ຈົ່ງພ້ອມກັນເປັນເຈົ້າການໃນບັ້ນເລືອກຕັ້ງ ສສຊ ແລະ ສສຂ

ສປປ ລາວ ໄດ້ ກຳນົດເອົາ ວັນທີ 22 ມີນາ 2026 ເປັນມື້ປ່ອນບັດເລືອກຕັ້ງເອົາສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ V. ສະນັ້ນ, ເພື່ອເຮັດໃຫ້ບັ້ນເລືອກຕັ້ງຄັ້ງນີ້ ດຳເນີນໄປດ້ວຍຄວາມເປັນລະບຽບຮຽບຮ້ອຍ, ປະຕິບັດຢ່າງຖືກຕ້ອງຕາມຂັ້ນຕອນ ແລະ ລະບຽບການຕ່າງໆທີ່ຄະນະຮັບຜິດຊອບໄດ້ກຳນົດໄວ້, ຜູ້ທີ່ມີສິດເລືອກຕັ້ງທຸກຄົນຕ້ອງມີສະຕິສູງ ແລະ ມີຄວາມຕື່ນຕົວ, ເພື່ອເຂົ້າຮ່ວມໃນການໄປໃຊ້ສິດຂອງຕົນໃນການເລືອກເອົາ ສສຊ ແລະ ສສຂ ຜູ້ທີ່ຕົນເອງມັກ ເຂົ້າໄປນັ່ງໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອເປັນຕົວແທນປະຕິບັດສິດອຳນາດຂອງ ປະຊາຊົນລາວບັນດາເຜົ່າ ໃນການໄປໃຊ້ສິດເລືອກເອົາສະມາຊິກສະພານັ້ນ ຕ້ອງໃຫ້ເບິ່ງຢ່າງຖີ່ຖ້ວນ ແລະ ອ່ານປະຫວັດຢ່າງຄັັກແນ່ກ່ອນຈະເລືອກເອົາ, ເຊື່ອແນ່ວ່າຫາກເລືອກໄດ້ຜູ້ທີ່ມີວິໄສທັດ, ເບິ່ງກວ້າງມອງໄກ, ເປັນບຸກຄົນທີ່ດີເດັ່ນ, ມີຄວາມຮູ້ຄວາມສາມາດ, ເປັນບຸກຄົນທີ່ຫ້າວຫັນຈະມາພັດທະນາປະເທດຊາດຂອງພວກເຮົາໄດ້ຢ່າງແນ່ນອນ.

ສະນັ້ນ, ໃນວັນທີ 22 ກຸມພາທີ່ຈະມາເຖິງໃນມໍ່ໆນີ້, ເພື່ອເຮັດໃຫ້ວັນດັັ່ງກ່າວມີບັນຍາກາດທີ່ເຕັມໄປດ້ວຍຄວາມເບີກບານມ່ວນຊື່ນ, ມີຄວາມໝາຍຄວາມສຳຄັນຂອງຊາດ ແລະ ເຮັດໃຫ້ມີຄວາມສະຫງົບປອດໄພ, ຮັກສາໄດ້ຄວາມເປັນລະບຽບຮຽບຮ້ອຍ, ຫຼີກລ່ຽງບໍ່ໃຫ້ເກີດມີປະກົດການຫຍໍ້ທໍ້ ແລະ ສິ່ງບໍ່ດີເກີດຂຶ້ນໃນສັງຄົມ, ຖ້າຫາກພົບເຫັນປະກົດການຫຍໍ້ທໍ້ບໍ່ດີເກີດຂຶ້ນຈົ່ງແຈ້ງເຈົ້າໜ້າທີ່ຢ່າງທັນການ, ສະນັ້ນ, ທຸກຄົນຈົ່ງພ້ອມກັນຮ່ວມໄມ້ຮ່ວມມືກັນເປັນຈິດໜຶ່ງໃຈດຽວເຂົ້າຮ່ວມໃນບັ້ນເລືອກຕັ້ງຄັ້ງນີ້ ໃຫ້ບັນລຸໄດ້ຕາມລະດັບຄາດໝາຍທີ່ກຳນົດໄວ້, ໃນຂະນະດຽວກັນໃນມື້ເລືອກຕັ້ງຍິ່ງມີຄວາມສຳຄັນຊຶ່ງຈະມີມວນຊົນເປັນຈຳນວນຫຼາຍຫຼັ່ງໄຫຼກັນໄປໃຊ້ສິດໃນການເລືອກຕັ້ງຈະເຮັດໃຫ້ມີຄວາມແອອັດ ແລະ ສັບສົນ. ສະນັ້ນ, ທຸກຄົນກໍຕ້ອງໃຫ້ຄວາມຮ່ວມມືກັບທາງເຈົ້າໜ້າທີ່ຮັບຜິດຊອບ ແລະ ມີຄວາມສາມັກຄີຊ່ວຍເຫຼືອຊຶ່ງກັນ ແລະ ກັນ, ທີ່ສຳຄັນ ຖ້າຫາກບໍ່ເຂົ້າໃຈບັນຫາໃດກໍຕ້ອງຖາມຄະນະຮັບຜິດຊອບ ເພື່ອເຮັດໃຫ້ຖືກຕ້ອງຕາມຂັ້ນຕອນໃນການປ່ອນບັດ, ເຊື່ອແນ່ວ່າຫາກທຸກຄົນຊ່ວຍກັນເປັນຫູເປັນຕາ ແລະ ໃຫ້ຄວາມຮ່ວມມືກັນຈະເຮັດໃຫ້ບັ້ນເລືອກຕັ້ງຄັ້ງນີ້ໄດ້ຮັບຜົນສຳເລັດຢ່າງຈົບງາມ.

(ຂ່າວ: ສຳນານ)