 |
ການຊ່ວຍເຫຼືອໃນຄັ້ງນີ້ເປັນການຊ່ວຍເຫຼືອຂອງໄລຍະທີສາມວຽກງານເກັບກູ້ລະເບີດບໍ່ທັນແຕກ (ລບຕ) ໃນ 3 ແຂວງພາກໃຕ້ ທີ່ປັດຈຸບັນຍັງມີລະເບີດບໍ່ທັນແຕກເປັນຈໍານວນຫຼວງຫຼາຍທີ່ຍັງຕົກຄ້າງຢູ່ ຄື: ແຂວງຈຳປາສັກ, ສາລະວັນ ແລະ ແຂວງເຊກອງ. ເປົ້າໝາຍຕົ້ນຕໍຂອງໂຄງການແມ່ນເພື່ອການສະໜອງການສະໜັບສະໜູນໂດຍກົງໃຫ້ແກ່ໂຄງການເກັບກູ້ລະເບີດແຫ່ງຊາດ (ຄກລ) ເພື່ອຮັບປະກັນວ່າການສ້າງຂີດຄວາມສາມາດ ແລະ ການສະ ໜອງອຸປະກອນທີ່ຈໍາເປັນສໍາລັບການດໍາເນີນງານສໍາຫຼວດກວດກູ້ລະເບີດທີ່ຍັງຕົກຄ້າງໄດ້ໃນໄລຍະຍາວ ແລະ ມີຄວາມຍືນຍົງ ແລະ ມີປະສິດທິພາບ. ທຶນດັ່ງກ່າວຈະຖືກຈັດສັນໃຫ້ແກ່ຂົງເຂດທີ່ສໍາຄັນຄື: ສະໜອງທຶນໃຫ້ແກ່ການປະຕິບັດງານພາກສະໜາມໃນ 3 ແຂວງພາກໃຕ້ ເພື່ອສໍາຫຼວດກວດກູ້ພື້ນທີ່ອັນຕະລາຍທີ່ໄດ້ຮັບການຢັ້ງຢືນ(CHAs), ສະໜອງອຸປະກອນທີ່ສໍາຄັນໃນວຽກງານສໍາຫຼວດກວດກູ້, ລວມທັງພາຫະນະຂົນສົ່ງໜັກ ແລະ ເບົາ (ລົດບັນທຸກຕິດລໍ້ພ່ວງ ແລະ ລົດບັນທຸກ), ເຄື່ອງກວດຈັບລະເບີດທີ່ທັນສະໄໝ (ເຊັ່ນ: ຮຸ່ນ Vallon ແລະ Ebinger), ແລະ ອຸປະກອນ ໄອທີແທັບເລັດດີຈີຕອນ ເພື່ອປັບປຸງການຄຸ້ມຄອງຂໍ້ມູນ ແລະ ການລາຍງານໃນພາກສະໜາມແລະ ການເສີມສ້າງການຕິດຕາມກວດກາລວມທັງຄ່າໃຊ້ຈ່າຍສໍາລັບກິດຈະກໍາ ແລະ ວຽກງານການຄຸ້ມຄອງ ແລະ ຈັດການທີ່ສໍາຄັນ, ເຊັ່ນການສໍາຫຼວດຜົນກະທົບທາງດ້ານສັງຄົມ-ເສດຖະກິດ ແລະ ການກວດສອບບັນຊີເປັນຕົ້ນເພື່ອຮັບປະກັນການນໍາໃຊ້ທຶນທີ່ມີຄວາມຈະແຈ້ງ ແລະ ຄວາມໂປ່ງໃສໃນລະດັບສູງສຸດ.
ໂຄງການໄລຍະ 3 ດັ່ງກ່າວນີ້ແມ່ນມີຄວາມໝາຍຄວາມສໍາຄັນຕໍ່ກັບ ສປປ ລາວ, ໂດຍສະເພາະແມ່ນການບັນລຸຄວາມໝາຍໝັ້ນໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ຫຼື SDG 18: ຊີວິດປອດໄພຈາກ ລບຕ. ປັດຈຸບັນ, ບັນຫາຂອງ ລບຕ ຍັງຄົງເປັນອຸປະສັກອັນຕົ້ນຕໍທີ່ສໍາຄັນຕໍ່ການພັດທະນາເສດຖະ ກິດ-ສັງຄົມ, ທັງເປັນການກີດຂວາງການຜະລິດກະສິກໍາ, ໂຄງການພັດທະນາພື້ນຖານໂຄງລ່າງ ແລະ ການດໍາລົງຊີວິດໂດຍລວມຂອງຊຸມຊົນໃນເຂດຊົນນະບົດ. ລັດຖະບານ ສປປ ລາວ ໄດ້ສືບຕໍ່ໃຫ້ບຸລິມະສິດແກ່ການກໍາຈັດອຸປະສັກນີ້ ພາຍໃຕ້ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 9 (2021-2025) ແລະ ເປົ້າໝາຍການພັດທະນາແບບຍືນຍົງ (SDG) ທີ 18 ຊຶ່ງເປັນເປົ້າໝາຍສະເພາະຂອງລາວ ຄື: “ຊີວິດປອດໄພຈາກ ລບຕ.”
 |
ໃນໂອກາດັ່ງກ່າວນີ້, ທ່ານ ອານຸພາບ ວົງໜໍ່ແກ້ວ ຮອງລັດຖະມົນຕີກະຊວງການຕ່າງປະເທດ, ໃນນາມຮອງປະທານຄະນະກຳມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັກແຕກທີ່ຕົກຄ້າງຢູ່ ສປປ ລາວ (ຄຊກລ) ໄດ້ກ່າວເນັ້ນວ່າ: “ໃນໂອກາດທີ່ມີຄວາມໝາຍນີ້, ຂ້າພະເຈົ້າຂໍສະແດງຄວາມຂອບໃຈຢ່າງສຸດຊຶ້ງຕໍ່ລັດຖະບານ ແລະ ປະຊາຊົນຍີ່ປຸ່ນສຳລັບການຊ່ວຍເຫຼືອຢ່າງຕໍ່ເນື່ອງໃນການແກ້ໄຂບັນຫາ ລບຕ ທີ່ເປັນສິ່ງເສດເຫຼືອແຕ່ປາງສົງຄາມ ແລະ ປັບປຸງຊີວິດການເປັນຢູ່ຂອງປະຊາຊົນລາວ. ການຮ່ວມມືນີ້ແມ່ນສອດຄ່ອງກັບການຍົກລະດັບສາຍພົວພັນສອງຝ່າຍຂອງພວກເຮົາໃຫ້ເປັນ ‘ຄູ່ຮ່ວມຍຸດທະສາດຮອບດ້ານ’, ເພື່ອສືບຕໍ່ກ້າວໄປສູ່ອະນາຄົດແຫ່ງສັນຕິພາບ, ຄວາມປອດໄພ ແລະ ວັດທະນາຖາວອນ.”
ໃນວາລະດຽວກັນ, ທ່ານ ໂຄອິຊຸມິ ຊຶໂຕະມຸ ເອກອັກຄະຣາຊະທູດວິສາມັນຜູ້ມີອໍານາດເຕັມແຫ່ງຍີ່ປຸ່ນປະຈຳ ສປປ ລາວ ກໍໄດ້ເນັ້ນໜັກວ່າ ຍີ່ປຸ່ນມີຄໍາໝັ້ນສັນຍາທີ່ຈະສະໜັບສະໜູນເປົ້າໝາຍແຫ່ງຊາດທີ່ສໍາຄັນນີ້. ທ່ານກ່າວວ່າ: "ວຽກງານເກັບກູ້ ລບຕ ແມ່ນມີຄວາມສໍາຄັນ ແລະ ຄວາມຈໍາເປັນໃນການຊ່ວຍເຫຼືອທາງດ້ານມະນຸດສະທໍາ; ມັນແມ່ນເງື່ອນໄຂພື້ນຖານສໍາລັບການພັດທະນາແບບຍືນຍົງ," ທ່ານໄດ້ກ່າວຕື່ມວ່າ: "ການຊ່ວຍເຫຼືອໃນໄລຍະ 3 ນີ້ແມ່ນສະແດງໃຫ້ເຫັນເຖິງຄໍາໝັ້ນສັນຍາທີ່ໜັກແໜ້ນຂອງລັດຖະບານຍີ່ປຸ່ນຕໍ່ການເປັນຄູ່ຮ່ວມຍຸດທະສາດກັບ ສປປ ລາວ ຊຶ່ງຈະຮັບປະກັນວ່າ ສປປ ລາວ ຈະມີຜືນແຜ່ນດິນທີ່ປອດໄພສາມາດຖືກສົ່ງຄືນໃຫ້ປະຊາຊົນ, ສາມາດປະກອບສ່ວນໃຫ້ມີການເຕີບໂຕທາງດ້ານເສດຖະກິດ-ສັງຄົມ ແລະ ສ້າງອະນາຄົດທີ່ປອດໄພກວ່າເກົ່າ."
ການສະໜັບສະໜູນໃໝ່ນີ້ສ້າງຂຶ້ນບົນພື້ນຖານການປະກອບສ່ວນອັນຍາວນານຂອງຍີ່ປຸ່ນໃຫ້ແກ່ຂະແໜງການ ລບຕໃນລາວ ຊຶ່ງເສີມສ້າງຄວາມສາມາດຂອງປະເທດຊາດໃນການຄຸ້ມຄອງ ແລະ ດໍາເນີນງານການສໍາຫຼວດກວດກູ້ຢ່າງມີປະສິດທິພາບເພື່ອບັນລຸເປົ້າໝາຍໃນການຊ່ວຍເຫຼືອ ສປປ ລາວ, ກໍຄືປະຊາຊົນລາວ ໃຫ້ສາມາດອອກຈາກໄພຂົ່ມຂູ່ຂອງລະເບີດທີ່ບໍ່ທັນແຕກນີ້ໄດ້ໃນອະນາຄົດ.
(ຂ່າວ: ກຕທ)
ຄໍາເຫັນ