ອີງຕາມບົດລາຍງານທີ່ເປີດເຜີຍໃນວັນທີ 6 ມິຖຸນາ ຜ່ານມາ ລະບຸວ່າ: ລາຄາຂອງທັນຍາພືດ ຊຶ່ງເປັນອົງປະກອບໃຫຍ່ທີ່ສຸດຂອງດັດຊະນີ FAO ຫຼຸດລົງ 1.8%, ເນື່ອງຈາກການເກັບກ່ຽວເຂົ້າສາລີທີ່ດີໃນອາກຊັງຕິນ ແລະ ບາຣຊິນ ລວມເຖິງຄວາມຕ້ອງການເຂົ້າສາລີທົ່ວໂລກຫຼຸດລົງ. ຢ່າງໃດກໍຕາມ, ລາຄາເຂົ້າໄດ້ເພີ່ມສູງຂຶ້ນໃນເດືອນພຶດສະພາຍ້ອນຄວາມຕ້ອງການເຂົ້າອິນດິກາ ເພີ່ມຂຶ້ນ ແລະ ເງິນໂດລາທີ່ອ່ອນຄ່າລົງ, ແຕ່ກໍບໍ່ສາມາດຊົດເຊີຍການຫຼຸດລົງຂອງສິນຄ້າອື່ນໆໃນດັດຊະນີນີ້ໄດ້.
ໃນທາງກົງກັນຂ້າມ, ລາຄາຜະລິດຕະພັນຈາກຊີ້ນ ແລະ ນົມໄດ້ເພີ່ມຂຶ້ນສູງໃນເດືອນດຽວກັນ, ໂດຍລາຄສິນຄ້າປະເພດຊີ້ນເພີ່ມຂຶ້ນ 1.3% ຍ້ອນຄວາມຕ້ອງການທີ່ສູງຂຶ້ນສໍາລັບຊີ້ນງົວ, ໝູ ແລະ ຊີ້ນແກະ ຊຶ່ງສາມາດຊົດເຊີຍການຫຼຸດລົງຂອງລາຄາຊີ້ນໄກ່ໄດ້. ໂດຍສະເພາະລາຄາໝູທີ່ເພີ່ມຂຶ້ນຫຼັງຈາກເຢຍລະມັນກັບມາສົ່ງອອກໄດ້ອີກຄັ້ງ ພາຍຫຼັງໝົດຂໍ້ຈໍາກັດກ່ຽວກັບພະຍາດປາກເປືອຍລົງເລັບ, ໃນຂະນະທີ່ລາຄາໄກ່ຫຼຸດລົງຍ້ອນວ່າຄວາມກັງວົນຕໍ່ໄຂ້ຫວັດສັດປີກໃນບາງຕະຫຼາດທີ່ກະທົບຕໍ່ຄວາມຕ້ອງການທົ່ວໂລກ.
ລາຄາຜະລິດຕະພັນນົມເພີ່ມຂຶ້ນ 0.8%, ຍ້ອນແຮງໜຸນຈາກຄວາມຕ້ອງການໃນອາຊີ, ໂດຍສະເພາະເນີຍ ໄດ້ບັນລຸລະດັບສູງສຸດເປັນປະຫວັດການ ແລະ ຍັງສົ່ງຜົນໃຫ້ລາຄາຂອງຊີສ ແລະ ນົມຜົງເພີ່ມຂຶ້ນດ້ວຍ.
ຢ່າງໃດກໍຕາມ, ສິນຄ້າທີ່ມີການປ່ຽນແປງລາຄາຫຼາຍທີ່ສຸດໃນດັດຊະນີ FAO ແມ່ນນ້ໍາມັນພືດ ແລະ ນໍ້າຕານ.
ລາຄານໍ້າມັນພືດ ຫຼຸດລົງ 3.7%, ເຖິງແມ່ນວ່າຍັງສູງກວ່າລະດັບຂອງປີກ່ອນ 19.1%. ໂດຍລາຄານໍ້າມັນປາມ, ຄາໂນລາ, ຖົ່ວເຫຼືອງ ແລະ ນ້ໍາມັນດອກຕາເວັນ ປັບຫຼຸດລົງຍ້ອນປະລິມານການຜະລິດທີ່ດີ ແລະ ຄາດວ່າຈະດີຂຶ້ນອີກໃນອະນາຄົດ ລວມເຖິງຄວາມຕ້ອງການທີ່ຫຼຸດລົງໃນ ສະຫະລັດ ອາເມຣິກາ.
ລາຄານໍ້າຕານຫຼຸດລົງ 2.6% ຍ້ອນຄວາມບໍ່ແນ່ນອນຕໍ່ຂອງທ່າອ່ຽງການຄ້າລະຫວ່າງປະເທດ ເຮັດໃຫ້ຄວາມຕ້ອງການຈາກອຸດສາຫະກໍາເຄື່ອງດື່ມ ແລະ ອາຫານ ຫຼຸດລົງ.
ຄໍາເຫັນ