 |
ໃນໂອກາດນີ້, ທ່ານ ປະທານສະມາຄົມ ສະຖາປະນິກ ແລະ ວິສະວະກອນໂຍທາລາວ ກໍໄດ້ລາຍງານໃຫ້ຊາບວ່າ: ງານວາງສະແດງສິນຄ້າ ALACE EXPO ເປັນໜຶ່ງໃນ 4 ກິດຈະກໍາປະຈໍາປີ ຂອງ ສສວ ຊຶ່ງປະກອບມີ: ກອງປະຊຸມໃຫຍ່ ຄັ້ງທີ 5 ຂອງ ສສວ ແລະ ກອງປະຊຸມທາງວິຊາການ (ALACE Forum), ALACE AWARD ແລະ ງານວາງສະແດງ (ALACE EXPO) ນີ້ ຊຶ່ງເປັນງານວາງສະແດງທາງດ້ານການອອກແບບ ແລະ ກໍ່ສ້າງ, ເປັນການວາງສະແດງຜົນສໍາເລັດການ ເຄື່ອນໄຫວປະຈໍາປີ ໃນຂົງເຂດສະຖາປັດຕະຍະກຳ ແລະ ວິສະວະກຳໂຍທາຂອງ ສປປ ລາວ. ພ້ອມນີ້ກໍຍັງເປັນເວທີ ແລະ ພື້ນທີ່ສຳລັບການນຳສະເໜີ ແລະ ແລກປ່ຽນຄວາມຮູ້, ການສ້າງຕາໜ່າງເຄືອຂ່າຍ, ການນໍາສະເໜີນະວັດຕະກໍາ ແລະ ການຂັບເຄື່ອນໂອກາດຂອງການພັດທະນາໃໝ່ ໃນມິຕິຂອງທຸລະກິດ, ນະວັດຕະກຳ, ການຮ່ວມມື ເພື່ອສົ່ງເສີມວິຊາຊີບ ຂອງຂະແໜງການດັ່ງກ່າວໃຫ້ຕໍ່ເນື່ອງ. ສຳລັບງານດັ່ງກ່າວ ດໍາເນີນເປັນເວລາ 7 ວັນ (20-26 ຕຸລາ 2025) ຊຶ່ງເປັນງານວາງສະແດງ ທີ່ຜູ້ຊົມຈະໄດ້ສຶກສາສໍາຫຼວດ ແລະ ຮຽນຮູ້ ວິວັດທະນາການຂອງສະຖາປັດຕະຍະກໍາ ແລະ ການກໍ່ສ້າງໃນ ສປປ ລາວ ເລີ່ມຕັ້ງແຕ່ພູມປັນຍາການອອກແບບກໍ່ສ້າງເຮືອນດັ້ງເດີມ ທີ່ມີຄຸນຄ່າທາງວັດທະນະ ທຳ ໄປຈົນເຖິງການພັດທະນາປັບປຸງອາຄານທີ່ຢູ່ອາໄສ ທີ່ມີຮູບຊົງ ແລະ ລັກສະນະຮ່ວມສະໄໝ ສາ ມາດຕອບສະໜອງຄວາມຕ້ອງການໃນການໃຊ້ຊີວິດທີ່ຫຼາກຫຼາຍຂອງສັງຄົມໄດ້ຢ່າງມີຄຸນນະພາບ.ພາຍໃນງານ ມີຈຳນວນ ຫ້າງຮ້ານວາງສະແດງສິນຄ້າ ລວມທັງໝົດ 130 ຫ້າງຮ້ານ, 80 ກວ່າ ບໍລິສັດ ແລະ 9 ຄູ່ຮ່ວມມື ຂອງ ສສວ ທີ່ນໍາເອົາຜະລິດຕະພັນ, ວັດສະດຸກໍ່ສ້າງທີ່ຫຼາກຫຼາຍ ມາຈາກທັງພາຍໃນ ແລະ ຕ່າງປະເທດ, ຫ້າງຮ້ານຂອງບັນດາບໍລິສັດອອກແບບທີ່ປຶກສາ ແລະ ກໍ່ສ້າງ ແລະ ຫ້າງຮ້ານຂອງສະມາຊິກ ສສວ, ຄຽງຄູ່ກັນ ຍັງມີຫ້າງຮ້ານ ຂອງ ສສວ, ຄູ່ຮ່ວມມື ຂອງ ສສວ ລວມຈຳນວນ 20 ຫ້າງຮ້ານ ຊຶ່ງປະກອບດ້ວຍ ຫ້າງຮ້ານຂອງອົງການຈັດຕັ້ງສາກົນ,ຫ້າງຮ້ານວາງສະແດງຜົນງານຂອງພາກລັດ ແລະ ຫ້າງຮ້ານວາງສະແດງຂອງພາກສ່ວນການສຶກສາຈໍານວນໜຶ່ງ,ມີກິດຈະກຳຫຼາກຫຼາຍທີ່ທາງ ສສວ ແລະ ຜູ້ປະກອບການຮ່ວມມືກັນຈັດຂຶ້ນ ເປັນຕົ້ນແມ່ນ: ການອອກຫ້າງຮ້ານວາງສະແດງສິນຄ້າ ແລະ ຜະລິດຕະພັນຂອງບັນດາບໍລິສັດທີ່ກ່ຽວຂ້ອງກັບຂະແໜງການ; ກິດຈະກໍາເສວະນາ ແລກປ່ຽນຄວາມຮູ້;ALACE AWARD-ກິດຈະກໍາການປະກວດ ແລະ ໃຫ້ລາງວັນຜົນງານການອອກແບບດີເດັ່ນປະຈໍາປີ ຂອງ ສສວ; ນິທັດສະການ ແລະ ກິດຈະກໍາ WORKSHOPປິ່ນອ້ອມພາຍໃນງານ ຕະຫຼອດ 7 ວັນ.
 |
ໃນໂອກາດດຽວກັນ, ທ່ານ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ກໍໄດ້ກ່າວມີຄຳເຫັນວ່າ: ວຽກງານສະຖາປັດຕະຍະກຳ ແລະ ວິສະວະກຳກໍ່ສ້າງ ມີຄວາມສໍາຄັນຫຼາຍຕໍ່ການພັດທະນາເສດຖະກິດ-ສັງຄົມຂອງຊາດ ເວົ້າລວມ, ເວົ້າສະເພາະ ແມ່ນຕໍ່ຂະແໜງການກໍ່ສ້າງ ຊຶ່ງບໍ່ສາມາດຂາດໄດ້. ງານວາງສະແດງປະຈຳປີ 2025 ຂອງ ສສວ ຖືໄດ້ວ່າເປັນເຫດການສໍາຄັນໜຶ່ງ ສໍາລັບ ສະຖາ ປະນິກ ແລະ ວິສະວະກອນໂຍທາ, ນັກສຶກສາ, ນັກທຸລະກິດ, ຜູ້ຜະລິດ ແລະ ຜູ້ຈຳໜ່າຍສິນຄ້າ ກ່ຽວກັບການກໍ່ສ້າງ, ພໍ່ຄ້າຊາວຂາຍ ແລະ ປະຊາຊົນ ຊຶ່ງງານວາງສະແດງດັ່ງກ່າວນີ້ ໄດ້ຈັດວາງ ສະແດງຜົນງານຂອງ ສສວ ເອງ, ບັນດາພາກສ່ວນຕ່າງໆຈາກກະຊວງ ຍທຂ, ອົງການຈັດຕັ້ງສາກົນ ແລະ ຫ້າງຮ້ານຕ່າງໆ ທັງເປັນຂອງລາວ ແລະ ຕ່າງປະເທດ. ນອກນີ້, ກໍຍັງມີກິດຈະກຳຕ່າງໆໃນແຕ່ລະວັນ ໂດຍສະເພາະ ແມ່ນການຈັດເວທີສົນທະນາແລກປ່ຽນຄວາມຮູ້ທາງດ້ານວິຊາການກ່ຽວກັບວຽກ ງານສະຖາປະນິກ ແລະ ວິສະວະກຳໂຍທາ ເພື່ອໃຫ້ທຸກພາກສ່ວນທີ່ເຂົ້າຮ່ວມງານ ໄດ້ຮຽນຮູ້ ແລະ ເຂົ້າໃຈຕໍ່ກັບວຽກງານດັ່ງກ່າວ. ໃນຕອນທ້າຍ ທ່ານຍັງໄດ້ກ່າວຕື່ມວ່າ ການຈັດງານວາງສະແດງໃນຄັ້ງນີ້ ຈະເປັນຂີດໝາຍອັນສໍາຄັນ ທີ່ຊ່ວຍນໍາເອົາຄວາມຮູ້ດ້ານສະຖາປະນິກ ແລະ ວິສະວະກຳໂຍທາ ມາເຜີຍແຜ່ໃຫ້ທົ່ວສັງຄົມໄດ້ຮັບຮູ້ ແລະ ເຂົ້າໃຈ ແລະ ສາມາດນໍາເອົາໄປຕໍ່ຍອດປັບປຸງໃຫ້ເຂົ້າກັບການ ດໍາລົງຊີວິດ ຢ່າງແທດເໝາະຂອງໃຜລາວ.
 |
ໃນຕອນທ້າຍພິທີ ທ່ານນາຍົກລັດຖະມົນຕີ ກໍໄດ້ໃຫ້ກຽດຂຶ້ນຕັດແຖບຜ້າ ເພື່ອເປີດພິທີ ຢ່າງເປັນທາງການ ພ້ອມທັງໄດ້ຢ້ຽມຊົມບັນດາຫ້າງຮ້ານ ທີ່ນຳສິນຄ້າມາວາງສະແດງ ໃນງານຕື່ມອີກ.
(ຂ່າວ-ພາບ: ກົມປະຊາສຳພັນ, ຫສນຍ)
ຄໍາເຫັນ