ເອກອັກຄະລັດຖະທູດລາວ ຍື່ນສານຕາຕັ້ງຕໍ່ປະທານາທິບໍດີ ສ ໂປໂລຍ

ໃນວັນທີ 21 ພຶດສະພາ ຜ່ານມາທີ່ ສໍານັກງານປະທານາທິບໍດີ (Belweder Palace) ນະຄອນຫຼວງວາກໂຊວີສາທາລະນະລັດ ໂປໂລຍ,ທ່ານ ໄມບົວ ໄຊຍະວົງໄດ້ເຂົ້າຍື່ນສານຕາຕັ້ງຕໍ່ ພະນະທ່ານ ອານ ເດຣ ດູດາ (H.E Mr. Andrzej DUDA) ປະທານາທິບໍດີ ແຫ່ງ ສາທາລະນະລັດ ໂປໂລຍ ເພື່ອດຳລົງຕຳແໜ່ງ ເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສາທາລະນະລັດ ໂປໂລຍຊຶ່ງມີສໍານັກງານຕັ້ງຢູ່ ນະຄອນຫຼວງແບກແລງປະເທດເຢຍລະມັນ.
ໃນໂອກາດດັ່ງກ່າວ,ທ່ານເອກອັກຄະລັດຖະທູດ ໄດ້ພົບປະກັບ ພະນະທ່ານປະທານາທິບໍດີ ຊຶ່ງໃນການພົບປະ ທ່ານປະທານາທິບໍດີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານ ໄມບົວ ໄຊຍະວົງທີ່ໄດ້ຮັບການແຕ່ງຕັ້ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປປ ລາວ ຄົນໃໝ່ ປະຈຳສາທາລະນະລັດໂປໂລຍຊຶ່ງເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມື ທີ່ມີມູນເຊື້ອອັນດີງາມ ລະຫວ່າງ ສອງປະເທດ ໃຫ້ສືບຕໍ່ຂະຫຍາຍຕົວຍິ່ງຂຶ້ນ ແລະ ພ້ອມທັງອວຍພອນທ່ານເອກອັກຄະລັດຖະທູດ ປະສົບຜົນສຳເລັດໃນການປະຕິບັດໜ້າທີ່ວຽກງານອັນມີກຽດຂອງຕົນ ຢູ່ ສາທາລະນະລັດ ໂປໂລຍ ແລະ ບັນດາປະເທດ ທີ່ຮັບຜິດຊອບ.
ທ່ານເອກອັກຄະລັດຖະທູດ ໄດ້ສະແດງຄວາມຂອບໃຈຕໍ່ຄໍາເວົ້າອັນຈົບງາມ ແລະ ຖືໂອກາດດັ່ງກ່າວ ນຳເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ຈາກ ພະນະທ່ານ ທອງລຸນ ສີສຸລິດປະທານປະເທດ ແຫ່ງ ສປປ ລາວ ເຖິງ ພະນະທ່ານອານເດຣ ດູດາ ແລະ ຜ່ານພະນະທ່ານ ໄປຍັງລັດຖະບານ ແລະ ປະຊາຊົນ ສາທາລະນະລັດ ໂປໂລຍ ທຸກຖ້ວນໜ້າ; ພ້ອມທັງໄດ້ຕີລາຄາສູງຕໍ່ການພົວພັນ ທີ່ມີມູນເຊື້ອອັນດີງາມມາແຕ່ດົນນານ ລະຫວ່າງ ສປປ ລາວ ແລະ ສາທາລະນະລັດ ໂປໂລຍ ນັບແຕ່ສ້າງຕັ້ງສາຍພົວພັນການທູດນໍາກັນ ໃນປີ 1962 ເປັນຕົ້ນມາ. ພ້ອມກັນນັ້ນ, ທ່ານທູດ ກໍໄດ້ຕາງໜ້າລັດຖະບານລາວ ສະແດງຄວາມຂອບໃຈຢ່າງຈິງໃຈ ຕໍ່ລັດຖະບານ ແລະ ປະຊາຊົນ ໂປໂລຍ ທີ່ໄດ້ໃຫ້ການສະໜັບສະໜູນ ແລະ ການຊ່ວຍເຫຼືອ ສປປ ລາວ ໄລຍະຜ່ານມາໃນຫຼາຍດ້ານ ເປັນຕົ້ນການສຶກສາ, ສາທາລະນະສຸກ ແລະ ການສະໜັບສະໜູນຊຶ່ງກັນແລະກັນ ໃນເວທີສາກົນ, ໃນປີ 2021 ລັດຖະບານ ສໂປໂລບ ໄດ້ໃຫ້ການຊ່ວຍເຫຼືອ ສປປ ລາວ ຢາວັກຊິນ (Astra Zeneca) ປ້ອງກັນພະຍາດໂຄວິດ-19 ຈໍານວນ 640.110 ໂດສ ແລະ ອື່ນໆຊຶ່ງເປັນການປະກອບສ່ວນສໍາຄັນເຂົ້າໃນການສ້າງສາພັດທະນາເສດຖະກິດ-ສັງຄົມ ຂອງ ສປປ ລາວ. ພ້ອມກັນນັ້ນ, ຍັງໄດ້ແລກປ່ຽນຂໍ້ມູນ ແລະ ທ່າແຮງຊຸກຍູ້ສົ່ງເສີມການພົວພັນຮ່ວມມືໃນຂະແໜງການຄ້າ, ການລົງທຶນ, ການສຶກສາ, ສາທາລະນະສຸກ, ການທ່ອງທ່ຽວ ລະຫວ່າງສອງປະເທດ ໃນອະນາຄົດ. ນອກນັ້ນ, ທ່ານເອກອັກຄະລັດຖະທູດ ຍັງໄດ້ອວຍພອນໄຊໃຫ້ ພະນະທ່ານອານເດຣ ດູດາ ພ້ອມດ້ວຍຄອບຄົວ ມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານອັນສູງສົ່ງ ຂອງພະນະທ່ານ.
ພາຍຫຼັງສໍາເລັດການຍື່ນສານຕາຕັ້ງດັ່ງກ່າວ,  ທ່ານເອກອັກຄະລັດຖະທູດ ຍັງໄດ້ເຂົ້າຮ່ວມພິທີວາງພວງມາລາ ທີ່ສຸສານນັກຮົບບນິລະນາມ ຢູ່ນະະຄອນຫຼວງ ວາກໂຊວີ ຮ່ວມກັບບັນດາເອກອັກຄະລັດຖະທູດ ຈາກ ສສຫວຽດນາມ, ກົງໂກ, ຈີບຸຕິ, ໂອມານ ແລະ ກໍາປູເຈຍ ທີ່ໄດ້ສໍາເລັດການຍື່ນສານຕາຕັ້ງຕໍ່ປະທານາທິບໍດີ ໂປໂລຍ ໃນຄັ້ງນີ້. 
    ໃນໂອກາດໄປຍື່ນສານຄັ້ງນີ້, ທ່ານເອກອັກຄະລັດຖະທູດ ຍັງໄດ້ພົບປະເຮັດວຽກ ກັບ ຫົວໜ້າກົມພິທີການທູດ ແລະ ກົມອາຊີ, ກະຊວງການຕ່າງປະເທດ ໂປໂລຍ ເພື່ອແນະນໍາຕົວ ແລະ ແລກປ່ຽນຄໍາຄິດຄໍາເຫັນ ກ່ຽວກັບ ຊ່ອງທາງເສີມຂະຫຍາຍການພົວພັນຮ່ວມມື ລາວ-ໂປໂລຍ ໃນຂະແໜງການທີ່ສອງປະເທດມີທ່າແຮງ ແລະ ຄວາມສົນໃຈ ຮ່ວມກັນໃນຕໍ່ໜ້າ. ນອກຈາກນັ້ນ, ທ່ານທູດພ້ອມຄະນະ ຍັງໄດ້ພົບປະກັບ ສະມາຄົມຄົນເຊື້ອຊາດລາວ ແລະ ນັກສຶກສາລາວ ທີ່ອາໄສຢູ່ນະຄອນຫຼວງວາກໂຊວີ, ໂປໂລຍ.
(ຂ່າວ-ພາບ: ກຕທ)