບາງ, ຄະນະອົງການປົກຄອງ ນວ ແລະ 9 ເມືອງ ຕະຫຼອດຮອດປະຊາຊົນທຸກຊັ້ນຄົນ, ນັກຮຽນທົ່ວເມືອງສີໂຄດຕະບອງ ໄດ້ມາເຕົ້າໂຮມກັນຮ່ວມພິທີແຫ່-ແລ່ນທວນໄຟ, ເພື່ອເປັນການສະໜັບສະໜູນ ແລະ ເປັນເຈົ້າພາບທີ່ດີຮ່ວມກັນ ໃຫ້ແກ່ງານມະຫະກໍາກິລາແຫ່ງຊາດ ຄັ້ງທີ XII ທີ່ ນວ ຊຶ່ງຈະຈັດຂຶ້ນລະຫວ່າງວັນທີ 15-25 ພະຈິກ 2025, ຊຶ່ງຂະບວນແຫ່-ແລ່ນທວນໄຟໃນຄັ້ງນີ້ ເປັນຄັ້ງທີ 3 ທີ່ສືບຕໍ່ຈາກເມືອງສັງທອງ ແລະ ເມືອງນາຊາຍທອງ. ຈຸດປະສົງເພື່ອເປັນການແຈ້ງຂ່າວ ແລະ ປຸກລະດົມ ໃຫ້ທົ່ວສັງຄົມ ຊາວນະຄອນຫຼວງວຽງຈັນ ກໍຄື ບັນດາແຂວງໄດ້ຮັບຊາບ ແລະ ເປັນເຈົ້າການຮ່ວມກັນ ເປັນເຈົ້າພາບທີ່ດີ ໃນການຈັດງານແຂ່ງຂັນກີລາ ຄັ້ງນີ້ ໃຫ້ມີຜົນສໍາເລັດ ຕາມລະດັບຄາດໝາຍ.
 |
ໂອກາດດັ່ງກ່າວ, ທ່ານ ສິລິລາດທົງສິນ ທອງເພັງ ກໍຫວັງຢ່າງຍິ່ງວ່າ ການແຫ່-ແລ່ນທວນໄຟ ຈະກາຍເປັນສັນຍາລັກແຫ່ງຄວາມສາມັກຄີ, ມິດຕະພາບ ອັນເປັນປຶກແຜ່ນ ແລະ ຄວາມເປັນຈິດໜຶ່ງໃຈດຽວ ຂອງຄະນະນໍານັກກິລາ ແລະ ນັກກິລາຈາກບັນດາແຂວງ ໃນທົ່ວປະເທດ; ພ້ອມກັນພັດທະນາວຽກງານກິລາ-ກາຍຍະກໍາ ຊຶ່ງເປັນໜຶ່ງໃນ 5 ຫຼັກມູນຂອງການສຶກສາແຫ່ງຊາດ ແລະ ສ້າງໃຫ້ໄດ້ນັກກິລາທີ່ດີເດັ່ນ ໃນວົງການກິລາລາວ ກໍຄືການສ້າງປະສົບການ ແລະ ຄວາມເຂັ້ມແຂງໃຫ້ນັກກິລາດ້ວຍຫຼາຍຮູບແບບ ຫຼາຍສີສັນ, ສ້າງເງື່ອນໄຂຍົກລະດັບຄວາມສາມາດ ຂອງນັກກີລາໃຫ້ທຽບທັນກັບລະດັບພາກພື້ນ ແລະ ສາກົນ. ດັ່ງຄໍາຂວັນຂອງງາານມະຫະກໍາກີລາແຫ່ງຊາດ ຄັ້ງທີ XII ທີ່ວ່າ: ສາມັກຄີ ມີວິໄນ ໂປ່ງໃສ ໄດ້ການພັດທະນາ. ພ້ອມກັນນັ້ນ, ເພື່ອສືບຕໍ່ຊຸກຍູ້ການສ້າງຂະບວນການໃຫ້ມີລັກສະນະຕໍ່ເນື່ອງ ແລະ ຟົດຟື້ນ ທັງເປັນການຈັດງານມະຫະກໍາກີລາ-ກາຍຍະກໍາ ໃນທົ່ວປະເທດ ໃຫ້ປະສົບຜົນສໍາເລັດຢ່າງມີ ໝາກຜົນ ແລະ ຈົບງາມ.
 |
ຂະບວນແຫ່ ແລະ ແລ່ນທວນໄຟ ໄດ້ເລີ່ມຈາກໜ້າອະນຸສອນປາກປ່າສັກ ມຸ່ງໜ້າສູ່ຮູບປັ້ນເຈົ້າຟ້າງຸ່ມ (ສວນເຈົ້າຟ້າງຸ່ມ) ນໍາພາຂະບວນແຫ່-ແລ່ນທວນໄຟ ເລີ່ມຈາກຈຸດທີ 1 ໄລຍະ 200 ແມັດ ໂດຍທ່ານ ສິລິລາດທົງສິນ ທອງເພັງ ແລ້ວມອບທວນໄຟສົ່ງຕໍ່ໃຫ້ທ່ານ ວັນໄຊ ພອງສະຫວັນ ເພື່ອນໍາຂະບວນສືບຕໍ່ແຫ່-ແລ່ນທວນໄຟ ຈາກຈຸດທີ 2 ໄລຍະ 200 ແມັດ ແລະ ສົ່ງຕໍ່ໃຫ້ທ່ານ ນາງ ສິລິພອນ ສຸພັນທອງ ສະຫວັນ ເພື່ອນໍາຂະບວນສືບຕໍ່ແຫ່-ແລ່ນທວນໄຟ ຈາກຈຸດທີ 3 ໄລຍະ 200 ແມັດ ແລະ ສົ່ງຕໍ່ໃຫ້ ທ່ານ ທະວີໄຊ ເໝົາຊົມພູ ເລຂາພັກເມືອງສີໂຄດຕະບອງ ຮັບ ແລະ ສົ່ງມອບໃຫ້ຄະນະຮັບຜິດຊອບ ຈັດງານມະຫະກໍາກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ເກມ 2025.
 |
ຂ່າວ: ບຸນອູ້ມ
ຄໍາເຫັນ