ທ່ານນາງ ສຸດຖະໜອມ ວິສີສົມບັດ ຜູ້ບໍລິຫານ ຮ້ານມະນີລາໄມ້ປະດິດ ບ້ານໜອງບຶກ ເມືອງສີໂຄດຕະບອງ ນະຄອນຫຼວງວຽງຈັນ ໃຫ້ສຳພາດຕໍ່ສື່ມວນຊົນ ໂອກາດເຂົ້າຮ່ວມງານວາງສະແດງ ແລະ ຈໍາໜ່າຍສິນຄ້າໜຶ່ງເມືອງໜຶ່ງຜະລິດຕະພັນ (ໂອດັອບ) ແລະ ສິນຄ້າຄອບຄົວຕົວແບບຄັ້ງທີ XI ປະຈຳປີ 2025 ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ. ເພື່ອເປັນການໂຄສະນາສິນຄ້າໃຫ້ສັງຄົມ ທັງພາຍໃນ ແລະ ຕ່າງປະເທດໄດ້ຮັບຮູ້ຢ່າງກວ້າງຂວາງ ຊຶ່ງສິນຄ້າທີ່ຮ້ານຜະລິດຈະມີປະເພດດອກໄມ້, ຕົ້ນໄມ້ປະດິດ ເປັນຕົ້ນແມ່ນດອກໄມ້-ຕົ້ນໄມ້ມຸງຄຸນ ຊົມໃຊ້ ເພື່ອປະດັບເອ້ຍ້ອງຢູ່ພາຍໃນເຮືອນ, ສຳນັກງານ, ບໍລິສັດ, ໂຮງແຮມ ແລະ ສະຖານທີ່ທ່ອງທ່ຽວ ໄດ້ແກ່: ດອກຈຳປາ, ດອກຮັກ, ດອກດາວເຮືອງ, ດອກບົວ, ຕົ້ນເຂົ້າ (ໃຊ້ເວລາ ປະມານ 2 ເດືອນ), ຕົ້ນກ້ວຍ, ຕົ້ນໝາກຍົມ, ຕົ້ນໝາກມີ້, ຕົ້ນໝາກພິລາ, ຕົ້ນໝາກກ້ຽງ, ດອກເຫັດ ແລະ ພືດພັນຊະນິດອື່ນໆ. ເລີ່ມຜະລິດມາແຕ່ ປີ 2010, ແນວຄວາມຄິດດັ່ງກ່າວ ໄດ້ມາຈາກການໄປເຂົ້າຮ່ວມງານໂອດັອບ, ຝຶກອົບຮົມຢູ່ປະເທດໄທ ແລະ ດ້ວຍໃຈມັກ-ຮັກ ຈາກນັ້ນໄດ້ມາສິດສອນ ທັງປະດິດ-ຄິດຄົ້ນໄປນໍາຕົວຈິງ. ທ່ານ ນາງ ສຸດຖະໜອມ ວິສີສົມບັດ ກ່າວຕື່ມວ່າ: ການຜະລິດດອກໄມ້ປະດິດ ມັນກໍບໍ່ຕ່າງຈາກການຈົກລາຍແບບຂອງການຕໍ່າສິ້ນ, ຖ້າເຮົາຮູ້ລາຍໃດໜຶ່ງແລ້ວ ລາຍອື່ນໆ ກໍຈະຄ້າຍໆກັນ, ການທີ່ໄດ້ນໍາເອົາບົດຮຽນມາເຜີຍແຜ່ສົ່ງຄວາມຮູ້ ໃຫ້ກັບປະຊາຊົນ ຈໍານວນ 6ຄອບຄົວ, ຢູ່ບ້ານໜອງບຶກ, ບ້ານໜອງບົວທອງ ແລະ ບ້ານຕານມີໄຊ ເປັນຜູ້ຜະລິດແມ່ນຄວາມພູມໃຈຫຼາຍ ໂດຍຕົນເອງຈະເປັນຜູ້ອອກແບບໃຫ້. ນັບແຕ່ເລີ່ມດໍາເນີນວຽກງານດັ່ງກ່າວ ມາຮອດປັດຈຸບັນ ມີຫຼາຍກວ່າ 50 ຊະນິດ, ເລີ່ມຕົ້ນແມ່ນ: ເຂັມຂັດເສື້ອ-ປິ່ນປັກຜົມ ລາຄາ 25 ພັນກີບ, ຕົ້ນເຂົ້າ ລາຄາ 7 ລ້ານກວ່າກີບ, ໝາກເບັງ ປະດັບດ້ວຍຈໍາປາ - ໝາກເບັງປະດັບດ້ວຍດອກດາວເຮືອງ ຂາຍໃນລາຄາປະມານ 3 ລ້ານກີບ, ລາຄາສູງກວ່າໝູ່ແມ່ນປະເພດໝາກເບັງ-ພາຂວັນ ມີຄວາມສູງ 1,50 ແມັດ ທີ່ໃຊ້ດອກໄມ້ຈຳນວນຫຼາຍ ແຕ່ຜະລິດຕະພັນແມ່ນໄດ້ຂາຍດີ. ຄຽງຄູ່ກັບການຜະລິດອອກຈໍາໜ່າຍແລ້ວ ຍັງຮັບສິດສອນ ແລະ ຈໍາໜ່າຍອຸປະກອນຕື່ມອີກ, ແຮງງານຜະລິດພຽງ 4-5 ຄົນ, ຜະລິດຕະພັນດອກບົວບູຊາ ແມ່ນຂາຍໄດ້ຕະຫຼອດ ເພາະວ່າສັງຄົມນິຍົມຊົມຊື້ຫຼາຍ, ເດືອນໜຶ່ງໆ ລາຍຮັບປະມານ 30 ລ້ານກີບ. ນອກຈາກຜະລິດໃຫ້ລູກຄ້າພາຍໃນແລ້ວຍັງມີການສັ່ງຈ່ອງຂອງລູກຄ້າຕ່າງປະເທດ ເປັນຕົ້ນ ປະເທດຍີ່ປຸ່ນ ແລະ ປະເທດຝຣັ່ງ, ການເຂົ້າຮ່ວມງານແຕ່ລະຄັ້ງ ແມ່ນໄດ້ມີການຕອບ-ຮັບເປັນຢ່າງດີ ແລະ ຄັ້ງນີ້ກໍເຊັ່ນກັນ.
ໃນແຜນຕໍ່ໜ້າ ຈະຕັ້ງໃຈໃນການຜະລິດ ເພື່ອຕອບສະໜອງຕໍ່ຜູ້ຊົມໃຊ້, ຈະເຮັດພາຂວັນ-ໝາກເບັງທີ່ມີຄວາມສູງ, ທ່ານໃດຫາກມີຄວາມສົນໃຈງານດອກໄມ້ ແລະ ຕົ້ນໄມ້ງາມທີ່ຜະລິດຈາກວັດຖຸດິບ ໄປໄວ້ຕົບແຕ່ງ-ໂຊ, ຫາຊື້ໄດ້ທີ່ສູນການຄ້າວຽງຈັນເຊັນເຕີຊັ້ນ1 ຂາຍປະຈໍາໃນທຸກວັນ. ໂທ: 020 54632666 ໃນໂມງລັດຖະການ.
ຄໍາເຫັນ